Read Karbi JEREMIAH 14 Bible Online

JEREMIAH 14 - Karbi bible

JEREMIAH 14

¹Akhim aphuthak HEMPHU neliphan pulo,

²“Judah ke chirukong-lo, la arongsopi-heihei thibomlo. La arat atum ningduksi tilailo, Lapen kerap kelongjisi Jerusalem hangjolo.

³Keplang atum lang kepasokji abang toilo; latum langtuk damlo, bonta lang longledet-lo. Ning kerun lapen kemanghusi Latum amahang chedip-lo.

⁴Pima arve avedet apot-lo, lapen longle krengtailo, sai tiki atum aning se cholong-lo; latum amahang chedip-lo.

⁵Hidi ajo thijok api kephimirak aso aphan che-o tekang-lo, pima latum a-an ave.

⁶lapen ingnam agadha anglong chun-ang athak arjapsi sirung nangnaksi achethe vang-haha; la amek klarkle pima rengseng abap ave.”

⁷Nerat atum nenat hangjolo, “nelitum apap-heihei le ebok seta HEMPHU neraptha, Nang kechechak ateng. Netum Nang pen ongdung abatai suilo; Netum Nangphan langplotsi pap klemlo.

⁸Nangphansi Israel aning chethe chot-lo; Nang kopi athesi nelitum adet along Kechinine abang plang-loma Ningve isinat kesangchot abang nangnak?

⁹Kopi apotsi Nang menmen kepondet amonit nangnak-lo, kerapdunji ajakong kave aron aso asonlo? Chenamsi HEMPHU Nang nelitum along do! Nelitumke Nang rat asolo; Nelitum aphan neli-ori.”

¹⁰Lahei arat aphan HEMPHU pulo, “Latum Ne pen kekatji aningdok-lo, la-pen latum amethang chekhang un-elo. Lasi Ne latum aphan Ne ning ingsamse. Latum kehingno keklem alam Ne chematha damji lapen halatum apap-heihei apot Ne adukpiji.

¹¹Neliphan HEMPHU pulo, “Lahei arat aphan keparapjile Nephan ardomrinon.

¹²Latum an hum seta, latum aphan kerapji aphan Neno chedende; lapen latum Nephan kephrin athok-heihei lapen sok-sang athok-heihei van seta, latum aphan nening ingsamse. La alar ron along latum aphan Ne pathiji lapen kangchir, lapen keso pen pathiji.”

¹³Anke neli thak-lo, “Klem un HEMPHU, Nang chini, rat atum aphan ron ave lapen kangchir ave pusi montri atum thanlo, pima Nangsi chechak-lo tangho, latum kepu, nangtum det ningkangsamsi dochotji pu.”

¹⁴Bonta HEMPHU thak-lo, “Montri atum Nemen pen pachobeilo; Ne latum aphan toite, lapen latum aphan thangnat ahukum pipe mate lam etheta paningje toite. Latum akethek-long alam-heihei Ne penle kevang kali; latum kethanmek alam chot.

¹⁵Ne, HEMPHU, ketoite amontri atum Ne men pen laso adet ron ave, ingchirche pu kethanmek atum kopi plang poma Ne nangthanpo, latum aphan ron lapen kangchir pen Ne pathipo.

¹⁶Latum kepu arat aso aphanta lasonthotsi pathipo. Latum abang arpum-heihei Jerusalem atovarpi-heihei along varchopo, lapen hadak latum aphan kepipji abang avedetpo. Lake kadokave aphan seta plangpo, latum apiso aso an aphantalo. Halatum akehingno apot Ne latum aphan anam pachepipo.”

¹⁷Nening ke-oi alam rat aphan kepathantoijisi neliphan HEMPHU hukum pitang-lo: “Ajo-nerlo ne mekri alang palilapnang, ne kechiru pahamhedetnang, pima nerat aso atum areng amek arnukpik-lo lapen areng sopik-lo.

¹⁸Hidi-heihei kelangdamji neli kebar ahut, ron along kethi abang arpum-heihei neli thek-long-lo; rong-heihei neli kedam ahut monit atum kangchir lapen kethi neli thek-long-lo. Montri atum lapen kurusar atum, amethang akam cheklembom, bonta latum kopisi keklemma latum chechinine.”

¹⁹HEMPHU, Nang Judah aphan obup khangjang-loma? Zaion arat aphan Nang hijimloma? Ningkangsam netum rilo, bonta thangnat akeme vangvelo; Netum kemeji aphan ning chethelo, Bonta la alar kepherememesi vang-lo.

²⁰Nangphan langplotsi netum pap klemlo, HEMPHU; netum methang apap-heihei lapen netum aphusar apap-heihei chekobirlo.

²¹Nang kechechak ason chemathatha lapen netum aphan patherak-ri. Jerusalem aphuthak nongjuno vanri La Nang adak-atur anghoilo. Netum pen Nang kechejok aloh phririnon.

²²Det-heihei akumlin arve vanthekthe; sining-inghun amethang amat ke arve paklothekthe. Nang netum a-Arnam HEMPHU aphansi Ning chethelo, Pima Nangsi lahei keklem abang-lo.