Read Karbi JEREMIAH 17 Bible Online

JEREMIAH 17 - Karbi bible

JEREMIAH 17

¹HEMPHU pulo, “Judah arat atum, nang pap isi ingchin akolom pensi toktang-lo; la nang ning arlo bor-arlong angchun pensi hong-lo lapen nang dovan-heihei ano along pabontang-lo.

²Nang rat atum dovan-heihei along lapen arnampi Asherah aphan thengpi kelirseng arongtin, ha inglong angsong lapen inglongpi aklam along keparjap angthek-heihei aphan archolo.

³Lapen Ne, nang hotur atum aphan nangkhi lapen nangdat an papon-etji pima det adang bithe nang pap-heihei keklem apot-lo.

⁴Ne nangkepi alongle nang-o nangpo, lapen nang kecheninepin adet nang hotur aphan nang ingduk nangji, pima nening kethi me ason, lapen la kaike akar doverpo.”

⁵HEMPHU pulo, “Ne pen kesui lapen monit aphan lapen kethinangji amonit ajakong aphan kechiki abangphan Ne khindeji.

⁶La sangtimili ajo abap artu ason, la kekrengtai ajosi thelo, ingti alongle ajo ke thangnatta arong vangve. Thangnat akemeta la aphan vangvelo.”

⁷“Bonta bangso aphan Ne pahirjumeji Nephan kechiki abangphan.

⁸La langjeng akung ke-e athengpi arong asonpo, aro lang anta ledamlo. Kekreng abotor vang seta la pherere, pima la arvo-heihei lirsengver; Arve kave ahut ta la matha nangne; La athe pathebomji.

⁹Monit aning komatsi chini un? La asonthot kechobeithek pen keplengset ke avelo; La kemeji aphan keso tan-ongchot.

¹⁰Ne, HEMPHU, monit aning pherai, lapen monit aning asat enlo. Abangphutin kedo-kethak ateng Ne klemji, La keklem atengsi langji.”

¹¹Ahok-he atovar pen tangka kelong abang ke kepatitepin pen aso kepavang avo asonlo. Achethe jutje ako la akhi chepangbo-etji, lapen kejut ke la thangta kalidetji, bonta la inut akelupik-lo.

¹²Etum a-Kardomhemthepi ke isi adak-atur recho anghoi ason, kecheng penta inglongpi angsongsi arjapther.

¹³HEMPHU, Nangphansi Israel atum ningchethelo; nangphan ke-o abang aling aphan patherakdukpo. Latum sangti aduk ajo amen ketok ason Ave dapprangji; Pima latum Nangphan nang-obup-lo, HEMPHU, langkereng atiri.

¹⁴HEMPHU neli pamenon lapen neli ok rengmesenpo; neli pajoknon, lapen neli jokvanpo. Ne kero abang Nang helo.

¹⁵Rat atum neliphan pulo, “HEMPHU akether non konat-lo? Lahei Alang non paklem lonang!”

¹⁶Bonta, HEMPHU, latum aphuthak kevir kevangji aphan neli pupe; ha-latum aphan isi kesung apor kele neli ninghanghe. HEMPHU Nang la chini.

¹⁷Neliphan kepherememe pa-plang-ri; kesung kevang ahut Nang helo kejokvan adimlo.

¹⁸Neliphan kechenek abangphan patheraknon, bonta neliphan nepajoknon, HEMPHU. Halatum aphan kephere pen paplengsetnon, bonta neliphan paphereri. Halatum aphuthak kevir vannon lapen beng-inon.

¹⁹Neliphan HEMPHU pulo, “Jeremiah, damra Judah arecho kelut rat anghap along Ne birta pachethangnon lapen rongsopi obupnon, anke along kaprek Jerusalem anghap-heihei along damnon.

²⁰Recho atum lapen Judah arat atum an lapen lahei anghap kelut Jerusalem along kedo abangphutin aphan thannon lapen Ne kepu alam parjunang.

²¹Thannon, latum jongsi achethe chinghon pulote, latum kesang arni anghor ponpedet nangji. Jerusalem anghap-heihei along pen latum thangnat ta palut ponpedetnangji.

²²Mate kesang arni hem pen thangnat ta cheponpedet nangji. Kesang arni latum kam klemkledet nangji; latum la isi kangthir arnilo pu talon nangji, aphusar atum aphan Ne hukum kepitang ason.

²³Latum aphusar atum Nephan Nelam arjuje mate ano chedende. La alar aning chepangtangrong; latum Nelam kroikre mate Ne pen charlile.”

²⁴Laso arat atum aphan thannon, latum Ne hukum an kroipet nangji. Kesang arni latum laso arongsopi anghap-heihei anghor pen lut-ledet nangji. Kesang arni latum isi kangthir arni pu talon nangji, lapen ajat akam ta klemkledet nangji.

²⁵Anke halatum recho lapen arechoso atum-heihei Jerusalem anghap lutpo lapen David recho ajakong kelong asonthot longpo. Judah lapen Jerusalem ron ahemkonglong lapen athak ardonpo lapen Jerusalem arongsopi kaiketa rat plengsetverpo.

²⁶Judah arong-heihei lapen Jerusalem adung-arei arong pen rat atum vangpo; Benjamin alongri pen, inglong akeng-ri-heihei pen, inglongpi akeng-ri-heihei pen, lapen Judah arlo nitur ahin pen rat atum vangpo. Kephrin athok lapen dan-heihei, sok-sang adan, hijung, kero adan-heihei ta latum Ne kardomhemthepi along vanpo.

²⁷Bonta latum Nephan kroivek masi lapen kesang arni isi kangthir arni pu talon masi. Laso arni latum Jerusalem anghap-heihei pen anghor ponpedet masi, jongsi latum klem lote, Ne Jerusalem anghap-heihei me keidutji. Jerusalem, rechohem-heihei anta me cho-etji, lapen baduta la pamep un-edetji.