Read Karbi JEREMIAH 32 Bible Online

JEREMIAH 32 - Karbi bible

JEREMIAH 32

¹Judah arecho Zedekiah recho kecho kep aningkan ahut neliphan HEMPHU nepulo, la Bebilon arecho Nebukadnezzar recho kecho krenerkep aningkanlo.

²Halaso ahut Bebilon aron armu Jerusalem aphan tengkheng bomlang, lapen nephan rechohem akut arlo nebengchok-lang.

³Hadak neliphan Zedekiah rechosi nebengchok-lo, lapen HEMPHU keputang alam ne kepachethang apot nebok-lo, alam ke lahelo, “laso arongsopi aphan Bebilon recho pacheraidetji,

⁴lapen Zedekiah ta jokjelo. Alangliphan Bebilon arecho arideng hodaidetpo; alangliphan amek hini pen thek-long-lorpo lapen angno chingkilongpo;

⁵Zedekiah aphan Bebilon pondetpo, lapen alangli hadak ne pupetik an donangpo. Alangli Bebilon aso pen ron chedan seta, alangli haihe. Ne, HEMPHU si keningjelo.”

⁶HEMPHU neliphan pulo,

⁷nang punu Shallum asopo Hanamel alongle Anathoth pu Benjamin alongri along kejorji aphan nanglong nangchoningriji, pima nang helo alangli pen kecheteboknei adonlo, lapen la nang methang aphan kenamji ajakong do.

⁸Anke HEMPHU kepu asonsi Hanamel nelilong vang-lo hadak tikup along lapen longle kenamji aphan nangchoningrilo. Lasi ne chinilo, HEMPHU si neliphan nekepu binong-lo.

⁹Hanamel pen hidi nang namlo, lapen laphan tangka linpilo; anam rup dum krethroksi dolo.

¹⁰Kejor-kenam aloh chetoksi nemen chetok-lo, lapen la haki ta dolo, lapen tangka thuli pen linlo.

¹¹Anke kejor-kenam aloh pakni ta ne enlo, sap kethengtang aloh ke kelang aningkan lapen aron-heihei do, lapen akaprek abang ke jung-jung aloh,

¹²lapen Neriah asopo lapen Mahseiah asupo Baruk aphan pidet-lo. Hanamel lapen kejor-kenam along haki kechodun atum, lapen recho atikup kangnisar atum an angno neli lahei alangliphan pilo.

¹³Halatum kedo-an angno Baruk aphan neli pulo,

¹⁴“Jakongkethe HEMPHU, Israel a-Arnamsi nangphan laso kejor-kenam aloh keponji aphan hukum pilo, sap ketheng lapen jung-jung aloh ta, lapen longle tibuk arlo bi pamenon, anke la arni ke-ong aphan seta dopo.

¹⁵Jakongkethe HEMPHU, Israel a-Arnam pulo, hem-heihei, hidi-heihei lapen drakha aberi-heihei laso adet kejor-kenam dothuji.”

¹⁶Neli Baruk aphan kejor-kenam aloh pidet aphi neli ardomlo,

¹⁷“Keklem-un HEMPHU, pirthe lapen sining-inghun nangli jakong horang pensi pinchong-lo; jat ta nangliphan sungse.

¹⁸Suri-suri abangphan Nang chimitmepin akanghon paklang-lo, bonta apo-apei apap-heihei apot monit aphan Nang adukpilo. Nang ke thedung lapen kangtangrak a-Arnam; nangke Jakongkethe HEMPHU lo.

¹⁹Nang mang pame lapen thedung akam klem; monit keklem asontin Nang thek-long, lapen halatum akam-heihei ateng pen nang nong-epi.

²⁰Hako ahut Nang manghumeme lapen kemong-loi akam-heihei Ijip along klemlo, lapen pini seta Nang Israel angbong lapen akaprek adet atum angbong klembomlang, anke nahokta nangliphan chethangphluppo.

²¹Manghumeme akam lapen kemong-loi angthek-heihei pen ajok netum ahotur aphan papherelo, Nang jakong lapen horang pen Nang rat aso aphan Ijip adet pen Nang vanlo.

²²Halatum aphan Nang laso keplang lapen ho-or kedopik alongle pilo, halatum aphusar atum aphan nangli kechak atengthot-lo.

²³Bonta latum laso alongle nanglut pen la kecherai ahut latum Nang hukum-heihei kroikrelo mate Nang kethan ateng halatum dodelo; latum aphan Nang la kedo-an akevir pavang-lo.”

²⁴Rongsopi kecheraidetjisi Bebilon aso atum kompetsi longle inghan builo, lapen latum tengkheng bomlo. Ron, akhim lapen keso ajok halatum arideng rongsopi dampo. Nang kepu ason an kechekok Nang thek-long-lo.

²⁵Seta, keklem un a-HEMPHU, rongsopi Bebilon aso arideng leji dokdok-lo seta Nangsi neliphan haki kechodun atum angno longle kepanamtoi ahukum pilo.

²⁶Anke HEMPHU neliphan pulo,

²⁷“Ne helo, monit atum a-Arnam, HEMPHU. Nephan thang asonta sungse.

²⁸Laso arongsopi Bebilon arecho Nebukadnezzar lapen aron armu atum arideng hodaidetji; latum la cheraidetpo

²⁹lapen la mekeidutji. Sarnung angsong Baal aphan hijung aphik kethor lapen arnam-heihei atum aphan hor kechor pen ajok nening kepapung ahem penpen halatum la me keidutji.

³⁰Israel lapen Judah arat atum aphurkimo kecheng arni penta latum nephan ning pangsamselo, lapen latum keklemtang akam pen ajok nening papung-lo.

³¹Laso arongsopi arat atum aphan la kekim kecheng arni pen amat nening pathi lapen ning papungpik-lo. La kepavirji aphansi Ne mathathip-lo.

³²Pima kedo-an akehingno akam Judah lapen Jerusalem arat atum, recho lapen ajalin atum, kurusar lapen montri atum keklem apot.

³³Latum nephan ning panungkuk-lo, lapen latum aphan Ne thanbom seta, latum arjuje lapen charlile.

³⁴Latum kehejimmeme akumlin-heihei aphan karchoji kekim kardomhemthepi arlo bilo, lapen la pasa-urtang-lo.

³⁵Latum asopo lapen asopimar Molek arnam aphan karklijisi Hinnom Arlok along Baal aphan dovan-heihei kimpitang-lo. La kepaklemji aphan latum aphan Ne hukum pipe, lapen lason akam latum klemji lapen Judah arat aphan pap paklemji pu nening ta Ne mathathe.”

³⁶Israel Arnam, HEMPHU, neliphan pulo, “Jeremiah, rat atum pulo, ron, kangchir, lapen kesosi laso arongsopi Bebilon arecho arideng dampo. Non Ne kepuji alam arjutha.

³⁷Ne ningkethi lapen nening kepung pen nerat aso aphan adet kaprek hijikjam an aphan Ne pangrumthuji, lapen latum aphan laso adim puthot jokvan pen vanthuji.

³⁸Anke latum nerat aso plangpo, lapen Ne halatum a-Arnam plangpo.

³⁹Latum akai aphan Ne isinat akemangsi pipo: Kadokave akeme aphan lapen halatum asomar akeme aphanlo.

⁴⁰Latum pen Ne jut-un-epin akechechak aloh tokpo. Ne latum aphan akeme akam keklempi sangpipelo, lapen latum kaike nephan aning kedo-an pen papheretoipo, anke latum Ne pen kai seta suiselo.

⁴¹Latum aphan akeme akam keklempi nening cheparongpo, lapen laso alongle along Ne latum aphan pathirthiptoipo.”

⁴²Latum aphan lahei akesung Ne kevan asonthotsi, Ne kechak akeme ason an latum aphan Ne pipo.

⁴³Laso alongle along monit mate marat api kedode isi kejejangtang ajo plangpo, lapen la Bebilon aso aphan pidetpo pusi rat atum pulo. Bonta hidi alongle-heihei puthot laso alongle along namthuji.

⁴⁴Lahei rat atum namji, lapen kejor-kenam aloh chetokji, sap thengji lapen haki choji. La Benjamin alongri plangji, Jerusalem adung arei arong, Judah arong-heihei, inglong akeng-ri-heihei nitur a-Judah plangpo. Rat atum aphan Ne amethang alongle along pachedolongthuji. Ne, HEMPHU si keningjelo.