Read Karbi JEREMIAH 11 Bible Online

JEREMIAH 11 - Karbi bible

JEREMIAH 11

¹HEMPHU neliphan pulo,

²“Keche-jok aloh ateng arjutha. Judah arat lapen Jerusalem arat aphan putha,

³abangphutin kechejok aloh ateng kekroithekthe atum an aphan, Ne HEMPHU, Israel a-Arnam si ahirjuno pitang-lo.

⁴Lasi kechejok aloh Ne halatum aphusar atum aphan Ijip adet pen kevan ahutsi halatum pen chejok-lo, athema halaso adet halatum aphan isi me akar asonsi plang-lo. Ne hukum kepi an ateng kekroiji lapen kepaklemtoijisi halatum aphan Ne pulo. Ne halatum aphan pulo, nangtum jongsi Nephan kroi lote, latum Nerat aso plangpo lapen Ne halatum a-Arnam plangpo.

⁵Anke halatum aphusar atum aphan Ne kechak ason halatum aphan klempipo, latum non kedo alongle along plang-opo.” Neli pulo, “Kalang-lo, HEMPHU.”

⁶Anke neliphan HEMPHU pulo, “Judah arongsopi-heihei lapen Jerusalem atovarpi-heihei along damnon. Hadak Ne birta pachethangnon lapen rat aphan kechejok aloh ateng alam halatum karjuji lapen kekroijile thannon.

⁷Halatum aphusar aphan Ijip adet pen Ne kevan ahut, Nephan kekroijisi latum aphan Ne pachere pamelo, lapen rat aphan nonpu-anta Ne pacheretoi-bomlang.

⁸Bonta latum arjuje lapen kroikre. La apar latum aning kai apar ingtangmusi. Laso kechejok kekroithekji aphan Ne hukum pilo, bonta latum kroimolo. La apotsi la along ketoktang an aduk halatum aphuthak Ne pilo.”

⁹Anke neliphan HEMPHU pulo, “Judah lapen Jerusalem arat atum Nebethurlo,

¹⁰latum aphusar atum keklem apap-heihei si klemlo, latum Ne kepu alam arjuje; latum akaprek a-arnam-heihei aphansi ardomlo. Halatum aphusar atum pen Ne kechetok akechejok aloh Judah lapen Israel ta ingditang-lo.

¹¹Lasi non, Ne, HEMPHU, latum aphan kepachere lahelo, latum aphuthak Ne kevir vanpo lapen latum chepajok un-elo. Latum kerap kelongji aphan Ne nat hangcharbu seta, latum aphan Ne arjujelo.

¹²Anke Judah arat lapen Jerusalem arat atum alangtum kethok kepajir a-arnam-heihei anat dampo, lapen kerap kelongjisi latum hangcharbupo. Bonta laso akevir kevang ahut halahei arnam atum pajok un-edetpo.

¹³Judah arat atum arongsopi ko-an ma kedo la an latum a-arnam-heihei dolo, lapen Jerusalem asor arongsopi atovarpi ko-an ma kedo la ansi latum kehijimmeme a-arnam Baal aphan kethokji adovan parjap-lo.

¹⁴Jeremiah Nephan nangchoningri, mate lahei arat apharman nanghangri, latum kesung ahut kerap kelongji aphan nanghang seta, latum aphan Neno chedendelo.”

¹⁵HEMPHU pulo, “Ne kechinghon arat atum kehingno akamsi klemlo. Latum Ne kardomhemthepi arlo kopi ajakong-lo kedo? Kechechak -heihei lapen pi athok kepajir pen ajok kevir khang unji putong latum kemathama?

¹⁶Ihut isi latum aphan arvo kechan ajit arong pusi irlo, athe keme pen plengset, bonta nonke sining kangder ason la arvo an Ne me keprindutji lapen aro an ing-lok-etji.”

¹⁷Ne, Jakongkethe HEMPHU si Israel lapen Judah aphan elo; bonta non Ne latum aphan kevir pensi therlo. La latum amethang aphuthaksi chevanlo, pima latum kechokche akam klemlo; Baal aphan athok-heihei kepi pen ajok latum nephan Nening pakang-lo.

¹⁸Neli hotur atum nelipran karmutji alam HEMPHU nethan-et-lo.

¹⁹Neli ke kethuji aphan kepon abiresak asonlo, lapen latum bidi kanglimsi neliphan klemlo, pu neli chechininepinlo. Latum pulo, “thengpi arong rengseng ahut-le pi pakrep lonang; laphan pathilonang, lalote baduta laphan kaike aphan chematha damdelo.”

²⁰Anke neli thak-lo, “Jakongkethe HEMPHU, Nang ke ahok kangsai a-Bang-lo, monit atum kematha lapen kemunthi-heihei Nang asat enlo. Neli lam nangridengsi hodaidet-lo; lasi lahei arat aphuthak Nang alar kehui nephan pathekdunlong-non.”

²¹Anathoth amonit atum ne kethi aphan aninghang-lo, lapen neli jongsi HEMPHU abirta pachethangbom pulote, latum neliphan pathilotji pusi latum neliphan thanlo.

²²Lasi Jakongkethe HEMPHU pulo, “Latum aphan Ne aduk pipo! Ron along latum ariso atum thipo.

²³Anathoth arat aphuthak kevir kevanji Ne isi apor thik tang-lo, lapen halaso arni nanglelote latum baduta reng-longle.”