Read Karbi JEREMIAH 22 Bible Online

JEREMIAH 22 - Karbi bible

JEREMIAH 22

¹David asu, Judah arechohem along dam pen hadak latum aphan kepapujisi HEMPHU neliphan pulo,

²hadak recho aphan, la achakri aphan, lapen Jerusalem arat aphan HEMPHU kopisi kepuma than parjunon:

³“Ne, HEMPHU si nangtum aphan kopima ahokpet lapen akechok kepaklemjisi hukum nangpilo. Kechobei abang pen kechobei kelong abangphan langremri mate chenek-ri, lapen laso kangthir adim adai kave abangphan pathiri.

⁴Ne hukum nangkepi ateng jongsi nangtum klem lote, David asomar kaiketa recho cholongbomji. Lapen latum achakri atum lapen halatum arat atum pen chelangpetsi laso arechohem anghap-heihei pen ron ahemkonglong lapen losei athak ardonsi damlongbomji.

⁵Bonta nangtum jongsi Ne hukum kroikre pulote, Ne nangtum aphan semetang-lo, laso arechohem krepsi ruraipo. Ne, HEMPHU si keningjelo.”

⁶Nephan ke Judah arechohem Gilead alongle ason lapen Lebanon anglongpi-heihei ason langmepik; bonta baduta kedodepin adim rongman Ne paplangji.

⁷La kepavirjisi Ne monit toiji. Halatum acho-heihei chevansi la kelangmeme a-Kedar archok-heihei pipetpo lapen lahei me phrindutpo.

⁸Aphi ongdung abidet aso atum damputpo, lapen charju seroipo, kopisi Ne, HEMPHU le laso kethedung arongsopi aphan lason keklemloma.

⁹Anke latum thakpo, lake ne nang Arnam pen nangtum angbong kechechak aloh apot lapen akaprek arnam-heihei aphan karcho lapen kangduk apot-lo.

¹⁰Judah arat atum, Josiah recho aphuthak chiruri. Bonta la asopo Joahaz aphan ningduk pen chirunon; Halatum la aphan pondetsi Vanthuthepinpo, La amahang kethek adim Kaike aphan thek-longlelo.

¹¹Josiah asopo Joahaz, apo alar Judah arecho kecho abang aphuthak HEMPHU pulo, “Ladak pen la damtang-lo, nangcheruirepinpo.

¹²Halatum kepon adet along la thipo, lapen laso alongle la kaike aphan thek-longlelo.”

¹³Ahok-he atovar pen hem kechekim abang lapen ahok-he asai la kechepathe abang pavirnang. La arong asor aphan chotoipangtarlo, Lapen halatum aphan keklem anam pipelo.

¹⁴“Hemthengsong ador kesopik angdeng-heihei pen ne methang aphan hem chekimji” pu kepu abang pavirnang. Lasi la ahem anghapso-heihei chebilo, Kedar athengpi arpong pabonpo Lapen la arong ke-er vit-lo.

¹⁵Nang jongsi kedar athengpi ahem-heihei kimlote, akaprek ahem apar pamelote, la nangphan isi memuchot arecho nang paplang poma? Nang kai achethe chepachi pamelo. Alangli kaiketa ahokpet lapen mesen, Lapen Alangli keklem aling chingthurlo.

¹⁶Keduk abangphan la langpame, lapen Alangli pen kadokave ason ta mesen. La helo HEMPHU aphan kechini nangji pu alam.

¹⁷Bonta nangke nang methang ale aphansi chethekchot, adai kave abangphan nangli pathi lapen nangrat aso aphan thurkhrapsi chenek-lo. HEMPHU si keningjelo.

¹⁸La apotsi Josiah asopo Jehoiakim, Judah arecho aphan HEMPHU pulo, “La kethi ahut baduta chiru abang avelo, mate ‘Ne hemphu! Ne recho’ pu kehang abang avelo.

¹⁹Kethi ahut gadha kepachethur pensi aman pipo lapen Jerusalem anghap-heihei angtansi vardamchorpo.”

²⁰Jerusalem arat atum, Lebanon anat damra hangsernon, Bashan adet damra chirunon; Moab anglongpi-heihei pen hangnon Pima nang pen kejalang asong an remtang-lo.

²¹Nang kechingthur ahut nangphan HEMPHU nangpulo, bonta nang arjumolo. La helo nangkai isi nang keklemtang ason; Nang HEMPHU aphan kroi un-elo.

²²Nang jalin atum aphan tomon jappondetpo, nang pen kejalang asong aphan ron aban ason pondetpo, nang rongsopi pinremlo lapen theraknang-lo. Pima nang kehingno an keklem apot-lo.

²³Lebanon pen nang kevan a-Kedar athengpi angbong jokvan asonsi nang sang-lo. Keso kepho lote nang ko-an kelangmemejima Laso akeso arloso aso mahang kepathek akeso ason.

²⁴Judah arecho Jehoiakim asopo Jehoiachin recho aphan HEMPHU pulo, “Ne kereng-et Arnam asonsi, nang jongsi sap ketheng-i Neri a-arnanlo, pu seta Ne nangphan phlokjokji.

²⁵Lapen nangphan kepathiji pu kephereju amonit aphan pidetji. Ne nangphan Bebilon arecho Nebukadnezzar lapen aron asong aphan nangpidetji.

²⁶Nangphan lapen nangpei aphan Ne ban nangtoi bor-idetji. Nang mahang kethekthepin adet nang dam nangpo lapen hadak nangtum banghini ta thinangpo.

²⁷Laso adet nang kethek-longji ingtungpikji, bonta nang vangthulonglelo.”

²⁸Neli pulo, “Jehoiachin recho bang kevartang kanghangtang lapen baduta ke-en-e atibuk ason plang poma? La lapen asomar kechininepin adim ban kepon la apot-loma?”

²⁹O det, det, det! HEMPHU kopisi keningjema no chedentha:

³⁰“Laso amonit aphan ke asomar kechepangbojile, thangnatta kechunchedetji aphanle putotnon. David aro Judah kepangriji aphan la asomar avelo. Ne, HEMPHU si keningjelo.”