Read Karbi JEREMIAH 27 Bible Online

JEREMIAH 27 - Karbi bible

JEREMIAH 27

¹Josiah asopo aphi Zedekiah Judah arecho plang-lo, neliphan HEMPHU nepulo,

²Ok-reng arri lapen thengpi parpansi ne methang aphan juali isi paselamtoilo, lapen nephang athak pabattoilo.

³Anke HEMPHU abirta Edom, Moab, Ammon, Tair lapen Sidon arecho atum aphan kepapijisi Zedekiah recho aphan halatum aban atum nangkelang-ra Jerusalem kevang atum along birta paloduntoilo.

⁴Israel a-Arnam Jakongkethe HEMPHU, halatum arecho aphan kepachethanjisi neliphan hukum mate birta nepitang-lo, lapen HEMPHU pulo:

⁵“Jakong lapen kangtang-kangsak pen Ne pirthe monit akhei lapen pirthe athak kejuijam marat-mareng api an Ne pinchongtang-lo, lapen Ne kangvai abangphan Ne la pilo.

⁶Ne si det lahei det kedo-an neban, Nebukadnezzar, Bebilon arecho ajakong aber padolo, la anchot kali marat api atum anta la aphan pangduk-lo.

⁷Kedo-an adet alangliphan ingdukpo, lapen alangli det ruretik an latum alanglisomar lapen alangli sumar aphan ingdukpo. Anke la adet jakongthedung adet lapen rechothedung atum ason ingdukpo.”

⁸Bonta badu adet setame alangli pangri aber dode pulote, halabangso adet ron, akhim lapen keso pen ajok Nebukadnezzar la aphan pavirvetik Ne aduk piji.

⁹Badu amontri atum mate sangkelang atum setame, mang pentame mate paludep pen setame mate mekbin pen setame lahei atum alam arjuri. Latum kedo-an Nebukadnezzar arideng chehodairi pusi pupetji.

¹⁰Latum nangphan pachobeilo, lapen nangdet pen akehelo nangpondetpo. Ne nangtum aphan nangphlungpo, lapen nangtum virdetpo.

¹¹Bonta jongsi badu adet setame Bebilon arecho arideng chehodai lote, Ne alangliphan amethang adet pachedolongji, hadak sai patiki longji, dolongji. Ne HEMPHU si keningjelo.

¹²Judah arecho Zedekiah aphan neli lasonthotsi pulo, “Bebilon arecho aphan chehodainon. Alangliphan lapen alangli rat aphan ingduknon lapen nangli rengpo.

¹³Kopisi nangli lapen nangli rat aso atum ron along, akhim lapen keso pathinangjima? Bebilon arecho aphan kechehodaide adet lason plangvekpo pusi HEMPHU pulo.

¹⁴Alangliphan chehodai nangne pu kepu amontri atum alam arjuri. Latum nangli pachobeichot-lo.

¹⁵HEMPHU amethangsi kepulo, alangli latum aphan toite, lapen latum alangli men pen pachobeilo. La apotsi alangli nangliphan phlungjuipo, lapen nangliphan pathilotpo, nangli; lapen nangliphan kepachobei amontri atum anta.”

¹⁶Anke kurusar lapen rat atum aphan HEMPHU si kepulo pu neli thanlo: “Kardomhemthepi akhi Bebilon adet pen vanthulongpo pu kepu amontri atum alam arju nangne. Latum nanglitum aphan pachobeilo.

¹⁷Halatum alam arjuri! Bebilon arecho aphan chehodainon, lapen nangtum rengpo! Laso arongsopi kopisi keru angsom paman nangjima?

¹⁸latum jongsi montri atum binong lote lapen latum Ne birta dolote, latum Ne jakongkethe HEMPHU aphan kardomhemthepi arlo kedo akhi rechohem akhi Bebilon adet kepaponlongledetji aphan parjunang.”

¹⁹“Jehoiakim asopo Jehoiachin, Judah arecho, lapen Judah lapen Jerusalem a-arlengkethe atum aphan Bebilon adet recho Nebukadnezzar pondet ahut,

²⁰alangli archok-heihei, tam alang pen, chainong ahemkonglong-heihei lapen ajehak kardomhemthepi akhi-heihei otekangbup-lo.”

²¹Kardomhemthepi along lapen Jerusalem rechohem along ke-otekang akhi-heihei alam Israel a-Arnam HEMPHU kopisi kepuma arjutha:

²²Lahei Bebilon adet pondetji lapen lahei aphuthak Ne mathathetik hadak dobomji. Anke Ne vanthuji lapen lahei adimthot bi thuji. Ne, HEMPHU si keningjelo.