Read Karbi JEREMIAH 19 Bible Online

JEREMIAH 19 - Karbi bible

JEREMIAH 19

¹Inghan atibuk kenamdamjisi neliphan HEMPHU nepulo, Alang neliphan ajehak arleng kesar lapen ajehak arta kedo kurusar nelilong kepaponjisi nelipulo.

²Lapen Hinnom Arlok anat an Tebuk-achet Anghap pen nepadamtoilo. Hadaksi Alang nekepiji abirta neli pachethang nangji.

³HEMPHU neliphan paputoilo, “Judah arecho atum lapen Jerusalem arat atum Ne, Jakongkethe HEMPHU, Israel a-Arnam kepu nangji alam arjutha. Laso adim ne lapuson akevir vanji la karjulong atum anta munthinangji.

⁴Ne la klemji, pima rat atum ne-obup-lo lapen latum lapen aphusar atum lapen Judah arecho atum thangnat ta chininepin akaprek a-arnam-heihei aphan ladak athok-heihei kepi pen ajok laso adim pasa-urlo. Laso adim latum adai kavepin arat avi pen paplengset-lo.

⁵Lapen latum asomar atum aphan kephrin athok kepijisi Baal aphan dovan parjappilo. La keklemji aphan Ne hukum pipepin; la nening ta matha damde.

⁶La apotsi, laso adim Tophet mate Hinnom Arlok pu kehanghedetji apor nangle tang-lo. La alar, laphan kethu-kethat Arlok pusi chethangpo.

⁷Laso adim Judah lapen Jerusalem arat akemang an, Ne pachunchedetji. Latum ahotur latum aphuthak pahaidetji lapen ron kechedan along abang arpum Ne vo lapen marat api atum a-an ason pipo.

⁸Ne laso arongsopi aphuthak lason akevir vanji, tovar kehelat abangphutin thirikjokji lapen mong-loiji.

⁹Hotur atum rongsopi kompetji lapen la rat aphan kepathiji aphan bor-iji. Kekompet lapu an pherememeji, rongsopi arlo kedo arat atum lahin lahin checho seroiji lapen osomar aphan anta chechoji.”

¹⁰Anke neli long nangkedun amonit atum angno tibuk kangthuphunji aphan neliphan HEMPHU nepulo,

¹¹lapen halatum aphan Jakongkethe HEMPHU si neliphan pathantoilo, “Laso arat lapen laso arongsopi aphan Ne ingthuphunji, lapen la ke laso kangthuphun atibuk le kepangrumnodak asonsi plangpo. Rat atum Tophet along amat ta halatum kethi arpum chepippo, pima halatum aphan kepipji nahokta adim avelo.

¹²Ne chechak-lo, laso arongsopi lapen la asor an aphan Tophet ason paplangvekji.

¹³Jerusalem ahem-heihei lapen Judah arechohem-heihei lapen chenamsi chiklolongso-heihei aphan hijung aphik me kethor ahem asarnung an lapen akaprek a-arnam-heihei aphan hor kethok kedung an adim lahei kedo-an Tophet kangthirthe asonlo.”

¹⁴Anke HEMPHU neliphan Alang birta pachethang adim Tophet neli olo. Neli damsi kardomhem-heihei akut arlo arjap damlo, lapen kedo-an arat aphan,

¹⁵Israel a-Arnam Jakongkethe HEMPHU si kepulo pu thanlo, “Neli laso arongsopi lapen adung arei arong aphuthak Ne kepu aduk kepiji pu kepu-an vangpo, pima nangtum nangning ingtang-ong, lapen Ne kopisi kepuloma arjujedetji.”