Read Karbi JEREMIAH 28 Bible Online

JEREMIAH 28 - Karbi bible

JEREMIAH 28

¹Halabangso aningkan amat pho achiklo, Zedekiah recho kecho phli aningkan ahut, Azzur asopo, Hannaniah, la Gibeon arong pen inut amontri lo, alangli neliphan kardomhemthepi arlo nepulo. Kurusar atum lapen rat angno alangli neliphan pulo,

²Jakongkethe HEMPHU, Israel a-Arnam pulo, “Bebilon arecho ajakong Ne ing-lokpet-lo.

³Ningkan hini angbong Nebukadnezzar recho kardomhemthepi akhi-heihei Bebilon kepontang an laso adim vanthudetji.

⁴Judah arecho Jehoiakim asopo Jehoiachin aphan lapen Bebilon adet ban kedam Judah arat an aphan ta Ne vanthuji. Kalang-lo, Bebilon ajakong Ne ing-lokdetji. Ne, HEMPHU si keningjelo.”

⁵Anke kurusar lapen rat atum kardomhemthepi along karjapphrong angno, neli Hananiah aphan pulo:

⁶“Mesenlo! Neli ningthelo HEMPHU la klempo! Nangli kemontri alam kechekokji aphan Alang klemvekpo lapen Bebilon pen kardomhem akhi-heihei lapen kebengpon arat kedo-an aphan vanthudetpo.

⁷Bonta nangliphan lapen rat aphan neli kepu alam arjutha.

⁸Nangli lapen aphrang hako penta montri atum ron, akhim lapen keso alam ongdung adet-heihei aphuthak lapen kangtangrak adet aphuthak ta vangji pu montrilo.

⁹Bonta inut ningkangsam binong amontri aphan alangli kemontri alam kechekok aphuthaksi chiniji.”

¹⁰Anke ne juali Hananiah nepen endet-lo, lapen ing-lok-et-lo.

¹¹Lapen rat angno pulo, “HEMPHU pulo, lasonthotsi det atum aphang along kedo Nebukadnezzar kebat ajuali ing-lok-lo, lapen la alangli ningkan hini angbong klempo.” Anke neli damjuilo.

¹²Laso aphi neliphan HEMPHU nepulo,

¹³Hananiah aphan kepathanjisi HEMPHU pulo: HEMPHU pulo, nang thengpi ajuali ing-lok-un tahai, bonta nangli laso adim ingchin ajuali bat thuji.

¹⁴Israel a-Arnam, Jakongkethe HEMPHU pulo, lahei adet atum aphuthak alangli ingchin ajuali batji lapen latum Bebilon arecho Nebukadnezzar aphan ingdukji, HEMPHU la anta pulo, marat api atum anta Nebukadnezzar aphan ingdukji.

¹⁵Anke Hananiah aphan neli laso alam thanlo, lapen batdunlo, “Hana-niah arjutha! Nangliphan HEMPHU nangtoite, lapen lahei arat aphan nang kechobei alam pakroilo.

¹⁶Lasi HEMPHU amethangsi ningjelo, Alang nangliphan oji. Laso aningkan jutje ako nang thiji, pima nang HEMPHU abe kepathurjisi rat aphan thanlo.”

¹⁷Laso aningkan amat throksi achiklo Hananiah thilot-lo.