Read Karbi JEREMIAH 1 Bible Online

JEREMIAH 1 - Karbi bible

JEREMIAH 1

¹Laso aloh ke Hilkiah asopo Jeremiah keputang alam alakhalo, apo Anathoth arong inut akurusar la Benjamin alongri.

²Judah arecho, Amon asopo Josiah recho kecho krekethom aningkan ahut Jeremiah aphan HEMPHU ningjelo,

³lapen Josiah asopo Jehoiakim recho kecho ahut alangli laphan ningjethulang. Laso aphi alangliphan HEMPHU keningje abatai do-olo. Josiah asopo Zedekiah recho kecho ningkan kre-isi anta ningjebomlang. Halaso aningkan pho achiklo Jerusalem arat aphan ban pondet-lo.

⁴Neliphan HEMPHU pulo,

⁵“Nangphan chethe nangpipe aphrang Ne nangphan ingvaitang-lo, lapen nang mahang thekthe aphrang det-heihei amontri keplangji aphan ingvaitang-lo”.

⁶Ne thak-lo, “Muluk a-HEMPHU, kopisi keningje nangjima neli chinine, neli bi-onglang”.

⁷Bonta HEMPHU neliphan pulo, “Nang bi-onglang pu chepuri, bonta ne nangketoi arat along damnon, lapen Ne nangphan hukum kepi nangkepathantoi alingle thannon.

⁸Halatum aphan phereri, pima Ne nangkeraijisi Ne nanglong nangdunpo. Ne, HEMPHU si keningjelo”.

⁹Anke HEMPHU ari chephejeng-lo, neli ingtur nang-ot-lo, lapen neliphan pulo, “Arjutha, nang keningjevek nangji alam-heihei Ne nangpilo.

¹⁰Pini Ne nangphan det-heihei lapen recho arat-heihei aphuthak kehelang lapen kesanphlut, kepavir lapen kepave, kekimji lapen ke-eji ajakong nangpitang-lo”.

¹¹HEMPHU neliphan arjulo, “Jeremiah, nang kopi kethek-long-lo?” Neli thak-lo, “Almond arong arvo”.

¹²“Kalang-lo,” HEMPHU pulo, “lapen nelam-heihei kechekok kethek-longjisi Ne cholangding-lo”.

¹³Puthot neliphan HEMPHU pulo, “Kopi thekthu long-lo?” Alang neliphan arjulo. Neli thak-lo, “Nirep anat karklokbok aphumang thek-long-lo, lapen lapu anat la nangdungji dokok-lo”.

¹⁴Alang neliphan pulo, “Laso adet kedo-an aphuthak nirep pen akevir arklokbok-lo,

¹⁵Pima nirep pen adet kedo-an kevangjisi Ne hang-lo. Hala-heihei arecho atum Jerusalem anghap-heihei lapen adung la paisong-heihei along recho anghoi chebipo.

¹⁶Nerat aso aphan Ne adukpipo, pima latum pap klemtang-lo; latum Nephan otang-lo, akaprek arnam-heihei aphansi chothok rong-lo, lapen kumlin-heihei selamsi halahei aphan archolo.

¹⁷Chesiknon Jeremiah; damra Ne nangkepi ahukum an halatum aphan than dampetnon. Non halatum aphan phereri mate nang halatum along kedo ahut jasemet nangphan papherethuji.

¹⁸Arjutha, Jeremiah, laso adet kedo abangphutin Judah arecho atum, achakri atum, kurusar atum lapen rat atum anta nangbe thurji. Bonta la-heihei kekhang unji aphan pini Ne nangphan jakong nangpilo, nang isi paisong komchen arongsopi ason, ingchin anujok, lapen tam arpong ason plangpo.

¹⁹Latum nangphan parem un-elo, pima nangphan keraijisi Ne nanglong nangdodunpo. Ne, HEMPHU si pulo”.