Read Karbi LEVI 9 Bible Online

LEVI 9 - Karbi bible

LEVI 9

¹Kebat aron tangdet puthot arni, Aaron lapen asopomar lapen Israel ajalin atum aphan Moses hangpet-lo.

²Alangli Aaron aphan pulo, “Chainong aloso lapen aju-kavepin abiresak alo ejon ponnon, lapen lahei HEMPHU aphan athok pajirnon, chainong ke pap athok aphanlo, lapen biresak alo ke kephrin athok aphanlo.

³Anke Israel atum isi apap athok paponji aphan bi alo ejon lapen kephrin athok aphan ningkan isi achainong aloso ejon, lapen ningkan isi abiresak aloso ejon aju kavepin paponnon,

⁴lapen kejelang athok aphan chainong alo ejon lapen biresak alo ejon paponnon. Latum lahei HEMPHU aphan jangthu pen kepatip sok-sang athok penpen pinangji. Latum la klemvek nangji pima pini HEMPHU nang cheklangpo.”

⁵Moses kepi ahukum ateng latum Pehem athengno vanpet-lo, lapen HEMPHU aphan karchojisi kedo-an arat atum hadak chingrumpet-lo.

⁶Moses pulo, “Nangtum lahei keklemji aphansi HEMPHU hukum pilo, anke alangli kedo keturbong akethe-ang nangtum aphan nang-cheklangpo.”

⁷Anke alangli Aaron aphan pulo, “Dovan along damra, nangtum apap lapen rat apap kechamjile pap athok lapen kephrin athok pajirdam non. HEMPHU hukum kepi ateng laso athok rat apap kechamji aphanle pajirnon.”

⁸Dovan along Aaron damlo, lapen amethang apap athok aphan chainong aloso pathilo.

⁹Asopomar atum alangliphan vi vanpilo, lapen alangli richimun la along nimsi dovan akung anu along ajehak hilo, lapen ahin an ke dovan aling along la dung-et-lo.

¹⁰Anke dovan athak athu, ahambi-heihei, lapen angthin akemenei aphar Moses aphan hukum kepi ateng alangli phrinlo.

¹¹Bonta a-ok lapen areng ke mukam angtansi alangli phrinlo.

¹²Alangli amethang kephrin athok aphansi pi pathilo. Alangli sopomar atum alangliphan vi vanpilo, lapen alangli la dovan konaphli along dung-et-lo.

¹³Latum alangliphan pi aphu lapen akaprek athan ta pajirlo, lapen alangli lahei dovan athak phrinlo.

¹⁴Anke aphek-angthin alangli cham pangthirlo, lapen aphi akeng hongnita chamlo, lapen lahei dovan athak kephrin athok athak an phrinlo.

¹⁵Labangso aphi, rat athok-heihei alangli pilo. Rat apap athok aphan alangli bi ponlo, lapen la pathilo, lapen alangli methang apap athok aphan keklem asonthotsi la athok pajirlo.

¹⁶Alangli kephrin athok aphan pi vanlo, lapen aron ateng pen la athok pilo.

¹⁷Alangli soksang adan pilo, lapen chekip isi ahim aduk ensi dovan athak la phrinlo. (Lake kaike kephrin athok apar-si kepilo.)

¹⁸Rat atum akejelang athok aphan alangli chainong alo lapen biresak alo ta pathilo. Alangli sopomar atum alangliphan vi vanpilo, lapen la alangli dovan atok-phli along thok-lo.

¹⁹Chainong lapen biresak athu athan-heihei Aaron ke

²⁰pi aningthang athak si bat-lo, lapen la kadokaveta dovan along pon-et-lo. Alangli dovan athak athu phrinlo,

²¹lapen aningthang lapen aphi akeng ar-e ahong kurusar atum apharman isi HEMPHU aphan kepanong adan pura Moses aphan hukum kepi ateng pilo.

²²Aaron kadokave athok kepi pajut-et aphi, alangli ri rat aputhak chirungsi pahirjumelo, lapen nangsunlo.

²³Moses lapen Aaron atum HEMPHU kedo A-pehem arlo lutdamlo, lapen latum nangkebar ahut latum rat aphan ahirjume pilo, lapen kadokave arat aphan keturbong HEMPHU akethe-ang nangklang-lo.

²⁴Menmen amat HEMPHU me nangtoilo, lapen la kephrin athok lapen dovan athak athu athan-heihei cho-et-lo. Rat atum la thek-longsi, kadokaveta hangprak-lo, lapen halatum amahang longle patongbaksi ardomlo.