Read Karbi JEREMIAH 10 Bible Online

JEREMIAH 10 - Karbi bible

JEREMIAH 10

¹Israel arat atum nangtum aphan HEMPHU nangkepi abirta arjutha.

²Alang pulo, “Akaprek akhei atum atovar-heihei dunri, sining-inghun angsong keprekjek angthek-heihei apot ningchepasiksak-ri, bang kaprek akhei atum pherepik-lo seta!

³Lahei arat adhorom ke ale ave. Nampi pen thengpi erong thulo; thengpi kethu atum ajohton pen la hong-lo.

⁴La rup lapen ser pen la top-lo. La kekrepkreji aphan la athak asak sak-lo.

⁵Lason akumlin-heihei ke thoithe aberi kedo vo kehung-i ketardong apeban amonit ason; Latum ningje thekthe, latum aphan rungpon nangji, Pima latum dam thekthe. Latum aphan phereri; Latum nangphan thangta pasung un-e, Lapen latum nangphan thang akeme nangklempi thekthe.”

⁶HEMPHU, Nang sonthot baduta ave; Nang jakong thepik, lapen Nang nong thepik lapen jakong thepik.

⁷Komatsi Nangphan man nang pipedetpo, kedo-an adet arecho atum ma? Nang ke man kelongji atheng-lo. Det-heihei arlengkere an angbong mate halatum arecho atum angbong puseta Nang sonthot baduta ave.

⁸Latum kedo-anta kemathatong thekthe atum lapen kejok-lu atum saidelo. Thengpi akumlin?

⁹La-heihei akumlin ke Spein arup pen Lapen Uphaz aser pensi bang-lo, Hemai akam saide; Kethekser kethak hepi ape lapen pe-ang ape pensi lahei pa-ilo.

¹⁰Bonta Nang, HEMPHU ke ahok Arnam, Nang ke kereng-et Arnam lo; lapen kedover arecholo. Nang ningthi lote, pirthe klemhur; Det atum Nang ning kethi chechak un-e.

¹¹Rat atum nangtum kethan nangji ke lahelo, pirthe lapen sining-inghun kethipthe a-arnam-heihei atum aphan pavir-etji. Pirthe athak latum nohokta dolongledetji.

¹²HEMPHU amethang ajakong pen pirthe pinchong-lo; abidi pensi Alang somindar pinchong-lo; lapen sining-inghun-heihei sangjailo.

¹³Alang hukum pen sining-inghun alang-heihei ingrong-lo pirthe kejut ahin pen Alang inghun-heihei vanlo. Arve kejang ahut Alang sining pabirlak-lo, Lapen apuru pen tomon nangtoilo.

¹⁴La thek-longsi monit atum matha tong thekthesi mong-loilo; kumlin-heihei keselam atum anta manghuphrong-lo, pima latum keselam a-arnam-heihei ahok-he lapen achethe ave.

¹⁵Latum ale ave lapen hijim nangji; lahei aphan HEMPHU ke-otpo ahut pavir etpo.

¹⁶Jakob a-Arnam ke lahei ason kali; Alang kadokave kepinchongpet abang-lo; lapen Israel atum amethang arat keplangji aphan Alang ingvailo. Jakongkethe HEMPHU helo Alang men.

¹⁷Jerusalem arat atum, nangtum aphan kompet-lo! Nangtum amar an chepangrumnon.

¹⁸Laso alongle pen nangtum aphan HEMPHU ingtan varphit-lo. Abangphutin ta avedetdetik-an Alang nangtum aphan nangsorlampo. HEMPHU si keningjelo.

¹⁹Jerusalem arat atum chirujolo, “Etum ko-an sonang-lo! Etum areng amek-heihei memelo. Etum mathalo lake isi chechak-un tahaiji pu!

²⁰Etum apehem-heihei var-et-lo; kepapring arri-heihei chebeng-ilo. Esomar atum anta kehelo dam-et-lo; Etum apehem-heihei keparjapji baduta avelo; Lahei kebeng ape-heihei kehingji baduta avelo.”

²¹Ne thak-lo, “Netum ajalin lupik, keja kelongji aphan latum HEMPHU aphan arjuje, la apotsi latum akam chunche, lapen rat aso atum chehijikjam nang-lo.

²²Arjutha! Birta nangletang-lo! Nirep anat isi arat thedung kehurisei dolo; La aron armu atum Judah arongsopi-heihei Serung kedo arongman paplang-etpo.”

²³HEMPHU, baduta amethang kejutji alam chechini-et-e, ne chini pame; amethang akai aphan baduta chekhangthip un-e.

²⁴Nang rat aso aphan pakengnon, HEMPHU; bonta netum aphan pasopik-ri mate ning kethi ahut netum aphan aduk piri; hala netum aphan akejut plangpo.

²⁵Nangphan karchoche lapen kedengde akhei arat aphuthak-le Nang ningthinon. Latum Nang rat pathilo, Latum netum aphan pavir-et-lo Lapen netum adet parusi olo.