Read Karbi JEREMIAH 12 Bible Online

JEREMIAH 12 - Karbi bible

JEREMIAH 12

¹HEMPHU, ne jongsi ne kepho alam Nang ingno vanlote, Nang chok-lim pu aporman pijima? Kalang-lo, ahok akangsai alam Nangphan ne arjuvek nangji. Kopi athesi kehingno amonit atum lapu-an chingthurloma? Kopi apotsi ahok-he amonit atum keklem akam kechunbomloma?

²Latum aphan nang-elo, lapen latum angkur chesak-lo; Latum thesi athe pathelo. Latum kaita Nangphan keme chethanver, seta latum Nangphan matha-o-e.

³Bonta HEMPHU, Nang neliphan chini, kopisi neli keklemma lapen Nangphan neli ko-an chinghonloma Nang thek-long-et. Biresak kethuponji asonle Lahei kehingno amonit atum aphan chethurponnon; Kethuji apor latum aphan nangleletik hondingnon.

⁴Netum alongle ni ko-ansi kekrengtaiverpo, lapen ahiditin abap ko-an chekeduverpo? Pi lapen vo atum thibomlo pima netum arat kehingno apot-lo, “Etum keklem Arnam ethekdunde,” pu kepu arat atumlo.

⁵HEMPHU pulo, “Jeremiah nang jongsi monit aphan kangplong lakhui pulote, nang kopusonsi lahei pen kangplong chepate unpo? Nang jongsi hidi tar-tar ajo arjapding thekthe pulote, Jordan akung a-tukong ajo nang kopusonsi karjapthekpo?

⁶Nang korte, nangtum asor abangphu amatsi nangphan chobeitang-lo; nangphan ketengkheng along latumta chelang dunlo. Latum jirpo hijan ason alam-heihei nangphan than seta, latum aphan chikiri.”

⁷HEMPHU pulo, “Ne Israel aphan o-tang-lo; Ne kangvaitang akhei aphan Ne dengdelo. Halatum hotur ajakong arideng Ne kechinghon arat aphan hodaidet-lo.

⁸Ne kangvaitang arat atum nebethurtang-lo; ingnam ajo ahingho asonsi latum Nephan ingnorlo, lasi Ne latum aphan hijimlo.

⁹Ne kangvaitang arat atum ke kechonepji pu avomu kekompet avo asonlo. Kecho-kejun along kepavangjile marat api-heihei aphan phanon!

¹⁰Ongdung bang adet kepangri atum Ne drakha aberi pavirlo; Ne hidi latum dong-et-lo; latum kelangmeme Ne hidi pasamphridang-lo.

¹¹Latum la isi kejejangtang ajo pinchongtang-lo; Ne ingno la samphridang-lo. Det adang an sangtimili plang-lo, lapen baduta mathathepin.

¹²Sangtimili kangtui alongle ajo an monit atum vangsi inghu pon-et-lo. Det adang an kepavirjisi Ne ron toilo; Baduta ingsamjin pen dolong-le.

¹³Nerat atum sok-tipli rik-lo, bonta ingsu abapsi rot chot-lo, latum klem chepaduk-lo, bonta thangnat ta long-le. Pima Nening kethipik ajok latum asok anta Pathethedet-lo.”

¹⁴HEMPHU pulo, “Nerat aso aphan Ne kepi alongle Israel adung atum kepavir aphuthak Ne kepuji dolang. Kephurphlut angkur asonsi amethang adet pen kehingno atum aphan Ne pon-etji, lapen halatum arideng pen Ne Judah aphan pajok.

¹⁵Bonta halatum aphan Ne pon-et aphi, halatum aphuthak Ne jinsoji; akheitin aphan amethang alongle lapen adet along Ne vanthuji.

¹⁶Latum jongsi aning kedo-an pen Nerat aso atum dhorom deng-lote, lapen ‘HEMPHU reng-lo ason’, semetang lote, ephong Nerat aphan Baal amen pen seme kepatang ason latumta Nerat aso plangpo lapen chingthurpo.

¹⁷Bonta jongsi baduta adet tame kroikre lote, Ne laphan helang-etpo. Ne, HEMPHU si keningjelo.”