Read Karbi LEVI 26 Bible Online

LEVI 26 - Karbi bible

LEVI 26

¹HEMPHU pulo, “Kumlin selamri mate kesoi akumlin, arlong anujok-heihei, mate kehong arlong akumlin karchoji aphan parjap-ri. Ne ke nangtum a-Arnam HEMPHU-lo.

²Dhorom arong-aje-heihei klemnon, lapen Nephan karcho adim aman pinon. Ne HEMPHU-lo.”

³Nangtum jongsi Ne aron-heihei dothak-lo lapen Ne hukum-heihei kroilo pulote

⁴athik apor ahut Ne arve pajangji, anke longle pen athe long-opo lapen thengpita athe do-opo.

⁵Sok lapu-an kemeji, nangtum drakha athe kelikji apor ahut anta sok-rotbomjilang, lapen chili kevarji ahut anta nangtum drakha athe likbomjilang. Nangtum ko-anma kechoji ning hang an cholongji, lapen nangtum adet along jokvan pen nangtum dolongji.

⁶Nangtum adet angbong ningkangsam Ne nangpiji, lapen nangtum badu aphanta phererepin pen mekjanglongji. Det arlo kepherememe api Ne pavedetji, lapen hadak ron avedetpo.

⁷Nangtum ahotur atum aphuthak nangtum haithorpo;

⁸bangpharo aphan nangtum bangpho anta haidet po, lapen nangtum pharo pen halatum surikep aphan parem unpo.

⁹Ne nangtum aphan pahirjumepo lapen nangtum asomar ongdungpo; Ne nangtum pen kechepathiktang kechak ason Nehinpen Ne cheklempo.

¹⁰Nangtum asok lapu-an ke-ongji, la ningkan isi nangle dunji, lapen akemi asok aphan kebi adim kepek ahut aban asok ahin varnangsetpo.

¹¹Ne kangthir apehem along si Ne nangtum along nangdodunpo, lapen Ne nangtum pen suiselo.

¹²Ne nangtum along nangdo dunpo; Ne nangtum a-Arnam plangpo, lapen nangtum ke Nerat aso plangpo.

¹³Ne nangtum Arnam HEMPHU-si nangtum aphan Ijip adet pen nangvanlo anke nangtum ban plang nangnelo. Nangtum aphan nangke-ot-het arum patongdik ajakong aphan Ne phridak-lo lapen Ne nangtum aphan ingphun chingthurlong pame pen nang padamlong-lo.

¹⁴HEMPHU Pulo, “Nangtum jongsi Nehukum-heihei kroithekthe pulote, nangtum aduk phoji.

¹⁵Nangtum jongsi Ne aron lapen hukum-heihei kroimo lote lapen nangtum pen Ne kechejok aloh alam ingdilote,

¹⁶Ne nangtum aphan aduk nangpiji. Nangtum aphuthak Ne akesung-heihei nangvanji keme-un-e akeso, lapen nangmek selokjok an akeso lapen nangkai do pajoinakpo. Nangtum methang achili nangtumsi rikpo, bonta la nangtum aphan thangnat akeme vanvelo, pima nang hotur atumsi nangtum aphan nang paremdetpo lapen nangtum kopisi ke-ema cho-etpo.

¹⁷Ne ta nangtum abe thurpo, anke nangtum remdetpo, lapen nangtum kehijim amonit atumsi nangtum aphuthak pangripo; nangtum lapu-an phereji nangtum aphan badule nangphlungphle det seta nangtum katpo.”

¹⁸Lahei aphi anta nangtum kroithekthelang tangte nangtum aduk phan throksi Ne nangpabatpo.

¹⁹Nangtum ane kechepathe Ne ingdipo, arve avedetpo, lapen nangtum alongle krenghaksi ingchin ason ingtangrakpo.

²⁰Nangtum kechepaduk ale thangnatta avedetpo, pima nangtum alongle sok athe pathethedetpo, lapen thengpi ta athe pathethelo.

²¹Nangtum jongsi Nephan khang-bomjilang, lapen kroimobom-jilang pulote Ne puthot nangtum aduk ako phan throksi pabatjilang.

²²Nangtum angbong Ne kepherememe api nang-toipo, lapen latum nangsomar pathipo, kepangreng api pavirpo lapen nangtum aphan pu-ansi bichom po nangtum atovar chehelat abang avedetpo.

²³Lahei aphi anta nangtum Nelam arjuje bonta thurkrap bomjilang pulote,

²⁴Ne nangtum anat nangche-tevarkrappo, lapen aphrang apar batai throksi aduk kepi palitmuchotpo.

²⁵Nangtum Ne pen kechejok aloh kangdi apot nangtum aphan aduk nangkepijisi ron Ne nangtoipo, lapen nangtum jongsi kejokji aphan rongsopi-heihei along chingrumlote, nangtum angbong keme-un-epin akeso Ne nangtoipo, anke nangtum nanghotur arideng chehodai jokjedetpo.

²⁶Nangtum kereng-i asok-asang pavedetpo, anke bangkep a-arloso atum him kepangdangji aphan phule isinatsi kadokave aphan akenang dochotpo, latum la nangtum aphan nangpithuji, lapen nangtum la do-an cho seta nangtum ingchirji.

²⁷La an aphi seta nangtum Nephan thurkrapjilang, lapen nekroi mobomjilang pulote,

²⁸Nening thisi Ne nangtum anat nang pangnokrap po, lapen puthot aphrang apar phan throksi aduk-kepi palitmuchotpo.

²⁹Lapu-ansi nangtum ingchirji, nangtum nangtum methang asomar atum aphan chechohaidet po.

³⁰Nangtum inglong along karcho adim Ne pavir-etji, nangtum methek adovan Ne ingsek-etji, lapen nangtum kethi abang arpum kekreptang akumlin athak nangvarji.

³¹Ne nangtum arongsopi an phalangno-etpo, lapen nangtum karcho adim an pavir-etpo, lapen nangtum adan-heihei dengmopo.

³²Ne lapu-an nangtum adet pavirji kecheraiji ahotur atum anta thek-long pen thirikjokpo.

³³Nangtum aphuthak ron Ne vanji, lapen nangtum arongsopi-heihei paruhupsi opo.

³⁴Anke alongle setta nangtum kepasanglongle kesang aningkan ason sanglong-pamepo;

³⁵la obuppo lapen nangtum hotur adet ban kedam ahut la sanglongpamepo.

³⁶Nangtum ban kedam atum an aphan lahei klempo, lapu-an paphere po tomon thengpi arvo kejap arki anta latum katpo. Nangtum aphan ron along nang-kehungdun asonsi katpo lapen nangtum adung hotur avedetta nangtum kreppo.

³⁷Nangtum aphan baduta phlungphledet seta nangtum inut aputhak inut chebapsi klipo lapen nangtum ahotur atum abe thursi chedan un-edetpo.

³⁸Ban kedam pensi nangtum thipo, hotur atum adet si nangtum aphan nangjoilutpo.

³⁹Nang hotur adet along ajehak nangtum kerenglang atum ningjoino-dakpo pima nangtum lapen nangphusar atum apap-heihei pen apot.

⁴⁰Bonta nangso-nangsu atum ke halatum apap-heihei chekobirpo, lapen halatum aphusar atum apap chekobirpo, lahei atumsi Nephan khang-lo, lapen nebe-thurlo,

⁴¹lapen Nephan halatum aphuthak pathur lo, lapen halatum ahotur adet ban nepatoi nang-lo. Kejutsi, nangso-nansu atum chepabihek lapen halatum apap lapen kethurkrap anam chepi lote,

⁴²Ne Jakob pen, Isaak pen lapen Abraham pen kechejok aloh alam chemathadampo, lapen nerat aso aphan longle kepiji aphan Ne kechechak chepamithupo.

⁴³Kechengsi, longle la arat pen avedet nangji anke la sanglong pamepo, lapen latum Ne aron lapen hukum-heihei kedengmo apot dorphlup adai tu nangji.

⁴⁴Bonta la-an seta, latum ahotur adet dotik ke, Ne obup-khangjangje mate latum aphan pavirdet khangjangje. La ke Ne pen latum angbong kechejok aloh alam jut pamepo. Ne ke halatum a-Arnam HEMPHU-lo.

⁴⁵Ne HEMPHU, halatum a-Arnam keplangji aphan Nerat atum aphan Ijip adet pen kevan pen ajok do-an akhei aphan Nejakong chepaklang-lo, lapen halatum aphusar atum pen Ne kechejok aloh chepamethupo.

⁴⁶La kedo-an HEMPHU Moses aphan Sinai Anglong along kepi aron lapen ahukum-heihei ke Israel arat atum aphanlo.