Read Karbi JEREMIAH 15 Bible Online

JEREMIAH 15 - Karbi bible

JEREMIAH 15

¹Anke HEMPHU neliphan pulo, “Moses lapen Samuel le ladak nephan arjapther pen choningrikrung seta, lahei arat aphan Ne kangjinso paklangklelo. Latum padam nang, latum ne mek angden pavedet lonang.

²Halatum kodaksi kedam nangpo pu nangphan nang arjulote, Nesi kepulo, pu thakdunnon. Halatum kedam adim along, Ajehak atum keso pen thisi virpo! Halatum konatma kedam adim ajehak atum ron pen thisi virpo! Halatum konatma kedam adim Ajehak atum kangchir pen thisi virpo! Halatum konatma kedam adim Ajehak atum kevirji aphan pondetpo!”

³Ne, HEMPHU, latum sonphli kephere-meme ason phonangpo pu phartang-lo: Latum ron along thipo, latum arpum-heihei methan atumsi chethurponpo; lahei vo atum chopo, lapen ahin an marat api atumsi chopo.

⁴Latum aphan thek-longsi pirthe adang adet atum phere thirikjokpo, pima Hezekiah asopo Manasseh alangli Judah arecho kecho ahut Jerusalem along keklem apot.

⁵HEMPHU pulo, “Jerusalem arat atum, nangtum aphan komatsi nangjinso poma, lapen nangtum aphuthak komatsi ningdukpoma? Nangtum kosonlo pu karjuji aphan Komatsi ajir pading haipoma?

⁶Nangtum Nephan Nedengdelo, la apotsi neri chirung-lo lapen nangtum aphan pangje-ilo pima Nening kechekhangji lak-huilo.

⁷Det kedo arongtin aphan sok anar ason Ne tomon nangpajapji. Ne nangpavir tang-lo, Nerat atum, Ne nang somar pathitang-lo. Pima nangtum kehingno atovar-heihei che-o-e.

⁸Talo asangti amu apar det along hemepi ongmuji. Nangsomar atum thechit arta ahut Ne pathilo lapen latum apei sung-lo. Nening kepung lapen kepherememe pen halatum aphan menmen Ne pathilo.

⁹Asomar bangthroksi kepangbo apei kreptaksi achethe vang-hahalo. Bangpi aphan anerlo ke ajo plang-lo; Bangpi theraknang-lo, lapen aning keso cholong-lo. Kerenglang atum aphan Ne nang hotur atum nangpathitoiji. Ne, HEMPHU si keningjelo.”

¹⁰Neli ko-an kelangmeme amonit loma! Kopisi neliphan ne pei dak pirthe pahacheloma? Det along abangphutin pen ne chebohongnang lapen lam kechedannang. Neli badu aphan tangka paramre lapen choramre; seta bangphutin ta neliphan ne ingtonrilo.

¹¹HEMPHU, ne jongsi nangliphan ingdukpameme pulote, lapen jongsi ne hotur atum kesung lapen ning-oi ninglak ahut halatum aphan nang ingno ne nang choningriredet-lo pulote, halatum akangton ateng paplangnang.

¹²(Baduta ingchin beng un-e, jasemet ke nirep angchin la tam pensi kepangvui.)

¹³Neliphan HEMPHU nepulo, “Det adang nerat aso atum pap-heihei apot aduk kepiji ahotur atum aphan Ne toisi akhi adat an papon-etpo.

¹⁴Halatum kechininepin adet ahotur aphan Ne pangdukpo, pima Ne ning kethi lake me ason, lapen la kaike mepmelo.”

¹⁵Lapen neli pulo, “HEMPHU, nangli chini, neliphan chemathatha lapen neliraptha. Neliphuthak keche-nek atum aphan langdingrinon. Chemathatha, nangli joinesi neli ington cholong-lo.

¹⁶Nangli neliphan pulo, lapen nangli lam athetin arjulo. Nangli longsi neli dolo, Jakongkethe HEMPHU, lapen nangli lam neli ning arong lapen kechehok pen plengset-lo.

¹⁷Bang kaprek pen kangnek keningjelok neli apor pathonthedet-lo. Nangli hukum-heihei kekroijisi neli inutpetsi chedolo, lapen ning kepung pen plengset-lo.

¹⁸Kopisi neli kesung phonangver loma? Kopisi neli reng amek me un-edet-loma? Kopisi lahei menodak-loma? Barla ahut kekrengtai arong ason neliphan nangli nelining parunji ninghangma?”

¹⁹Laso aphuthak HEMPHU nethak-lo, “Nang jongsi nangchevoilo pulote, Ne nangphan nangdengji, lapen puthot Ne ban plangthupo. Amo kevangve malomso abirta kepachethang alar nang Ne montri plangthupo, lapen halatum along nang dam jokphlotpo.

²⁰Halatum angno nangphan Ne isi tam angkleng arpong ason paplangpo. Latum nangbe thursi chedanpo, bonta latum nangphan un-elo. Nangphan keraijisi lapen kepajokvanjisi Ne nanglong nangdodunpo.

²¹Kehingno lapen kephangno atum ajakong pen Ne nangpajokpo. Ne, HEMPHU si keningjelo.”