Read Karbi JEREMIAH 3 Bible Online

JEREMIAH 3 - Karbi bible

JEREMIAH 3

¹HEMPHU pulo, “Inut amonit apiso chetilote, lapen bangpi alangphan otekang pen anut kaprek apiso plang-lote, bangpi aphan alangli enthulonglelo. La det pangthirthelo. Bonta Israel, nang ning kehang apinso do-o, lapen non nang nelong chevangthulo!

²Inglong aphuchong-heihei anat langtha, hadak nang beisa kechoklem adim doma? Tovar akung along nang nangning-kehang apinso atum aphan chonghong-lo, inut Arab amonit kejejangtang ajo kethijisi kechonghongding ason. Nang beisa akam pen ajok det pangthirthetang-lo.

³La apotsi arve jangjedet-lo, lapen thengpi pachingjokji arve vangvedet-lo. Nang nonputa akhat kave arloso asonlang, thangnatta nang aketherak ave.”

⁴Non nang nepulo, “Nang nepolo, lapen nang Ne oso ako penta chinghon-bomlang;

⁵nang kaike nephan ningthiver un-e; nang kaike ne arkan pet un-e.” Israel, lasonsi nang pulo, bonta un ansi nang kehingno akam klemtang-lo.

⁶Josiah, recho kecho ahut, nephan HEMPHU pulo, “kekroithekthe a-arloso, Israel kopi klemlo nang thek-long-loma? Bangpi Ne pen suitang lo, lapen kangtui anglong alongtin lapen kelirseng athengpi arongtin arum bangpi beisa akam klem-et-lo.

⁷Ne mathalo, bangpi la klem-et aphi bangpi nenat chevangthupo. Bonta bangpi kekroithekthe abang Judah ta thek-long-lo.

⁸Israel aphan Ne titang-lo, lapen bangpi nephan kesui lapen beisa plangtang-lo apot phlungjuilo pu Judah ta la thek-long-lo. Bonta Israel akekroithekthe akorte Judah ta phere-thekthelang. Bangpi beisa klemtang-lo.

⁹Lapen therak thekthepinlang. Bangpi det pangthirthetang-lo, lapen arlong-heihei lapen thengpi arong-heihei bangpi karcho pen ajok beisa klemtang-lo.

¹⁰La plangdet aphi Israel kekroithekthe akorte Judah Nenat kevangthu palemlemlo; bangpi angthikdut kali. Ne HEMPHU si keningjelo.”

¹¹Israel HEMPHU pen suilo seta, Alang nephan pulo, bangpi kekroithek-the a-Judah apar memuchot aporman paklang-lo.

¹²Israel aphan kepathanjisi neliphan Alang pulo, “kekroithekthe a-Israel, Nelong chevangthunon. Nangkangjinsosi plengset lapen Nening thithelo, kaike aphan Nening thivervelo.

¹³Nangdai dolo lapen nang Arnam HEMPHU abe thurlo pu chechinichotnon. Kelirseng athengpi arongtin along nang kanghon bang adet arnam-heihei aphan pitang-lo, lapen nang Ne hukum-heihei kroikrelo pu chekobirnon. Ne HEMPHU si kepulo.”

¹⁴Kekroithekthe arat, chevang-thunon; nangtum Nemarlo. Arongtin pen inut lapen arotin pen banghinini Ne nangponji, lapen Zaion anglong anat Ne nangvanthuji.

¹⁵Nephan kekroi abang nangtum aphan kepang-ri abang nangpiji, latum abidi lapen akechini pen nangtum aphan pangripo.

¹⁶Halaso adet along nangtum aphan ongdung lote rat atum Ne kechejok Asinduk alam chethanthedetpo. Laso alam latum mathathepinji mate chematha damdedetji. Lapen latum akenang avedetpo, kalite latum akaprek selam thurongpo.

¹⁷Halaso ahut nangle lote, Jerusalem aphan “HEMPHU Anghoi” pusi irpo, lapen hadak Nephan karchojisi kedo-an adet-heihei chingrumpo. Halatum ke arjuje lapen kehingno aning kepu aling latum klemkledetpo.

¹⁸Israel lapen Judah chelangpo, lapen ban kedo nirep adet pen latum aphusar atum aphan Ne kaike aphan kepi alongle anat latum vang-rappetpo.

¹⁹HEMPHU pulo, “Israel nesopo asonsi Ne nangphan deng ingtung-lo lapen nangphan ning kedokpik alongle nangpi ingtung, pirthe along kelangmenei alongle. Nang nephan po pu nangkepahangji Ne ingtung-lo, lapen Ne pen nang kaike suisedetnon.

²⁰Bonta kekroithekthe apiso ason nang nephan kroithipthe. Ne, HEMPHU si keningjelo.

²¹Inglong angsong-heihei athak kehurisai arki arjulongtang-lo; la Israel arat kechiru lapen kechoning-ri aselo, pima latum pap pen plengset akaisi dolo, lapen halatum a-Arnam HEMPHU aphan tengnedet-lo.

²²Chevangthunon, nang HEMPHU pen kerailong atum an; nangtum aphan Alang nangpamepo lapen kekroi chepathir-klongnon.” Nangtum pulo, “Kalang, netum HEMPHU along chevoithupo, pima Alang netum a-Arnam.

²³Inglong angsong-heihei netum karchotap pen thangnat akerap longle. Israel atum aphan kerap kevangke netum a-Arnam HEMPHU penchot.

²⁴Bonta Baal ketherak a-arnam aphan karcho ke netum aphan pi aroi, ahur, sopomar, sopimar netum aphusar atum hako ne keklempi amar anta chepangbonang-lo.

²⁵Netum ketherak nangsi tilai nangji lapen kepinremle netum aphan padipthip lonang. Netum lapen ne phusar atum kaiketa netum a-Arnam HEMPHU aphan langplotsi pap klemtang-lo, Alang hukum-heihei netum kaiketa kroikrelo.”