Read Karbi JEREMIAH 20 Bible Online

JEREMIAH 20 - Karbi bible

JEREMIAH 20

¹Immer asopo Pashhur kurusar, alangli kardomhemthepi achakri kethelo, ne laso alam kepachethang arjulongsi

²neliphan kepathengjisi alangli hukum pilo, lapen kardomhemthepi Benjamin Anghap parai adung ingchin arri pen ne-ingnang-lo.

³Puthot arni, Pashhur, neliphan ingchin arri pen nelodet aphi, alangliphan neli pulo, “nangliphan Pashhur pu HEMPHU nang men ir-e. Nangliphan Alang kepi amen ke ‘Alongtin ketara-ang,’ pusi irlo.

⁴HEMPHU amethangsi kepulo, ‘Ne nangphan nangmethang aphan lapen nangjirpo atum aphan tara-ang pinchongpo lapen nang halatum aphan ahotur atum ariding kethi thek-longpo. Judah arat aphan an Bebilon arecho aridengsi Ne hodaidetji; ajehak atum aphan alangli amethang adet beng pondetpo lapen ajehak atum aphan pathipo.

⁵Ne laso arongsopi akhi an latum ahotur pathipon-etji, lapen amar-atar an, Judah arecho akhi-heihei asontin ha Bebilon papon-etji.

⁶Pashhur, nangphan ke nang lapen nanghem asor an aphan nepchekpo lapen Bebilon nangpondetpo. Hadaksi nang thinangpo nang kechobei-o nangjirpo atum penpen chepip rappetpo.’”

⁷“HEMPHU, neli Nangphan pachobeitang-lo, lapen neliphan pachoreilo. Nephan mute Nang jakong themu lapen Nang nehaidet-lo. Abangphutin ta neliphan angtur chebilo; Arnikangthim latum nechongthuilo.

⁸Neli keningje ahut tin neli chiru nang-lo lapen hangser nang-lo, ‘Kephangnolo! Kevirlo!’ pu. HEMPHU, neliphan nechongthuirop-lo, Lapen aphongtin ta ne ingtonlo pima neli Nang birta pachethang-lo.”

⁹Bonta neli pulote, “HEMPHU aphan tengnedetpo lapen Alang men pen ningjejelo,” pulote, nangli birta neli-ok arlo me ason kru-angpo. Neli un an chechak bor-ipo, bonta la pahamjoi un-e.

¹⁰Abangphutin ta kechepalamso ase neli arjulong-lo, “Bithe-bitha ta pherememelo! La apotsi la lam pangribang aphan thanpi damser lonang!” Ne jirpo apokta ne kevir aphan cholangding-lo. “Laphan chongthui undetji tahai,” pusi latum pulo; “Anke la aphan eli nep unpo lapen alar huilongpo.”

¹¹Bonta neli HEMPHU, ke nenat, ingtangpik lapen jakongthepik, lapen nephan kechenek atum ne un-e. latum aphan kaike patherakverpo, pima latum pachun un-e. Latum aketheraknang tengne un-edetpo.

¹²Bonta, Jakongkethe HEMPHU, Nang monit aphan ahokpetsi asat enlo; halatum aning lapen angthin kopisi kemathama Nang chini. Lasi ne hotur aphuthak Nang alar kehui nepathek-longtha, athema neli kesung Nang ridengsi hodailo.

¹³HEMPHU aphan lunnon! HEMPHU ronon! Kehingno amonit atum ajakong pen Nang pajok.

¹⁴Neli mahang kethek arni pahirjunonang! Nepei nephan mahang kepathek arni tengnedet lonang!

¹⁵“La sopinso! Nangli sopo inut dolo!” Pu nelipo aphan birta vanpisi kepachehok abang hirjuno palongnang.

¹⁶Ingjinsosepin pen HEMPHU kepavirtang arongsopi-heihei ason paplangnang. Adap keso kar-em ase lapen anerlo chitim ron kepachere arki Alang parjulongnang.

¹⁷Pima ne mahang kethekji aphrang nephan Alang pathilotledet apot. An lote nepei apok arlosi ne thiri plangpo.

¹⁸Ne kopi athesi mahang theknang-loma? La kesung lapen ning ke-oi kecholongchotji aphanma, Ketheraknang pen ne chethe chepajut nangpoma?