Read Karbi JEREMIAH 21 Bible Online

JEREMIAH 21 - Karbi bible

JEREMIAH 21

¹Malkiah asopo Pashhur lapen Maaseiah arecho Zedekiah si nelong nangtoisi nang choningrilo:

²“Kanghon pen nelitum aphan HEMPHU along nang chingki pitha, pima Bebilon arecho Nebukadnezzar lapen alangli aron asong rongsopi kompet-lo. HEMPHU pine isibak manghumeme akam ephan eklempiji mene lapen Nebukadnezzar asong aphan pachiruiji mene.”

³Anke neliphan HEMPHU nethak-lo, lapen nelong kevang abangphu atum aphan neli thansi,

⁴Israel a-Arnam, HEMPHU si kepulo pu Zedekiah aphan pathan damtoinon, “Zedekiah, Bebilon arecho lapen la aron asong pen kechedan nang ron asong aphan Ne paremdetji. Nang nokbe atum arisim rongsopi angbong Ne pangsomji.

⁵Ne jakong kedo-an, nening kethi, nening kepung lapen Ne prungset-erset pen nangbe thursi Ne chedanji.

⁶Laso arongsopi along kedo abangphutin aphan Ne pathilapji; monit atum lapen pi atum an pherememe akeso pen thinangji.

⁷Bonta nangphan, nang chakri atum aphan lapen ron, akhim, keso pen kejok atum an aphan recho Nebukadnezzar lapen nangtum aphan kepathiji pu nang hotur atum pen ajok Ne nang panep-etji. Nebukadnezzar nangphan nangpathilotpo. Alang nangtum badu aphan ta pajokjelo mate nangtum badu aphan ta kang-jinso paklangklelo. Ne HEMPHU si keningjelo.”

⁸Anke rat aphan kepathijisi HEMPHU neliphan pulo, “Arjutha! Ne, HEMPHU si nangtum aphan kereng atovar lapen kethi atovar angbong nangpachongvaitoilo.

⁹Laso arongsopi along kedo abangphutin aphan pathiji mate kangchir mate keso pen ajok thinangji. Bonta ingtan kebar abang aling lapen Bebilon aso ron rongsopi ketengkheng atum aphan chehodaidet lote thijokphlotji; bangso abang apran anke jokji.

¹⁰Laso arongsopi kepajokjedetji aphan nening chesiktang-lo, bonta la pavirdetpo. Bebilon asor recho arideng la hodaidetpo lapen la alangli me keidutpo. Ne, HEMPHU si keningjelo.”

¹¹David asu, Judah arecho ahemtun aphan, laso abirta kepapijisi HEMPHU neliphan pulo, “Ne, HEMPHU, kopisi kepuma, arjutha.

¹²Arnivangta ahok akangsai kedojile langnon. Kechobei abang pen kechobei kelong aphan rainon. Nang jongsi klemkle pulote nang keklem kehingno nening papungpo lapen kemep un-epin ame ason kar-angpo.

¹³Nang, Jerusalem, aklam ajo kechondong a-arlong asonsi nang arlok kangtui athak chongnilo. Bonta nang pen ne chedanji. Nang mathalo, baduta nangphan tengkheng un-elo pu mate nang keteng baduta ingdi un-e pu.

¹⁴Bonta nang kecho-klemtang apot Ne nangphan aduk nang inghoiji. Nang rechohem Ne me nangkaipiji, lapen asontin adung-arei kedo-anta me cho-etpo. Ne, HEMPHU si keningjelo.”