Read Karbi LEVI 7 Bible Online

LEVI 7 - Karbi bible

LEVI 7

¹Kechetuthu adan-heihei aphan aron lahei helo, lake ingthirpik-lo.

²Labangso adan aphan kepi api ke kephrin athok pi kepathi adim dovan anirep anat si pathi nangji, lapen la avi dovan konaphli anat dung nangji.

³La athu kedo-an en-et nangji lapen dovan athak bat nangji; arme athu, aphek-angthin ketelom athu,

⁴ahambi along kechebon athu lapen angthin kemenei aphar pi nangji.

⁵HEMPHU aphan isi kecho athok-lo pura athu kedo-an kurusar abang phrin nangji. La ke kechetuthu adanlo.

⁶Kurusar ahemtun angbong sopinso atum la pachonang, bonta la isi kangthir adimsi cho nangji, pima la ingthirpik.

⁷Pap athok lapen Kechetuthu athok la sonni aphan kepudam isi aron do; Athok karkli akurusar abangsi a-ok chepahemphu longpo.

⁸Karkli abang akurusar si kephrin athok api areng cherailongpo.

⁹Longthu along kedang sok-sang adan mate phule pen ketun athok, Arnam aphan kepajir abang akurusarsi chepahemphu longpo.

¹⁰Bonta ketunte sok-sang adan, jangthu pen kepatiptang tame mate akekreng setame, Aaron aro akurusar atumsi chepahemphu longpo, lapen latum kechethak eteng isi pangripetpo.

¹¹HEMPHU aphan kejalang athok kepajir aron lahei helo.

¹²Laso athok jongsi inut amonit kero athok pura pajirlo pulote, karkli aphan kepiji api pen pen thap kavepin ahim, jit ajangthu pen kepangvuisi keselam ahim mate jit ajangthu kevit ahim mate jit ajangthu kepatip-ra keselam ahim pen pinangji.

¹³La apar ta alangli thap kedo ahim pajirpo.

¹⁴Alangli HEMPHU aphan isi kepanong adan ahin asontin pen isi si pipo: la pi avi ke-en lapen la dovan anat vi ke-arsi akurusar apharmanlo.

¹⁵Pi a-ok ke la kepathi a-arni amat chodet nangji; puthot an echet ta pahinhedet masi.

¹⁶Mane abang jongsi kechechak kechepachok mate amethang aning-kangsam adan kepiji pulote, la kepajir arni amat la kadokave cho-et nangli lapukali, bonta ahin an puthot adap seta chotame.

¹⁷Nithom arni an kepahin a-ok an me phrinthei nangji.

¹⁸la jongsi kethom arni cholo pulote bangpo kepi athok Arnam dengdelo. Laso athok alangli si kepilo pu lakhakhelo bonta la ingthirthelo pusi lakhapo, lapen badu seta la kecho aling abang la anam phopo.

¹⁹Ok jongsi pine kangthirthe amar pholote la chochedet nangpo bonta me phrindut nangpo. Badutame aron pen chepangthirtang abang ok chotame,

²⁰bonta badutame chepangthir-thepin pen la kecho abang Arnam arat angbong inut-lo pu lakhaponpe detpo.

²¹Lapen mane jongsi kangthirthe amar monit mate pi pen setame otdet aphi la chodet lote, alangliphan Arnam arat atum angbong pen inut-lo pu lakhakhe-detpo.

²²Moses aphan HEMPHU lahei aron,

²³Israel atum aphan pilo. Chainong, biresak, mate bi athu chonangnelo.

²⁴Apor ateng pen kethi api athu mate marat api kepathi a-ok athu chonangne, bonta la akaprek akam aphan enme tahai.

²⁵HEMPHU aphan kepi athok mane jongsi pi a-ok athu chodet pulote Arnam arat atum angbong inut-lo pu lakhakhe detpo.

²⁶Israel atum nahok-le do setame, latum vo mate pi avi kechoji aphan en nangne.

²⁷Mane jongsi labangso aron ingdilo pulote alangliphan Arnam arat-aso pu lakhakhelo.

²⁸Moses aphan HEMPHU lahei aron

²⁹Israel atum aphan pilo. Mane jongsi kejalang athok pulote la ajehak HEMPHU aphan isi kepanong adan ason vanpivek nangji.

³⁰An Kecho athok pura amethang ari pen la van nangji. Pi athu penpen aningthangta la HEMPHU aphan isi kepanong adan pura van nangji.

³¹Dovan athak kurusar abang athu me phrinpo, bonta aningthang ke kurusar apharmanlo.

³²Pi aphi akeng ar-e ahong ke vi lapen kejelang athok

³³kepajir akurusar aphan isi kepanong adan ason pinangji.

³⁴Pi aningthang ke isi kepanong adan ason lapen aphi akeng ar-e ahong ke isi kepanong adanlo, la Israel arat pen HEMPHU-si kehang-lo, lapen kurusar atum aphan pidetpo. Lahelo Israel arat atum kurusar atum aphan kevangji arni an ta kepinangjilo.

³⁵Lason helo HEMPHU aphan kepajir athok angbong ajehak Aaron apharmanta lapen asomar atum aphan kehodai arni piponlo.

³⁶Israel arat atum aphan labangso apharman athok pi nangji pu halabangso arni si hukum pilo. Lake Israel arat atum aphan kevangji arni an seta keklem pon nangji aron lo.

³⁷Kephrin athok-heihei, sok-sang athok-heihei, pap athok-heihei, kechetu athok-heihei, kehodai athok-heihei, lapen kejelang athok-hei hei aphan aron-heihei lahei helo.

³⁸Hadak kejejangtang ajo Sinai Anglongpi athak, Israel atum aphan Moses athok kepinangji pu kepu ahut HEMPHU alangliphan kepitang ahukum-heihei lahei helo.