Read Karbi JEREMIAH 29 Bible Online

JEREMIAH 29 - Karbi bible

JEREMIAH 29

¹Kurusar atum, montri atum, rat jalin atum lapen Jerusalem pen ha Bebilon adet Nebukadnezzar kepon arat atum an aphan neli isi akido tok-lo.

²Jehoiachin recho, alangli pei, rechohem aban atum, Judah lapen Jerusalem ajalin atum, kimbang atum, lapen kaida kethek atum an aphan ban pon-et aphi neli la tok-lo.

³Shaphan asopo Elasah lapen Hilkiah asopo Gemariah aphan ne loh pilo, latum Bebilon arecho, Nebukadnezzar anat Judah arecho Zedekiah si toilo. La ketok lapuhelo:

⁴Israel a-Arnam, Jakongkethe HEMPHU, Jerusalem pen Bebilon anat Nebukadnezzar recho kepon arat kedo-an aphan pulo.

⁵Hem-heihei chekimnon lapen dokoknon. Beri cho-archenon lapen lahei along kepathe athe chonon.

⁶Che-en-chedonon lapen osomar chepachan non. Nangsomar piso pangrinon, anke latumta osomar dopo. Nangtum aphai do-o nangji lapen langpron nangne.

⁷Ne ban ason nangkepadotoi arongsopi akeme aphanle klemnon. Halatum aphan nelong ardom pinon, pima latum chingthur lote, nangtumta chingthurpo.

⁸Ne, Israel a-Arnam HEMPHU si nangpacheretoilo, nang-tum angbong kedo amontri atum pen ajok mate mo aphi akai alam kethanthek pu kechepu abang tame nangtum aphan pachobeilong-ri. Halatum amang-heihei kechethan aphuthak nang no chedendunri.

⁹Latum Ne men pen nangtum aphan pachobeilo. Latum aphan Ne toite. Ne, Jakongkethe HEMPHU si keningjelo.

¹⁰HEMPHU pulo, “Bebilon kedo ning-kan throksi kep jut lote, Ne nangtum aphan kematha alam paklangpo lapen nangtum aphan hem nangkevanthuji Ne kechechak alam chebipo.

¹¹Ne inutnatsi nangtum aphan kemang alam chinichot, nangtum aphan kepachingthurji lapen kevir aphan kali, nangtum aning kechethebom aphi akai akemang.

¹²Anke nephan nangtum hangpo. Nangtum vangsi Arnam ardompo, lapen Ne nangtum aphan nangthakpo.

¹³Nangtum Nephan neripo, lapen nangtum nelongpo pima nangtum nephan nangning kedo-an pen ripo.

¹⁴Kalang, Ne pulo, nangtum nelongpo, lapen nangtum aphan nang longle along Ne pachevangthupo. Adet tin pen lapen nangtum aphan Ne kehijikjam adim an pen Ne nangpangrumji, lapen nangtum aphan Ne ban nangketoijui adet along nangvanthuji. Ne, HEMPHU si keningjelo.”

¹⁵Nangtum pulo, HEMPHU nangtum aphan montri atum Bebilon adet nangpilo pu.

¹⁶David kepang-ri adet alamjir lake laso arongsopi arat atum alamjir lake nangdon-nangrap ban keponpelang atum alam aphuthak HEMPHU kepuji alam do, arjutha.

¹⁷Jakongkethe HEMPHU pulo, “Halatum aphuthak Ne ron, akhim lapen keso vanji, lapen latum aphan Ne kechono akethu athebo ason paplangji.

¹⁸Ron pen, akhim pen, lapen keso pen latum aphan Ne hungdunji, lapen pirthe adang adet atum la kethek-long pen pherephratji. Latum aphan rat atum ingnekchoiji lapen halatum amen ensi rat atum ahirjuno hang-ipo.

¹⁹La halatum aphan plangjima latum Ne ketoibom neban, montri atum pen ajok kepibom abirta kroikrelo. Latum arjumolo.

²⁰Nangtum kedo-an Ne Bebilon adet ketoitang atum Ne, HEMPHU kopisi kepuma arjutha.”

²¹Israel a-Arnam, Jakongkethe HEMPHU, Kolaiah asopo Ahab lapen Manasseh asopo Zedekiah aphuthak pulo, “Latum Ne men pen nangtum aphan pachobeilo. Alang pulo, Bebilon arecho, Nebukadnezzar arideng alangli hodaidetpo, lapen alangli nanglitum angno latum aphan pathilotpo.

²²Jerusalem pen Bebilon adet ban kedam atum mane aphan ahirjuno hangpo pulote, Bebilon arecho le Zedekiah lapen Ahab aphan akereng kephidet asonle HEMPHU nangphan nangpaklemnang!” pusi latum pupo.

²³Lason helo halatum akopai plangpo pima latum kehingno apap-heihei adai do, latum beisa klemlo lapen HEMPHU amen pen pachobeilo. La HEMPHU aning kehanghe akamlo; latum kopisi klemloma alangli chini, lapen halatum aphan alangli si haki cholo. HEMPHU si keningjelo.

²⁴Israel a-Arnam, Jakongkethe HEMPHU, Nehelam asor Shemiah aphuthak neliphan birta isi pilo.

²⁵La amethang amen pen Jerusalem arat kedo-an lapen Maaseiah asopo Jephaniah, kurusar atum aphan aloh epak dolo. Laso aloh along Jephaniah aphan Shemiah tok-lo:

²⁶Jehoiada alarsi HEMPHU nang-liphan kurusar nangbat-lo. Lasi abangphutin montri pu kechepu aphu kehingno atum aphan achethok ingchin arri pen kekokdong la nangli kamlo.

²⁷Kopisi nangli Anathoth a-Jeremiah aphan lason klemkledet-lo, la arat atum angno inut amontri asonsi ningjelo kalima?

²⁸La aphan pangtonkok nangpo, pima Bebilon ban kedam arat aphan hadak kedo ajirding-oji, lapen hem-heihei chekim nangpo, do nangpo, beri sai tiki nangpo lapen halapen kopima athe kelong chonangpo pusi thanlo.

²⁹Neliphan Jephaniah loh neporhe pilo,

³⁰lapen neliphan HEMPHU

³¹laso abirta ban kedam an atum aphan Shemiah aphuthak loh ketokjisi ningjelo: “Ne, HEMPHU si Shemiah lapen aso-asu aphan aduk piji,

³²alangphan Ne toite, bonta la nangtum aphan inut amontri asonthotsi ningjelo, lapen la nangtum aphan kechobei atum aphuthak pakroidet-lo. Nangtum angbong pen la aso-asu avedetji. Ne rat aso aphan Ne akeme keklemji ason la thek-long-lo, pi ma latum Ne be kepathurjisi la thanlo. Ne, HEMPHU si keningjelo.”