Read Karbi JEREMIAH 23 Bible Online

JEREMIAH 23 - Karbi bible

JEREMIAH 23

¹Arat aso aphan kepavir lapen kepahijikjam a-kepangribang atum aphuthak HEMPHU kangsai ko-an kepherememepoma!

²Arat aso aphan kelang nangji apangribang atum aphuthak Israel a-Arnam HEMPHU lasonsi ningjelo: “Nangtum Nerat aso aphan langle, nangtum latum aphan hijikjamlo, lapen latum aphan kehelo phlung-et-lo. Non Ne nangtum aphan nangtum kehingno keklem apot aduk nangpipo.

³Ne rat aso aphan Ne kehijik adet-heihei pen Ne pangrumthuji lapen latum aphan Ne ahem van-etji. Latum aso-asu do-oji lapen aphai chanpo.

⁴Latum aphan kepalangji aphan Ne pangribang batji. Ne rat aso atum phere mate thirik jokphlotpo, lapen latum aphan Ne puthot aduk pipelo. Ne, HEMPHU si keningjelo.”

⁵HEMPHU pulo, “David aro pen inut dhoromipet arecho kangvaiji apor nangletang-lo. Halabangso arecho reset pen pangri pamepo lapen kopima akechokpet lapen ahokpet akam det adang klempo.

⁶Alang recho kecho Judah arat atum jokvanpo, lapen Israel arat atum ingsamjin pen dolongpo. Alangphan ‘Netum kejok ahemphu’ pusi irpo.”

⁷Ahut nangletang-lo, pusi HEMPHU pulo, Israel arat aphan Ijip adet pen kevan abang, kereng-et Arnam pura Ne men pen semetangtesi,

⁸Israel arat aphan nirep adet pen lapen akaprek adet Ne kehijik adim pen nang kevan kereng-et Arnam, Ne men pensi latum semetang-lo. Anke latum amethang adet chedopo.

⁹Nening thuvok-lo, lapen ne-ok klemhurlo, pima HEMPHU pen apot. Pima Alang lam kangthir-heihei pen apot, Ne ke inut horkang-ri abang asonlo, Inut horkangripik abang asonlo.

¹⁰HEMPHU aphan kekroikre atumsi det plengset-lo, latum kehingno akai pensi dolo lapen ajakong klemphangnolo. Pima, HEMPHU ahirjuno apotsi det chirujolo Lapen bap-bi krengtailo.

¹¹HEMPHU pulo, “Montri atum lapen kurusar atum a-arnam ave kardomhemthepi arlo anat latum kehingno akam keklem Ne nepchek-lo.

¹²Latum kedam atovar ke panglitphrui lapen pangtingkuk-lo; Ne latum aphan patekungtoisi pachingkoiji. Latum aphuthak Ne kevir vanpo; Latum aduk kepho apor nangletang-lo. Ne, HEMPHU si keningjelo.

¹³Samaria amontri atum apap Ne thek-long-lo; latum Baal amen pen ningjelo lapen nerat aso aphan pasuilo.

¹⁴Bonta Jerusalem amontri atum kehingno muchot keklem Ne thek-long-lo; latum beisa akam klemlo lapen chobeilo, latum rat aphan kehingno akam keklem khang abang avelo. Nephan latum kedo-an ta hingnopet, Latum Sodom lapen Gomorrah arat ason.”

¹⁵“La apotsi, Ne Jakong kethe HEMPHU lasonsi Jerusalem amontri atum aphuthak ningjelo; latum kechoji aphan han keho ne pipo, lapen kejunji aphan bikar, pima det adang bithe paronre ason pachethangtang-lo.”

¹⁶Jerusalem arat aphan Jakong kethe HEMPHU pulo, “Montri atum kopima kepu alam arjuri, latum aphan latum ning kepathetap pensi paplengset-lo. Latum kopima aning arlo kematha lasi nangtum aphan nangthanlo, lapen Ne kepu ason kalipinlo.

¹⁷Ne kepu alam karjuje atum aphan lahei thanthe, mesenji pusi latum aphan thanbomlo. Lapen kevir asapta nangphophe pu aning kangtang atum abangphutin aphan latum thanlo.”

¹⁸Neli pulo, “lahei amontri atum angbong inutbak ta HEMPHU kemathajoi alam chini abang ave. Latum angbong inutbak ta Alang birta arju-longlelang, mate chinidun un-elang, mate Alang kepu alam arjudunlo pupe, mate nocheden dunlo pupe.

¹⁹Alang aning kethi lake tomonpi ason, kesedengkot atomonle kehingno atum aphuthak kepapho ason,

²⁰lapen Alang aningkehang ateng keklem paplengpletik an la hamhelo. Mo aphi Alang rat atum laso alam chinipamelo.”

²¹HEMPHU pulo, “Ne lahei amontri atum aphan nangketoi kali, bonta latum aningkehangsi damlo. Latum aphan Ne thangnat abirta ta pipe, bonta latum Ne men pen ningjebomlang.

²²Latum jongsi Ne kemathajoi alam chini asonte, latum Ne birta Nerat aso aphan pachethangji apot-lo, lapen latum kehingnodak akai lapen kehingnodak akam keklem pache-o unji apot-lo.”

²³“Neke nahokta kedover a-Arnam lapen elongnat kedochot lapu kali.

²⁴Ne kethek-long adim mane abang chepatu unji lapu kali. Sining lapen pirthe adang bithe ta Ne do pu nangtum chininema?

²⁵Lahei amontri atum kopisi kepuma Ne chini, latum Ne men pen kechobei alam ningjelo, lapen latum aphan amangsi Ne thanlo pu chepulo.

²⁶Latum keselam kechobei alam pen Ne rat aso aphan latum ni ko-ansi pasuiver poma?

²⁷Latum amang alam Ne rat aso aphan than lote Nephan latum tengne unpo pusi latum mathalo, latum apo atumle Nephan tengnesi Baal anat kepangno ason.

²⁸Amang kethek-long amontri atum lake mangchot pusi than nangji, bonta Ne birta karjulong amontri abang kekroithirklong pen Ne birta than nangji. Sok tipli pen apun kosonsi pangbar unpo?

²⁹Ne birta ke me ason lapen la arlong kepangje-i akebu ason.

³⁰Bang alam ensi Ne birta lo pu kepachethang amontri atum abe Ne thurlo.

³¹Lapen amethang alam ningjesi Ne pensi kevang-lo pu keningje amontri atum abe Ne thurlo.

³²Ne, HEMPHU kopisi kepuma arjutha! Amethang amang kechobei kechethan amontri abe ne thurlo. Lahei amang latum thansi latum kechobei lapen kechepindak pen Nerat aso aphan pasuilo. Latum aphan Ne toite mate kepadamji ahukum ta pipe; rat aphan latum thangnat ta ale ave, Ne, HEMPHU si keningjelo.”

³³HEMPHU neliphan pulo, “Jeremiah nerat aso inutbak, mate montri inut-bak mate kurusar inutbak nangphan HEMPHU abirta kopilo?” pu nang arjulote, halatum aphan nang thannon, “nangtum HEMPHU aphan isi anghorlo, lapen Alang nangtum pen chepajokpo.”

³⁴Mane inutbak arat mate inutbak amontri, mate inutbak akurusar jongsi “HEMPHU anghor alam enlote, labangso ahemphu aphan Ne adukpiji.

³⁵La alar, abangphutin ta ajirpo atum aphan lapen adon-arap aphan HEMPHU kopisi keningjelo?” pu pacherjuseroi lonang.

³⁶Anke latum “HEMPHU anghor” alamthe kaike endetpo, pima mane jongsi la klemlo pulote, la abangphan Ne birta isi anghor binong paplangpo. Rat atum halatum a-Arnam, kereng-et a-Arnam, Jakong kethe HEMPHU alam-heihei larlo.

³⁷Jeremiah, montri atum arjulo, “Nangliphan HEMPHU kopisi ningjelo?

³⁸Latum jongsi Ne lam-heihei kroikrelo lapen ‘HEMPHU anghor’ alamthe-heihei enlote,

³⁹Latum aphan humjoksi Ne pen heloving adim varchorpo pu thannon, latum lapen latum aphusar aphan Ne kepi arongsopi aphan pen pen varchorpo.

⁴⁰Latum aphuthak kaike ketheraknangver lapen tengne un-epin akepinrem vanpo.”