Read Karbi LEVI 4 Bible Online

LEVI 4 - Karbi bible

LEVI 4

¹Mane abang jongsi mathakrang pen HEMPHU ahukum angbong isi bak

²ingdi lote la aber aron-heihei talon nangji pura Israel aso atum aphan kepathanjisi Moses aphan HEMPHU hukum pilo.

³Kurusar Kethenei abang jongsi pap klemlo, lapen rat aputhak ado vanlo pulote, alangli aju kavepin achainong aloso pinangji lapen alangli pap apot la HEMPHU aphan athok pinangji.

⁴Chainong aloso alangli Pehem angno vanpo, la aphu athak alangliri batpo, lapen hadak HEMPHU angno la pathipo.

⁵Anke Kurusar Kethenei abang chainong avi ajehak ensi la Pehem arlo pondetpo.

⁶Alangli ri chimun vi along nimsi kebeng ape kangthir along batai throksi arsipo.

⁷Anke alangli ajehak avi ke Pehem arlo methek adovan akung dungpo, lapen ahin an ke alangli dovan akeng-risi dungpo; la ke athok kephrinji aphan Pehem athengno kedo adovan along-lo.

⁸Bangso achainong pen alangli kedo-an athu enpo lapen aphek-angthin along kechebon athu,

⁹ahambi lapen la along kechebon athu lapen angthin kemenei aphar.

¹⁰Laso athu kurusar abang ponpo lapen la alangli kephrin athok-heihei aphan ke-en adovan athak phrinpo, la ke kejalang athok ahut kepathitang api pen athu ke-en keklem asonthot si klempo.

¹¹Bonta alangli la areng, a-ok, aphu, akeng-heihei, lapen la aphektung penpen arlo kedo angthin angphor anta akunchi en-etpo,

¹²la kedo-an mukam angtan aron pen kepangthir-et, hadak thek-lo kethok adim along ponpo, lapen hadak theng pen kethor ame along alangli phrinpo.

¹³Jongsi la Israel akhei kangthim amat si kemathakrang pen pap keklem pen ajok HEMPHU ahukum-heihei angbong isibak ingditang-lo lapen ado vanlo pulote,

¹⁴pap-lo pu kechinidet aphi, rat pen ejon achainong aloso isi pap-athok ason vanpo. Latum HEMPHU kedo a-Pehem along vanpo;

¹⁵rat ajalin atum ari la aphu athak batpo, lapen la aphan hadak pathipo.

¹⁶Kurusar Kethenei abang chainong alo avi Pehem arlo ajehak ponpo,

¹⁷la arlo arichimun nimpo, lapen kebeng ape angno batai throksi arsipo.

¹⁸Pehem arlo kedo mephik adovan akung-heihei anujok along an ajehak avi hipo lapen ahin avi an ke Pehem athengno along kedo kephrin athok-heihei aphan ke-en adovan akeng-ri dung etpo.

¹⁹Anke alangli la athu an ponsi dovan athak phrin-etpo.

²⁰Pap athok achainong aputhak alangli keklem asonthotsi alangli la klempo, lapen lasonsi rat apap athok aphan alangli klempo, lapen halatum aphan diyadetpo.

²¹Anke alangli mukam angtan anat chainong pondetsi amethang apap aphan kepi chainong alo athok asonthotsi la phrinpo. Laso athok ke rat apap kepakak-i athok-lo.

²²Mane kepangri abang jongsi mathakrang pen HEMPHU ahukum-heihei angbong isibak kangdi ado dolo pulote,

²³alangli pap chechini pen aju kavepin abi alo alangli isi athok ason vanpo.

²⁴La aphu athak alangliri batpo, lapen kephrin athok api kepathi adim dovan anirep anat pathipo. La ke pap kepakak-i athok-lo.

²⁵Kurusar abang pi avi along arichimun chenimpo lapen dovan akung ano along hipo, lapen ahin an ke dovan akeng-ri si dung-etpo.

²⁶Kejalang athok api athu kephrin asonthotsi athu kedo-an alangli dovan athak phrinpo. Lasonsi kurusar abang kepangri abang apap athok pajirpo, lapen alangliphan diyadetpo.

²⁷Mane jung-jung amonit jongsi mathakrang pen HEMPHU ahukum-heihei angbong isibak ingdilo pulote,

²⁸alangli pap chechinidet aphi alangli aju kavepin abi api isi athok aphan chevan nangpo.

²⁹La aphu athak alangliri batpo lapen kephrin athok api kepathiji adim dovan anirep anat ponsi pathipo.

³⁰Pi avi along Kurusar abang ari chimun chenimsi dovan akung anoheihei along hi po lapen ahin an ke dovan akeng-ri dun-etpo.

³¹Anke alangli la athu an lirpo, kejalang athok ahut athu kelir asonthotsi lirpo, anke la alangli dovan athak phrinpo, ansi laso angnim HEMPHU aphan aning pangsampo. Lasonsi monit apap athok kurusar abang pajirpo, lapen alangliphan diyadetpo.

³²Mane abang jongsi pap athok aphan biresak ejon van pulote la api aju kavepin nangji.

³³La aphu athak halabangso abang ari bat nangji, lapen kephrin athok kepathi adim dovan anirep anat pathi nangji.

³⁴Kurusar abang pi avi aputhak ari chimun chenimpo lapen la dovan akung anoheihei along hipo, lapen ahin an ke dovan akeng-ri dung-etpo.

³⁵Anke alangli la kedo-an athu enpo, kejalang athok ahut biresak pathisi athu ke-en asonthot si enpo, lapen HEMPHU aphan kepi kecho athok penpen alangli la dovan athak phrinpo. Lasonsi kurusar abang monit apap athok pipo lapen halabangso aphan diyadetpo.