Read Karbi JEREMIAH 25 Bible Online

JEREMIAH 25 - Karbi bible

JEREMIAH 25

¹Josiah asopo, Judah arecho Jehoiakim recho kecho phli aningkan, Judah kedo-an arat aphu-thak HEMPHU pen neli isi abirta long-lo. (Lake Nebukadnezzaar, Bebilon arecho recho kechocheng aningkan ahut-lo.)

²Ne, kedo-an Judah lapen Jerusalem arat aphan pulo,

³“Ningkan ingkoira kethom, Amon asopo Josiah, Judah arecho kecho kre-kethom aningkan pen pini arni an, neliphan HEMPHU ningjebomlo, lapen alangli neliphan kopi thanloma la neli nanglitum aphan kethanthedet ason ave. Bonta nanglitumsi no cheden vangve.

⁴Nanglitum aphan HEMPHU alangli ban montri atum nangtoibang jonghe seta nangli no chedende mate no che-varve.

⁵Halatum nanglitum aphan nanglitum kehingno atovar pen lapen kehingno akam keklembom pen kesuiji aphan nangthanlo, anlote, nanglitum aphan lapen nangli phusar atum aphan HEMPHU nangkepi alongle along nanglitum dolongverji apot-lo.

⁶Akaprek a-arnam-heihei aphan karchoche lapen kangdukdedetji aphan halatum nangthanlo, lapen nangtum keselam akumlin-heihei aphan karcho pen ajok HEMPHU aning papungrinon pu ta nangthanlo. Nanglitum jongsi HEMPHU aphan kroitang-lo pulote, alangli nanglitum aphan aduk pasungsedetji apot-lo.

⁷Bonta HEMPHU amethangsi pulo, nanglitumsi alangli lam arjumolo. La alar alangliphan nanglitum aningpathilo, nanglitum akumlin-heihei pen ajok lapen alangli aduk nangtum methang aphuthaksi chevanlo.”

⁸La apotsi, nanglitum Alanglilam karjujedet ajok, Jakongkethe HEMPHU pulo,

⁹“Nirep pen kedo-an arat lapen neban Nebukadnezzar, Bebilon arecho nangtoipo. Latum aphan vansi latum Judah lapen la arat aso an lapen adung arei adet aphan Ne pavirpo, lapen kaike aphan parupo, isi kepherememe lapen kethek-long anta e-ok chumpran. Ne, HEMPHU si keningjelo.

¹⁰Halatum aning arong lapen kechehok akehangjo ase lapen pisopangri arong kechopi arki Ne pavedetpo. Latum amelur aphan jangthu avedetji lapen sok pavedetji.

¹¹Laso alongle kedo-an kerutang amarsi dochotpo lapen kelang anta pherememepo, lapen adung arei adet atum Bebilon arecho aphan ningkan throksi kep ingdukpo.

¹²Laso aphi Bebilon asor lapen la arecho aphan halatum apap apot Ne aduk pipo. Halaso adet Ne pavirpo lapen kaike aphan paruhuppo.

¹³Det-heihei atum aphan kevir kevangji pu kether ason laso aloh along ketoktang an akevir pen Bebilon asor aphuthak ne adukpipo.

¹⁴Bebilon asor atum kopima keklemtang alar Ne latum aphan alar huipo, lapen ongdung adet atum lapen rechokethe atum latum aphan ban enpo.”

¹⁵Israel a-Arnam HEMPHU neliphan pulo, “Ladak hor aharlung nening kethi pen plengset dolo. Ne nangketoi adet-heihei kedo-an anat ponnon, lapen la along pen halatum aphan pajunnon.

¹⁶La pen latum kejun ahut, latum krep-ring krep-rangpo, lapen Ne latum anat ketoiji aron pen apot latum pangcham hi-ha po.”

¹⁷lasi neli HEMPHU arideng pen harlung enlo lapen HEMPHU neketoi adet an aphan la pilo, lapen halatum aphan la pajunlo.

¹⁸Jerusalem lapen Judah arong kedo-an la arecho lapen ajalin atum pen pen la pajuntoilo, anke latum samphridangpo, kelang anta pherememepo, lapen monit atum latum amen ensi ahirjuno hang-ipo, latum non keklem asonthot.

¹⁹Harlung pen kejun atum amen ladak aber ketokjir helo: Ijip arecho, aban atum an lapen ajalin atum;

²⁰Ijip asor an lapen Ijip along bang adet aso an; Uz adet arecho atum an. Ashkelon, Gaza, Ekron, lapen Ashdod along kedo ahin arat la Philistia arongsopi arecho atum an;

²¹Edom, Moab, lapen Ammon arat an,

²²Tair lapen Sidon arecho atum an, Mediterran atalo akung kedo arecho atum an,

²³Dedan, Tenoa lapen Buz arongsopi an, achu kechingtip kechepathihek atum an;

²⁴Arab arecho, kejejangtang ajo kedo akhei atum an;

²⁵Zimri, Elam, lapen Media arecho an;

²⁶Nirep adet arecho atum an, kehelo adet lapen adung adet inut aphi inut. Pirthe adang akhei an la junpo. Kejutsi Bebilon arecho Sheshak si la junpo.

²⁷Anke HEMPHU neliphanpulo, “Rat aphan thannon, Ne, Israel a-Arnam jakongkethe HEMPHU si latum ingrithamthetik, latum ching-ok-etik, lapen latum chingkoira thur un-etik kejunji ahukum pilo, pima latum aphan Ne ron toitang-lo.

²⁸Nang rideng pen latum harlung enmo lote, lapen junmolote, jakongkethe HEMPHU si kepulo, latum jun nangpo, pu thannon.

²⁹Ne methang arongsopi pen Ne kepavir akam chengpo. Latum aduk phophepin pen damlongji putong kemathama? Kali, latum aduk phovekji, athema pirthe adang arat aphuthak Ne ron toitang-lo. Ne, jakongkethe HEMPHU si keningjelo.”

³⁰Nang, Jeremiah, Ne keputang alam athetin pachethang non. Lahei arat aphan nang la thanvek nangji. Sining angsong pen HEMPHU ingrong-lo lapen sining akangtui pen cheter paklolo. Alangli rat aphan Alangli ingrongpo; Inut amonit drakha kesak-lam asonthotsi Alangli hangprakpo, Pirthe athak kedo abangphutin ta La ase arjulongpo.

³¹Pirthe akejut anta arki ledampo. Det-heihei aphuthak HEMPHU kebok alam do. Kadokave arat aphan Alangli ingsaiji Lapen kehingno aphan pathiji. HEMPHU si keningjelo.

³²Jakongkethe HEMPHU pulo, “Isi aphi isi adet aphuthak kevirvangbomlo, lapen tomonpi pirthe kejut ano chingtonpleng-lo.

³³Halabangso arni HEMPHU kepathi abang arpum pirthe ehin pen ehin kaprek an chehijikjampo. Lahei aphan baduta chiru abang avelo, lapen lahei ponpelo, lapen pippedetpo. Ho-or angsom asonsi lahei tichepo.”

³⁴Nang jalin atum chiruhurnon, nang nerat aphan kevi atum chiru-hurnon, ase kethe pen! Chirura longle ajo kong-longnon. Nangtum aphan kepathipreji lapen biresak alo kethu ason apor nangletang-lo.

³⁵Nangtum kejokji atovar nahokta avelo.

³⁶Nangtum ning-oisi lapen ningduksi chirupo, pima HEMPHU aningkethi pen nang det pavir tang-lo lapen

³⁷nang kangsamjin adet paruhup-lo.

³⁸Arat aphan HEMPHU otang-lo, hinghole angthor keche-o asonlo. Kepherememe aron pen HEMPHU aning kepung pen det pasamphri-dang-lo.