Read Karbi JEREMIAH 26 Bible Online

JEREMIAH 26 - Karbi bible

JEREMIAH 26

¹Josiah asopo Jehoiakim, Judah arecho chodet aphi,

²neliphan HEMPHU pulo, “kardomhemthepi atikup arjaptherra hadak karchojisi Judah adet arong-heihei pen kevang arat aphan Ne nangkepaningjetoi hukum nangkepi alam an nang pachethangnon. Ethe ta ori.

³Rat atum arju tahai mene lapen halatum kehingno atovar che-o tahai mene. Latum jongsi klemlo pulote, halatum kehingno apot latum aphuthak Ne kepavangji pu kemang alam nening chekirlapo.”

⁴Rat aphan kepapujisi HEMPHU neliphan pulo, “Ne, HEMPHU si kepulo, Ne nangkepi akethan-heihei ketalon pen ajok nangtum nephan kroivek nangji,

⁵lapen Ne nangketoi neban lapen montri atum alam no kecheden pen ajok, latum aphan nangtum anat Ne nangtoibomlo. Latum kepu alam nangtum kaita arjuje.

⁶Nangtum jongsi nephan kroikrever pulote Shiloh along Ne keklem ason laso kardomhemthepi aphuthak Ne klempo, lapen pirthe adang adet atum ahirjuno kepi ahut laso arongsopi amensi enpo.”

⁷Kurusar atum, montri atum lapen kadokave arat atum Kardomhemthepi along lam Ne keningje arjulong-lo,

⁸lapen HEMPHU neliphan hukum kepi keningje Nang lam pajutdet aphi, latum neliphan kompetsi hangjolo, “Laso apot nang thivek nangji!

⁹Kopisi nang HEMPHU amen pen laso a-Kardomhemthepi, Shiloh ason plangpo pu kepulo, lapen laso arongsopi kevirji lapen la along baduta dolongledetji pu kepulo?” Anke rat atum nekompet-lo.

¹⁰Judah ajalin atum kopi plangtang-loma pu alam arjulongsi, latum rechohem pen kardomhemthepi anat damserak-lo, lapen Akemi anghap along adim-heihei chedolo.

¹¹Anke kurusar atum, lapen montri atum, jalin atum aphan lapen rat aphan pulo, “Laso amonit kethi nangji a-ot dolo, pima la etum arongsopi abe thursi ningjelo. Nanglitum methang ano-heihei pen la arjulong-lo.”

¹²Anke neli pulo, “Nanglitum karjulongtang laso kardomhemthepi lapen laso arongsopi aphuthak alam an kepaningjejisi neliphan HEMPHU netoilo.

¹³Nanglitum kedobom atovar chelarvek nangji lapen nanglitum keklembom akam chelarvek nangji lapen nang Arnam HEMPHU aphan kroivek nangji. Nangtum jongsi klemlo pulote, nanglitum aphuthak Alang kevanji akevir abang Alang ning chelarpo.

¹⁴Neliphan ke nanglitum nang klem aling nang klemnon! Kopima nanglitum kematha akeme lapen akechok lale neliphan klemnon.

¹⁵Bonta laso alam chinipamenon: Nanglitum jongsi neliphan pathi pulote, nanglitum lapen laso arongsopi arat adai kave amonit aphan kepathi ado doji, pima neliphan laso akepachere kepathantoijisi HEMPHU si netoilo.”

¹⁶Anke kurusar atum lapen montri atum, jalin lapen rat atum aphan pulo, “Laso amonit etum a-Arnam, HEMPHU amen pensi ningjelo, la aphan pathinangne.”

¹⁷Laso aphi ajehak arleng kesar atum arjapsi kechingrum arat aphan pulo,

¹⁸“Hezekiah Judah arecho kecho ahut, Moreseth amontri Mikah rat aphan HEMPHU kepu alam thanlo.” Zaion along hidi asonsi haibaipo, Jerusalem ke kerutang angsom-heihei plangpo Lapen kardomhemthepi anglong ingnam plangpo.

¹⁹Hezekiah recho lapen Judah arat atum Mikah aphan pathilot-lo. La alar Hezekiah HEMPHU aphan man pilo lapen alangli pen kerap kelongjisi bor-ilo. Anke HEMPHU si halatum aphuthak kevir kevanji pu alangli kepu alam chelarlo. Non eli emethang aphuthak kevir chevanji dokok-lo.

²⁰(Hadak anut kaprek amonit dolo, Keriath Jearim lapen Sheaiah asopo Uriah, HEMPHU amen pen alangli laso arongsopi lapen det abe thursi Jeremiah asonthot ningjelo.

²¹Jehoiakim lapen la ron asong lapen aban atum Uriah kepu alam arjulongsi la aphan recho kepathiji rilo. Bonta la Uriah charjulongsi kephere pen Ijip adet katjuilo.

²²Jehoiakim recho ha Uriah aphan kepa-endamjisi Akbor asopo Elnathan lapen ajehak amonit Ijip adet toilo.

²³Latum la aphan Jehoiakim recho angno vandet-lo, lapen la aphan pathilot-lo, lapen abang arpum rat athiri arlo varchorlo.)

²⁴Bonta ne Shaphan asopo Ahikam akerap pen ajok nephan rat angno hodaidetsi nepathithedet-lo.