Read Karbi JEREMIAH 18 Bible Online

JEREMIAH 18 - Karbi bible

JEREMIAH 18

¹Neliphan HEMPHU pulo,

²“Tibuk kethip abang ahem damnon, hadak nangphan birta nangpipo.”

³Lasi hadak neli damlo, lapen kongtelong adang along tibuk kethip abang kam keklem thek-long-lo.

⁴Isibak amar keselam chok-limle pulote, alangli inghan endetsi akaprek pine selamthupo.

⁵Anke neliphan HEMPHU pulo,

⁶“Inghan aphuthak tibuk kethip abang keklemtang asonsi Israel arat aphan Ne keklemji jakong avema? Tibuk kethip aridengsi inghan kedo asonthot nangtumta neridengsi dolo.

⁷Apor aling seta Ne kehelangji pulote, mate badu akhei mate recho arat aphuthak pavirji pu seta,

⁸aphi halaso adet latum kehingno pen suilote, Ne keklemji pu keputang alam Ne klemklelo.

⁹Ahin kaprek jongsi Ne badu adet tame mate recho arat setame ke-eji mate kekimji pulote,

¹⁰bonta halaso adet ne lam kroikre lapen kehingno klem pulote, Ne kopima keputang keklemji ason klemklelo.

¹¹Non, Judah lapen Jerusalem arat aphan thannon, ne halatum abe thursi latum aphan aduk kepiji chesik-lo. Halatum aphan pap kechinglukung akai kedoji pangtonkoknon halatum tovar lapen keklembom akam-heihei pachelarnon.

¹²Latum nangthakpo, ‘Kali, kopi athesi netum kechelarnangpo? Netum aning chepangtangkoisi doji, lapen netum aningkehang kehingnosi dobomji.’”

¹³HEMPHU pulo, “Lason aphrang plang-loma adettin aphan arjunon. Israel arat atum isi kepherememe akam klemtang-lo!

¹⁴Lebanon alongbui aphuchong ar-e kelok avedet chethanma? La inglongpi alangjeng-heihei kekrengtai chethanma?

¹⁵Seta Ne rat aso atum nephan tengnedet-lo; latum kumlin-heihei aphansi hijung thorlo. Latum kedam nangji atovar latum patekung-lo, latum tovarban-heihei damdelo. Latum angthek kave atovar-heihei si damlo.

¹⁶Laso adet latum pherememe pinchong-lo, kaike aphan pahijimlo. Tovar kedam atum an thek-longsi thirik-lo; Latum manghuphrongsi angphun partingpo.

¹⁷Ahotur atum angno Ne rat aphan papratseiji, nihang atomonle longle aduk kepangjar ason. Latum aphan Ne panungkukji, Kevir kevang ahut latum aphan Ne rapdundelo.”

¹⁸Anke rat atum pulo, “Jeremiah aphan eli pine klemlonang! Ekepin-khatji aphan kaita kurusar atum do, ethan-pareji aphan arleng kere atum do, lapen Arnam abirta kepachethangji aphan montri atum do. Alangliphan bok lonang, lapen alangli kepu aling arjunangnelo.”

¹⁹La apotsi neli ardomlo, “HEMPHU, neli kopima kepu no chedentha lapen ne hotur atum neliphan kopisi kepuma arjutha.

²⁰Keme alar kehingno haidetjima? Latum neliphan kepajangthotjisi isi hilik hut-lo. Chemathatha, neli kopusonsi nangli long vang-loma lapen halatum apharman ningjeloma, anke nangli halatum aphan ning thithelo.

²¹Bonta non, HEMPHU, latum asomar kangchir pen pathinang. Latum ron along pathinang. Sarpimar atum apenan lapen asomar pavirnang! Pinso atum keso pen pathinang, lapen risomar atum kechedan ahut pathinang.

²²Pachererepin pen halatum ahem kekurukjile kephangno atum toinon; kephere pen latum pachirujo lonang. Latum nephan kepajangthotjisi hilik hut-lo, lapen nekenepjisi pham tot-lo.

²³Bonta, HEMPHU halatum neliphan kepathiji asai an nang chinilo. Halatum kehingno mate halatum apap diyari. Latum keremdetjile varnon, lapen nangning kethi ahut-le latum aphan otnon.”