Read Karbi LEVI 27 Bible Online

LEVI 27 - Karbi bible

LEVI 27

¹HEMPHU Moses aphan

²lahei aron Israel arat aphan kepa-thanjisi pilo. Inut amonit amethang kepanongtang kechechak ason kechepachokji si HEMPHU aphan kechepilo pulote, labangso amonit ajehak atangka la aber kepi pen ajok pajok un,

³la ke HEMPHU kethik ador ateng masi, pinso amonit arta ningkan ingkoi pen ningkan throk-kep arta akesar ador ke rup dum phokep, lake kangthir ahem alakha apunlo.

⁴Abangphu jongsi arloso, nangtum kelakha nangji aphai ke rup dum thomkep.

⁵Jongsi ningkan pho arta pen ningkan ingkoi arta an pulote nangtum kelakha nangji ador ke pinso rup dum ingkoi lapen so-arlo ke rup dum kep.

⁶Jongsi amonit arta chiklo ejon pen ningkan pho arta pulote, nangtum kepi nangji ador ke pinso ke rup dum pho lapen so-arlo ke rup dum thom.

⁷Jongsi abangphu abang arta ningkan throk-kep lapen la ansose litchot pulote, nangtum kepi nangji ador pinso ke rup dum phokep lapen arloso ke rup dum kep.

⁸Jongsi inut apinso lapu-anta kepiji aphan dukpik pulote, alangli halabangso amonit aphan kurusar angno van nangpo, lapen kurusarsi la aphan ador pathikpo; kepiji abang ajakong atengsi halabangso amonit kurusar aphan pipo.

⁹Jongsi pi amar si chechak-lo pulote la HEMPHU kedengji aphan melo, HEMPHU aphan kepiji asontin adanta kangthirlo.

¹⁰Kechechak abang pi alar akaprek palar nangnelo. Alangli klemlo pulote la la apita HEMPHU amarlo.

¹¹Bonta kechechak amar aron ateng pen kangthirthe api pulote, la ke HEMPHU aphan dan kepiji aphan akeme kali pulote, bangso amonit kurusar along pi ponpo.

¹²Kurusar abang laso anam pathikpo, la keme kehingno langpo, lapen anam rippo.

¹³Halabangso amonit jongsi chenamthudetji aninghang pulote, la anam pinangpo lapen pharo pen phan ingkoi abat pinangji.”

¹⁴Mane jongsi ahem HEMPHU aphan hodaiji pulote, kurusar abang la me hingno ateng langsi ador pathikpo, lapen anam rippamepo.

¹⁵Kehodai abang jongsi ahem chenamdun ingtung pulote la anam pinangpo lapen pharo pen phan ingkoi abat pinangji.

¹⁶Mane jongsi alongle ajehak HEMPHU aphan hodailo pulote, la chili akenang ateng pen si ador pathik nangji, soktipli lin-ingkoi along rup dum kep.

¹⁷Alangli jongsi Kevoi aningkan aphi thot amat si hodailo pulote ador longlunpo.

¹⁸Jongsi aphichot si hodailo pulote. Kevoi Aningkan an ningkan ko-anma kedolang kurusar abang lakhasi ador pathikpo, lapen ador thansi pathikpo.

¹⁹Hidi kehodai abang jongsi chenamdun-thudetji pulote, alangli anam pinangpo lapen phan pharo pen phan ingkoi abat pinangji.

²⁰Aphrangsi ahemphu pen chenamdun-thuthe pinpen anut kaprek amonit aphan jorji pulote, alangli kechenamdun-thudetji ajakong chepangbolo.

²¹Puthot Kevoi Aningkan ahut ke longle HEMPHU amar kaike aphan plangpo; la ke kurusar atum apharmanlo.

²²Mane abang jongsi kenamtang ahidi HEMPHU aphan hodailo pulote.

²³Kurusar abang Kevoi Aningkan an lakhasi la ador pathikpo, lapen halabangso amonit abang halaso arni amat anam pinangji; tangka ke HEMPHU apharmanlo.

²⁴Kevoi Aningkan ahut hidi ke atiri ahemphu aphan kalite aso-asu aphan voithudetpo.

²⁵Kadokave ador ke saihem keparon atengsi pathikpo.

²⁶Pi kechingthok-cheng aso ke HEMPHU apharmanlo, la apotsi badutame Alangliphan ningdakdak athok pilonglelo. Chainong aso, biresak aso, mate bi aso tame HEMPHU amarlo,

²⁷bonta kangthirthe api aso ke kedobom atengthot anam pen namdunthudet setame lapen abat phan pharo pen phan ingkoi pinangji. Jongsi chenam-dundetde pulote kedobom anam atengthot pen akaprek aphan jordet setame.

²⁸Pine hanghepin pen HEMPHU aphan kehodaitang amar, monit tame, pi tame, mate longle tame, la baduta jor longle lapen nam longle. La ke kaike aphan HEMPHU amarlo.

²⁹Monit seta jongsi akehang avepin pen chehodai lote chenamthu longlelo; la aphan pathivek nangpo.

³⁰Hidi pen kelong phankep pen ephan, sok tame thesere tame, la HEMPHU amarlo.

³¹Mane jongsi chenamdunthudetji aninghang pulote, alangli kedobom ador pinangji lapen abat phan pharo pen phan ingkoi pinangji.

³²Kepangreng api jonkep angbong pen pi ejon ke HEMPHU amarlo. Pi aphai kelakha ahut kep aphai kele ajon ke HEMPHU amarlo.

³³Kelangno api kejongje detji aphan ahemphu abang bivet nangnelo, lapen la alar alangli lar nangnelo. Ajon keprek api alar alangli lardet-lo pulote, la jonnita HEMPHU amar plangdetpo, lapen chenamdun longlelo.

³⁴Lahei ahukum helo Sinai Anglong athak Israel arat aphan pusi HEMPHU Moses aphan pilo.