Read Karbi LEVI 6 Bible Online

LEVI 6 - Karbi bible

LEVI 6

¹Moses aphan HEMPHU lahei Aron pilo.

²Mane abang jongsi akorte Israel atum kebirti-tekang amar kevoithuji aphan aninghanghe mate alangli pen ajehak amar kechonghupon mate alangliphan kepachobei

³mate kangbodet amar long seta chobeidet longle pu pen ajok HEMPHU aphan langplot si pap klemlo,

⁴mane abang lason pap klemlote, alangli adai dolo, lapen ahok-he atovar pen kelong amar an chetuthu nangji. Alangliphan adai kenep arni amat, ahemphu aphan bangso abang chevoi-etnangji, lapen phankep pen phanni abat pinangji.

⁵Mate alangli kechobei pen kechechak ason an chevoithu-et nangji, lapen la along abat ke phankep pen phanni bat dun nangji, la ke adai athok kepi arni si ahemphu aphan pi nangji.

⁶HEMPHU aphan kechetuthu athok alangli aju-kavepin abiresak alo kalite bi alo ejon kurusar along van nangpo. La anam ke halaso ahut kejor-kelang ador atengsi pathik nangpo.

⁷Kurusar abang halabangso amonit apap athok pajirpo, lapen bangso aphan diyadetpo.

⁸Moses aphan HEMPHU hukum pilo.

⁹Aaron lapen asomar aphan aber ketok kephrin athok-heihei Aron papitoilo. Isi kephrin athok jopangthang dovan along okok nangji, lapen me pamepmedet nangji.

¹⁰Anke pe-kanglit kechingchoi lapen pen-pangbeng ke-i akurusar abang dovan along me kephrin athek-lo ensi dovan adung bikokpo.

¹¹Anke alangli pe-ri chesele si mukam angtan anat Aron pen kepangthirtang adim along pondetpo.

¹²Dovan athak kedo ame thorkringver nangji lapen ame pamep longle det masi. Adapvang ta kurusar abang la along theng phrinver nangji, la athak kephrinji athok sik nangpo, lapen kejalang athok athu phrin nangpo.

¹³Dovan athak Me kaiketa pakarver nangji lapen pamep longledet nangji.

¹⁴Sok-sang athok aphan la aber Aron lahei helo. Dovan angno HEMPHU aphan Aaron aro akurusar inut abang sok-sang athok pajirpo.

¹⁵Anke alangli him aduk richikip isi lapen jangthu, lapen la athak hijung ensi la HEMPHU aphan kepanong-tang an dovan athak phrindutpo. Labangso athok angnim HEMPHU aphan aningpadok-lo.

¹⁶Lapen la ahin an ke Aaron lapen la asomar atumsi chopo; la thapkave ahim kangthir adimsi chonangji; latum la kechingrum apehem arlo si cho nangji.

¹⁷La thap patip nangnelo. La pen ajok Ne athok halatum apharman pilo; la ke isi kangthirnei amanlo, pap athok lapen adai athok asonlo.

¹⁸HEMPHU aphan kepajir adan along halatum apharman kevangji arni anta Aaron aso-asupomar atumsi choverpo. Kepajirtang kecho adan aputhak ke-ot abang aling, la kangthir ajakong pen ajok phangnodakpo.

¹⁹Moses aphan HEMPHU lahei,

²⁰inut Aaron aro pen kurusar kebat aphan aron-heihei pilo. Alangliphan kebat arni pen, alangli HEMPHU aphan isi athok, elin ahim aduk (kaike soksang adan kepi atengthot,) achitim isi adap lapen achitim isi abang arnikangsam pajir nangpo.

²¹La jangthu pen patip nangpo lapen phule pen dang nangji lapen bengsi sok-sang athok ason pajir nangji, laso angnim HEMPHU aphan aningpadok-lo.

²²Kevangji arni anta Aaron aro Kurusar Kethenei keplang abangsi laso athok pajir nangji. HEMPHU aphan isi athok asonsi la me pacho-et masi.

²³Kurusar keselam asok-asang athok chochedet nangji, kedo-anta me phrindut nangji.

²⁴Pap athok-heihei aputhak Aaron lapen asopomar atum aphan aron-heihei kepijisi

²⁵Moses aphan HEMPHU hukum pilo. Kephrin athok aphan pi kepathi adim, dovan anirep anat si pap athok pi pathi nangji. La ke kangthirpik athok-lo.

²⁶Pi athok kepi akurusar si kangthir-et adim, HEMPHU kedo A-pehem atikup along si cho nangji.

²⁷Badutame mate jat ason tame pi a-ok kepapho abang aling la kangthir-et ajakong pen ajok phangnodetpo. Kechepindeng ape-ari athak pi avi rolo tangte, la kangthir-et adim si pe-chok nangji.

²⁸Ok-ke-up alongle aphule ke paphuk-rai masi, lapen jongsi kangtangrak atasam pen kepinchong aphule pulote ingthi-etsi lang pen cham nangji.

²⁹Laso athok kurusar ahemtun pen pinsomar atum chotame; la ke ingthirpik-lo.

³⁰Bonta Pehem arlo aron pen pap kepakak-iji aphan keven avi api la cho nangnelo, la ke phrin-et nangpo.