Read Karbi JEREMIAH 31 Bible Online

JEREMIAH 31 - Karbi bible

JEREMIAH 31

¹HEMPHU pulo, “Israel akhei kedo-an a-Arnam lapen latum Nerat keplangji apor nanglebomlo.

²Kejejangtang ajo kethi pen kejok atum an aphan Ne kangjinso paklang-lo. Israel arat atum kesangji kar-i ahut,

³heloving adim pen Ne cheklang-lo. Israel arat atum, nangtum aphan Ne kaike nangchinghonlo, lasi Ne kechemitmepin akanghon paklang-verpo.

⁴Ne puthot nangtum aphan kimthuji. Nangtum puthot prakso ensi ning arong pen kanji.

⁵Samaria anglong athak nangtum puthot drakha arong eji, lapen ke-e kesom atum drakha arikang athe checholongji.

⁶Kalang, Ephraim anglong-heihei athak kehon atum, ‘Eli Zaion arludam lonang, ha e-Arnam HEMPHU along’ pu kechehangji arni nanglebomlo.”

⁷HEMPHU pulo, “Israel aphan ning arong pen lunnon, kethenei adet atum, nangtum kero alun lunnon, ‘HEMPHU, amethang arat aphan pajok-lo; ahin lapen ke-otekang atum aphan Alang pajok-et-lo.’

⁸Nirep anat Ne latum aphan vanji lapen pirthe kejut pen latum aphan Ne pangrumji. Amek kave lapen kengkok, reng-angsese atum Lapen jejangjidokdok atum penpen latum vangpo.

⁹Ne rat aso atum kechiru pen vangpo, ardombomsi latum vangbompo, kenaibong atovar anat hadak latum patekungkelo. Israel aphan Ne inut po ason plangpo, lapen Ephraim ke Ne so akleng-lo.”

¹⁰HEMPHU pulo, “Det atum, nelam arjutha, lapen Ne lam-heihei ha kehelo talo akung-heihei an pachethangnon. Nerat aso aphan Ne hijikjamlo, bonta latum aphan Ne pangrumji lapen kevi abang le api ahur keton asonsi Ne latum aphan tonpo.

¹¹Israel akhei aphan Ne pajoktang-lo, lapen kangtangrak adet pen Ne pajok-lo.

¹²Zaion anglong athak latum vangsi ning arong pen lun lunpo, lapen Ne dan-heihei pen chehokpo sok-sang adan lapen drakha ahorlang lapen jit ajangthu adan, biresak lapen chainong adan. Latum lang kedungver aberi ason plangpo; Latum kopima kenong dopetpo.

¹³Anke okarjang atum kanpo, lapen ning cheparongpo, risomar lapen sarmar atum aning cheparongpo. Latum aphan Ne aning chepangsampo lapen latum aning keduk Ne ning arong plangpo. Latum aning ke-oi kechehok plangpo.

¹⁴Kurusar atum aphan Ne kechomenei lapen nerat aso aphan akenang pen pangkrangpo. Ne, HEMPHU si keningjelo.”

¹⁵HEMPHU pulo, “Ramah isi ase arjulong-lo, ningduk pen kechiru ase. Rachel ke asomar pen apot chirulo; Latum dam-et-lo, lapen bangpi aphan padok seta kroikrelo.

¹⁶Nang kechiru ingtonnon lapen nang mekri chevennon. Nangsomar aphan nang keklem an Anong-e longledetji lapu kali, Lahei hotur adet pen longthuji.

¹⁷Nang aphi akai aphan ningkethe dolang; nangsomar atum hem chevangthuji. Ne, HEMPHU si keningjelo.”

¹⁸“Israel arat atum ningduk pen kepu ase Ne arjulong, ‘HEMPHU, nelitum ke anem kavenei api asonlo, bonta nang nelitum kekroithekji aphan thanlo. Nelitum aphan vanthunon; HEMPHU, nelitum a-Arnam’ ”

¹⁹Netum Nang pen suilo, bonta nelitum non amat kecheruiji ninghang-lo. Nang netum aphan adukpidet aphi, Netum ningduk pensi chehinphring-lo. Netum therak-lo, ing-ring-lo pima netum riso ahut netum pap klemlo.

²⁰“Israel, nangke Ne kechinghonnei asolo, ne ning kedoknei a-osolo. Nangmen Ne kepinpur Ne ning nangnatsi damjui titi; Ne nangjinsoji.”

²¹Tovar angthek lapen asin bitha; nang ke-o atovar puthot cheri thutha. Vangnon, Israel arat, Nang ke-o arong hem chevangnon.

²²Kekroi kave arat atum, nangtum ni ko-ansi chepasungbom jilangma? Ne ajehak kemirak lapen keprekjek ason pinchongtang-lo, pinso aphanle arloso kerai akeprekjek ason.

²³Israel a-Arnam, Jakongkethe HEMPHU pulo, “Rat aphan amethang adet kepadam ahut, latum puthot Judah adet lapen la rong-heihei longthupo, ‘Jerusalem kangthir anglong HEMPHU pahirjumenang, la Alang kedo kangthir adimlo.

²⁴Rat atum Judah dopo, lapen la rong kedo-an lapen hadak saitiki abang dopo, kevi abang pi ahur pen dopo.

²⁵Kelak atum aphan Ne jakong pamithuji lapen kangchir pen ke-aini atum aphan Ne an pangkrangpo.’

²⁶La apotsi, rat atum pupo, ‘Nemekjang-lo lapen mek-keprang ahut, jakong mirak-lo.’ ”

²⁷Ne, HEMPHU pulo, Israel lapen Judah adet amonit lapen pi kepa-plengsetji arni nanglebomlo.

²⁸Ne angkur kehelang, kevungjok, kevarchor lapen latum aphan kephrintang asonsi Ne latum aphan epo lapen kimpo.

²⁹Halaso apor nangkele ahut, rat atum, “Pei-po atum drakha kethor cholo, bonta asomar ta akethor angnim long-lo,” pupelo.

³⁰La alar, komatma kethor adrakha athe kecho aling abang aso serempo; lapen abangphutin amethang apap pen apot thinangji.

³¹HEMPHU pulo, “Israel lapen Judah arat atum pen kechejok aloh kemi ketokji apor nanglebomlo.

³²Ne methang ari pen latum aphan Ijip adet pen kepon ahut, halatum aphusar atum pen kechetok akechejok aloh barim ason kalilo. Ne halatum apenan asonlo seta, latum halaso akechejok aloh ateng kroikredet-lo.

³³Akemi Akechejok aloh, Israel arat pen Ne kechejokji ke lapuson helo: Ne ron latum aning arlo thapthotpo lapen la latum aning arlo tokdetpo. Ne latum a-Arnam po, lapen latum nerat aso plangpo.

³⁴HEMPHU aphan kechiniji aphan baduta amethang tebok abangphan than nangnelo, pima kadokave oso pen ha kethe anta nephan chinipetpo. Ne halatum apap-heihei diyapo, lapen Ne halatum kechokche-heihei chemathadamdelo. Ne, HEMPHU si keningjelo.”

³⁵Anerlo kepathe-ang aphan HEMPHU arni bilo, Ajo kepaturjisi chiklopi Lapen chiklolongso-heihei bilo. Alang talo pathirlo lapen pangrong-lo, Alang men ke Jakongkethe HEMPHU.

³⁶Pirthe aron ateng dotik an Israel isi akhei dopo pu Alang chechak-lo.

³⁷Jongsi arnisi angbong sining-inghun pun-un pulote, lapen pirthe aputah chini un pulote, ansi Alang Israel arat aphan dengmopo, pima latum kedo-an keklem apot. HEMPHU si keningjelo.

³⁸“Apor nangletang-lo,” pusi HEMPHU pulo, “Ne rongsopi pusi Jerusalem an kimdetpo, Hananel ahem thengsong anichi pen Atok Anghap an,

³⁹lapen ahoi hadak pen ha nichi Gareb anglong an lapen komsi Goah an lepo.

⁴⁰Kedo-an arlok, kethi atum aphan kepip adim lapen kemo an kevar adim, lapen Kidron alangjeng pen ha nihang Losei Anghap an ahidi adang, nephan ingthir-etpo. Rongsopi mononphi seta phangnone mate pavirvedetpo.”