Read Karbi JEREMIAH 13 Bible Online

JEREMIAH 13 - Karbi bible

JEREMIAH 13

¹Dam pen ne methang aphan ajehak thihek ape-kanglit kepanam damjisi ne pulo, lapen lahei nepachingthangtoilo; bonta neliphan lahei lang pachamchetoilo.

²Lasi lahei neli namlo, lapen chongvailo.

³Anke puthot neliphan HEMPHU ningje thusi pulo,

⁴“Euphratis aroi anat damra arlong angkep arlo pe patudamjoinon.”

⁵Lasi neli damlo lapen lahei Euphratis adung patujoilo.

⁶Penang an aphi neli Euphratis anat kedamthuji aphan nepulo lapen pe pa-endamtoilo.

⁷Lasi neli damthulo, lapen neli lahei kepu adim thek-long-lo, lapen neli thek-long-lo lahei rak-et-lo, ennopinlo.

⁸Anke neliphan HEMPHU puthot nepulo,

⁹“Lasonthotsi Ne Judah lapen Jerusalem anekethe pavirpo.

¹⁰Lahei kehingno amonit atum aphan kroimolo. Latum aphrang asonsi aning ingtang-lo lapen hingnolo, lapen kaprek arnam-heihei aphan archolo lapen ingduk-lo. La apotsi latum laso ape kethi ason plangpo, la ennopinlo.

¹¹Pe kethi evam kechekok aphan thikchit asonsi Nerat aso Israel lapen Judah atum Nephan nebamhetverji aphan Ne ninghang-lo. Ne la keklem ke latum Nerat keplangji aphanlo, lapen latum Nephan kero lapen Nemen anong vanpo; bonta latum Nephan kroimolo.”

¹²Neliphan HEMPHU pulo, “Jeremiah, Israel arat aphan punon, drakha ahor atibuktin drakha ahor papleng nangji. Latum thakpo, atibuktin drakha ahor kepaplengset nangji thek-lo.

¹³Lason pulote, latum aphan thannon, Ne, HEMPHU laso adet kedo arat aphan hor ingrithamthetik hor pen paplengsetpo: Recho atum, David aso-asu, kurusar atum, montri atum lapen Jerusalem arat kedo-an talo.

¹⁴Anke tibuk kechardengrai asonsi isi pen isi panghangpo, arleng kesar, riso, kadokave aphanta kangjinso avelo, kelang-ai avelo, mate latum aphan kepathiji pen kangjinso nephan khangkhelo.”

¹⁵Israel atum, HEMPHU ningjelo! Chepabihek-ra, Alang lam arjunon,

¹⁶HEMPHU kangting vanve ako, lapen inglongpi-heihei athak patekungke ako; nangtum nang ning kechethe akethe-ang ingtingthipthe ako, HEMPHU nang Arnam aphan man pinon.

¹⁷Nangtum jongsi alam arjuje lote, nangtum anekethe apot ne chirujoipo; nening hodaksi chirupo, lapen nemekri lithorpo, pima ban kepon asonsi HEMPHU arat aphan pondetpo.

¹⁸Neliphan HEMPHU pulo, “Recho lapen apei aphan recho anghoi pen pahirnon pima halatum aphu pen kelangmesen recho aphutup klotang-lo.

¹⁹Nitur a-Judah arong-heihei aphan kompet-lo: Baduta halatum along dam un-elo. Judah kedo-an arat aphan ban pondet-lo.”

²⁰Jeremiah langtha! Nang hotur atum nirep pen hirsi vangbomlo! Nang kechiki arat komat-lo?

²¹Nang jirpo pu kematha abang nangphan tengkheng tang-lo, lapen nangphuthak pangribang aphan nang kopisi kemathapo? Arloso aso mahang kepathek asonsi nang sopikji.

²²La kopi athesi plang poma pu nangtum arjulote, kopisi nangpe nangri ingrak-ilo lapen nang langrem lote la nang pap kepherememe apot-lo pu thakdunnon.

²³Areng ke-ik amonit areng along chelarthekjima, mate bongkrui atokbor chelarthekjima? Latum un pulote, nang keklemkle pin atum kopima kechok pen kehingnosi chelar un-rongpo.

²⁴Sangtimili ajo atomonle sok anar kepangjar asonthak-thaksi HEMPHU nangtum aphan papratseipo.

²⁵Alang pulo, lake nangtum akopailo. Lahelo nangtum pen Alang keklemji kephar akamlo, pima nangtum Alangphan tengnetang-lo lapen ahok-he arnam-heihei aphan chikitang-lo.

²⁶HEMPHU amethangsi nangtum ape-ari oipo, lapen patherakpo.

²⁷Alang kehijim akam nangtum keklem Alang thek-long-lo. Inut amonit adung bang apiso aphan kar-i mate losei alo api aphan kar-i asonsi nangtum inglong-heihei lapen hidi-heihei along ahok-he a-arnam aphi phi kehungdun Alang nangthek-long-lo. Jerusalem arat atum, nangtum kevirlo! Nangtum komantusi ingthirjilangma?