Read Karbi LEVI 5 Bible Online

LEVI 5 - Karbi bible

LEVI 5

¹Aber ketok alam-heihei apot pap athok akenangsot. Mane aphan jongsi kangsai ahem pen haki kepiji aphan hang-lo pulote, lapen alangli kethek-long mate karjulong ason pachinine pulote, alangli ale phovek nangji.

²Mane jongsi mathakrang pen Aron ateng pen kangthirthe ason, kethitang api arpum ot-lo, pulote, alangli ingthirthelo lapen alangli keklemtang akam chechini det aphi adai dolo.

³Mane abang jongsi monit abang arpum kangthirthe ason ottang-lo, la ajat ason amar setame, la keklemtang-lo pu chechinidet aphi la adai dolo.

⁴Mane abang jongsi mathakrang pen chechakdet-lo, la jat ason setame, alangli keklemtang ason chechinidet aphi la adai dolo.

⁵Mane abang jongsi adai dolo, pulote, alangli apap chekobir masi

⁶lapen alangli pap adai, alangli biresak api kalite bi api HEMPHU aphan isi athok pinangji. Bangso amonit apap athok kurusar si arklipipo.

⁷Mane abang jongsi biresak mate bi pi un-e pulote, HEMPHU aphan alar vothung jonni lapen thungpharlo jonni alangli van-nangpo, ejon ke pap athok-lo, lapen ajon keprek ke kephrin athok-lo.

⁸Lahei alangli kurusar along van-nangji, alangli si kechengsi pap athok vothung pipo. Alangli la aphu vungpongpe pin pen angphun ingdisutpo

⁹lapen la ajehak avi dovan akung arsipo, lapen ahin avi ke dovan akeng-ri along dung-etpo. Lake pap kepakak-i athok-lo.

¹⁰Anke alangli adun avo enpo, lake Aron atengpen kephrin athok aphanlo. Lasonsi kurusar abang monit apap athok pajirpo lapen halabangso aphan diyadetpo.

¹¹Mane jongsi vothung jonni lapen thungpharlo jonni pi un-e pulote, pap athok aphan alangli him aduk elin pavannang. Alangli jit ajangthu mate hijung la aputhak bat dun nangnelo, pima la ke pap athok, sok-sang athok kali.

¹²La alangli kurusar along van nang po, la HEMPHU aphan kepilo pu angthek alangli chekip isi enpo, lapen isi kecho athok panongsi dovan athak phrinpo. Lake pap kepakak-i athok-lo.

¹³Lasonsi kurusar abang monit apap athok pajirpo, lapen alangliphan diyadetpo. Ahin ahim ke kurusar aphanlo, la sok-sang athok asonthot-lo.

¹⁴Moses aphan HEMPHU lahei Aron pilo.

¹⁵HEMPHU angno kangthir et ason kechetu thekthe pen ajok mane abang mathakrang pen pap klemlo pulote, alangli HEMPHU aphan isi kechetuthu athok biresak alo mate bi alo aju kavepin ejon athok pinangji. Kejor-kelangbom ador atengsi la pathik nangpo.

¹⁶Alangli kechetu nangji apreng chetuvek nangji lapen abat phankep pen phanni batdun nangji. La alangli kurusar aphan pinangji, lapen kurusar abang halabangso amonit apap athok pajirpo, lapen alangliphan diyadetpo.

¹⁷Mane jongsi mathakrang pen HEMPHU ahukum-heihei angbong isi bak ingdi pen pap klemlo pulote, alangli adai dolo lapen adai tu vek nangji.

¹⁸Kechetuthu athok kurusar aphan la pinangpo, biresak kalite bi alo ejon aju avepin nangji. La ador ke halaso ahut kejor-kelang ador atengsi pathik nangpo. Kurusar abang halabangso amonit kemathakrang pen kelet apap athok pajirpo, lapen halabangso amonit aphan diyadetpo.

¹⁹La ke halabangso abang HEMPHU abe kethur apap kechetuthu isi athok-lo.