Read Karbi LEVI 25 Bible Online

LEVI 25 - Karbi bible

LEVI 25

¹Sinai Anglong along Moses aphan HEMPHU pulo, lapen

²Israel atum aphan lahei aron kepijisi hukum pilo. HEMPHU nangkepi adet nangtum kelutdam ahut, nangtum throksi aningkan sai ketiki ke pen ajok HEMPHU aphan aman pinon.

³Ningkan throk nangtum ahidi sok varlongji, drakha aberi kolom pilongji, lapen sok chorot-longji.

⁴Bonta throksi aningkan ke longle aphan kepasang aningkanlo, la HEMPHU aphan kehodai aningkanlo. Nanghidi sok var-ri, nang drakha aberi kolom piri.

⁵Chili varvepin pen amethang arong kevang asok seta rot-ri, lapen nangtum kolom kepipe adrakha aberi pen athe lik-ri; la ke longle aphan isi kesangpame aningkanlo.

⁶Halaso aningkan longle sai tikike det-lo seta, la nangtum aphan, nangtum aban aphan, kerong amonit aphan, nangtum along kedo bang adet aso aphan,

⁷nang kepangreng api aphan, lapen nanghidi ajo amarat api aphan an pacholongji. La kepathe asontin cholongji.

⁸Ningkan throksi batai throksi lakhanon, isi ningkan phlikep-ra sirkep po.

⁹Anke throksi achiklo, kep arni, Preng ketupi Arni, inut amonit toira det adang bithe pong-ut pabutdamnon.

¹⁰Lasonsi nangtum phokep aningkan ke isi bivetnon lapen det adang bithe kedo atum aphan kejok pachethangnon. Laso aningkan ke jubililo, lapen mar kejortang anta atiri ahemphu aphan voithudetpo mate adon arap aphan voithupo, lapen badu aphan tame ban kejortang do pulote la aphan ahemtun ahem voithupo.

¹¹Nangtum ahidi saitiki nangnelo mate kolom kepipe adrakha aberi along athe lik nangnelo.

¹²Ningkan kangthim nangtum aphan ingthir-et-lo; hidi along amethang kepathe athe ke chochottu.

¹³Laso aningkan kejortang amar an atiri ahemphu alongsi voi-et po.

¹⁴Lasi nangtum Israel akorte aphan longle jorlote mate namlote, nang chobeibedet nangji.

¹⁵Kevoi Aningkan nangkeleji aphrang sok ningkan ko-an longjilangma laso ateng penle ador thik nangpo.

¹⁶Jongsi aningkan ongdunglang pulote, adorta ingtuimuchotpo, bonta aningkan ong-elo pulote adorta ingdaimuchotpo, pima la kejorke longle ko-an asok kelong-unjima, laso aphanchot.

¹⁷Israel hijan chechobeiri, bonta nang Arnam HEMPHU aphan kroinon.

¹⁸HEMPHU aron lapen ahukum-heihei an kroipetnon, anke det along nang jokvanpen dolongpo.

¹⁹Longle la athe pathepo, lapen nang kechoji aphan ninghang an longji lapen jokvan pen dolongji.

²⁰Bonta ajehak atum throksi aningkan ke kopisi kechopo pu arju tahai, athema hidi saitikikedetpo lapen sok atheta pangrumre detpo.

²¹HEMPHU-si throk aningkan pahirjumepo, anke la ningkan hini aphan athe dorphluppo.

²²Nangtum nerkep aningkan hidi along sok chili kevar ahut anta, throk aningkan nangtum kelong asoksi checho longbomjilang, lapen nangtum ketiki asok chorot longletik an halaso asok dorphlup pen cholongbom-jilang.

²³Kaike aphan nang longle chejor nangne, pima la nangmar kali; la Arnam amarlo, lapen nangtum ke bang adet amonit atum asonlo, la kerimchot abang.

²⁴Longle kejor ahut, atiri ahemphu abang chenamthulongji pu chini nangji.

²⁵Jongsi mane a-Israel dukvok-lo lapen alongle chejor nangkok-lote, la kechephonei abangsi la lang nangji.

²⁶Mane amonit jongsi la kelangpiji abang kechepho amonit ave pulote aphi chingthur-o pen amethang chelang undet tahai.

²⁷Lason along ke kenam amonit aphan Kevoi Aningkan adak ningkan ko-an langma kedo alangli ahin aningkan atangka chepapleng nangpo, jongsi alongle chelang unpo pulote.

²⁸Bonta alangli jongsi longle kechelangji aphan dorphlup atangka ave pulote. Kevoi Aningkan plengpletik an kenamdet abang aridengsi longle dokokpo. Halaso aningkansi atiri ahemphu aphan longle voithupo.

²⁹Paisong kedo arongsopi arlo jongsi mane abang ahem chejortang-lo pulote kejor arni pen kecheng aningkan angbong alangli chelang detji ajakong do.

³⁰Bonta ningkan isi angbong jongsi alangli chelangle pulote, alangli puthot kechelangthuji ajakong avelo, lapen hem ke kenam abang lapen aso-asu atum aridengsi kaike anta doverpo; lapen la ke Kevoi Aningkan ahutta voivelo.

³¹Bonta paisong angtan kedo ahem-heihei ke hidi ason lo; atiri ahemphu abang kechelangdetji ajakong do, lapen lahei ke Kevoi Aningkan ahut voithu nangji.

³²Tebonseta, Levi atum ke, latum aphan kepado arongsopi-heihei along kedo amar an apor alingta kechelang thudetji ajakong do.

³³Lahei arongsopi angbong ehum ahem Levi inut chojordet-lo, lapen chelang-thuthedet-lote, la Kevoi Aningkan ahut voithuvek nangji pima Israel arat angbong Levi atum aphan kepek arongsopi amar ke latum kaike aphan amarlo.

³⁴Bonta Levi atum aphan kekomchen kechopan bap ajo alongle ke kaita jorjelo; la ke latum kaike aphan amarlo.

³⁵Nangtum adung-arei jongsi Israel akorte dukvok-lo lapen amethang charchak un-e lote, kerong amonit aphan asonthotsi la aphan nang pador nangpo, anke alangli nanglidung dolongbompo.

³⁶Alangliphan abat ale hangri, bonta Arnam aphan kroira nang korte Israel nangdung padolongpo.

³⁷La aphan nang keparamdun atangka aputhak thangnatta abat ale hangri, lapen nang la aphan kejor a-an aputhak abat ale enri.

³⁸La ke nang Arnam HEMPHU ahukumlo, nangtum aphan Kanaan adet alongle nangkepiji aphan lapen nangtum Arnam keplangji aphansi la Ijip adet pen nangtum aphan nangkevan abang-lo.

³⁹Mane Israel amonit jongsi nangdung kedo abang lapu-an akeduk-lo, la nanglilong ban keplangji aphan nangchejor nangkok-lo, la aphan nangli ban akam paklem-kledetnon.

⁴⁰Nanglilong alangli inut kerong amonit asonsi nangdodunpo lapen puthot Kevoi Aningkan an ingdukpo.

⁴¹Halaso ahut la lapen la asomar an nangliphan otekangpo lapen amethang ahem chedampo lapen aphusar atum alongle along chedampo.

⁴²Israel arat atum ke HEMPHU abanlo, lapen alangli latum aphan Ijip adet pen vanlo; latum aphan ban pinchongsi jor nangnelo.

⁴³Latum aphan chenek-ri bonta nang Arnam aphan kroinon.

⁴⁴Nangtum jongsi ban nangji pulote nangtum kekomchen adet penle namnon.

⁴⁵Nangtum along nangkedodun bang adet atum asomar aphan namlongji. Lason a-osomar nangtum adet along mahang kethek lake nangtum amar asonlo,

⁴⁶lapen latum aphan nangtum asomar kechepahemphuji aphan pamotekangme, latum thithetik ingdukpo. Bonta nangtum nangkorte Israel aphan chenek-longle.

⁴⁷Nangtum angbong kedo bang adet amonit plang-olo, lapu nangkorte Israel amonit ke dukvok lapen bang adet aso mate ahemtun abangphu aphan amethang chejorsi ban plang-lo.

⁴⁸Alangli chejordet aphi, alangli kechelang detji aphan ajakong do.

⁴⁹Akorte angbong pen inut, mate a-ong, mate akor asopo tame, mate alangli chepho-chero adon atum alangliphan langdet melo; kalite alangli methang dorphlup atangka dolo, alangli kejokji aphan chenam unlo.

⁵⁰Alangli alangliphan kenam abang pen chingvai nangji lapen latum la aphan kejor aningkan pen Kevoi Aningkan an lakha nangpo lapen kerong amonit aphan kepi anam ateng lakhasi voi nangpo.

⁵¹Ahin kedolang aningkan ateng pen alangli phan kepajokji atangka ajehak pithuvoiphit nangji.

⁵²Bonta jubili aningkan an keleji ong-elo pulote lakhasi tangka voi nangji, la aphan aningkan kepathik aban asonlo. Alangli ahemphuta laphan kam toi-ot nangnelo.

⁵³Alangliphan ningkan esek aphan kerongbom asonsi ahemphuta laphan kam toi-ot nangnelo.

⁵⁴Lahei atovar pen la aphan pajokje pulote, la lapen la asomar atum aphan puthot Kevoi Aningkan ahut pajok nangpo.

⁵⁵Inut a-Israel aso kaike aphan ban dolongver un-e, pima Israel atum ke HEMPHU abanlo. Latum aphan Alangli Ijip adet pen vanlo; Alangli ke HEMPHU halatum a-Arnamlo.