Read Karbi JEREMIAH 33 Bible Online

JEREMIAH 33 - Karbi bible

JEREMIAH 33

¹Kangsai ahem arlo nangkebeng-chok ahut, HEMPHU abirta nelilong puthot vangthulo.

²HEMPHU, pirthe kethip abang, Alang kepinchong lapen la adimthot kebi abang neliphan pulo. Alang men HEMPHU pu a-Bang pulo.

³“Nephan hangnon lapen Ne nangthakpo; Ne manghumeme ason nangthanpo, lapen nang kechininepin thedung ason nangthanpo.

⁴Ne, HEMPHU, Israel a-Arnam pulo, Jerusalem ahem-heihei, lapen Judah arechohem kekompet lapen ketengkheng apot ingsekji.

⁵Ajehak atum ke Bebilon atum pen chedanpo, latum nening kethi lapen nening kepung pen Ne kepathiji atum abang arpum-heihei hem paplengsetpo. Laso arongsopi pen Ne chetevartang-lo, pima rat atum kehingno akam keklem apot.

⁶Bonta laso arongsopi lapen la rat aphan Ne pameji lapen latum apran pameji. Latum aphan Ne ongdung aningkangsam lapen akejokvan paklangji.

⁷Judah lapen Israel aphan Ne pachingthurthuji, lapen latum aphrang asonthot Ne latum aphan kimthuji.

⁸Ne latum aphan pangthirji, lapen latum apap-heihei lapen latum akethurkrap-heihei Ne diyaji.

⁹Nephan Jerusalem isi ning arong, man, lapen kechipu-iji atiri plangpo; lapen Jerusalem arat aso aphan akeme akam Ne keklempi an lapen laso arongsopi aphuthak ne kepachingthur alam karjulong pirthe adang adettin phereji lapen klemhurji.”

¹⁰HEMPHU pulo, “Rat atum pulo, laso adim ke sangtimili ajo ason, ladak monit mate marat-mareng apita dode. Latum kepu ahok-lo; Judah arong-heihei lapen Jerusalem atovarpi ingthaidang-lo; hadak monit lapen marat apita dode. Bonta lahei adim along

¹¹kechehok lapen ning arong ase lapen piso pangri aning cheparong akecho Ameipi ase nangtum puthot arjuthulongji. Rat atum Ne kardomhemthepi along kero adan-heihei kevan ahut lun kelunjo ase nangtum arjulongji;” latum pupo, “Jakongkethe HEMPHU aphan kero pinon, pima Alang mesen lapen Alang kanghon jut un-e.” Laso adet aphrang asonthot Ne pachingthurthuji. Ne, HEMPHU si keningjelo.

¹²Jakongkethe HEMPHU pulo, la kejejangtang ajo nangnak alongle lapen monit mate marat api kedode adim puthot kevi abang biresak pachopanji aphan bap ajo ponji.

¹³Inglong ajo-heihei, inglong akeng-ri-heihei lapen nitur a-Judah, Benjamin alongri, Jerusalem kompet arong ajo-heihei lapen Judah arong ajo-heihei biresak kevi atum amethang abiresak chelakhapo. Ne, HEMPHU si keningjelo.

¹⁴HEMPHU pulo, “Israel lapen Judah arat aphan Ne kechak ason kepaplengji apor nangletang-lo.

¹⁵Laso ahut David asomar inut dhorom recho Ne ingvaiji. Halaso arecho det adang bithe klempo.

¹⁶Judah lapen Jerusalem arat atum jokji lapen kejokvan pen dolongji. Rongsopi aphan ‘HEMPHU netum kepajok a-Bang’ pusi hangpo.

¹⁷Israel angbong kaita David apotonsi recho chopo pu Ne, HEMPHU chechak-lo.

¹⁸Lapen nephan kepangdukji lapen kephrin athok-heihei, sok-sang adan-heihei, karkli athok-heihei kepiji aphan Levi akhei kaita kurusar atum dopo.”

¹⁹Neliphan HEMPHU pulo,

²⁰“Ne anerlo lapen ajo isi chepathik-lo, anke latum athik apor ahut vangpo, lapen halaso akechepathik ke kai seta phri un-elo.

²¹Lasonthotsi Neban David pen Ne isi chepathik-lo, alangphan recho kechoji apoton doverpo, lapen Levi akhei pen kurusar atum pen Ne chepathik-lo, latum kaiketa nephan ingdukverpo; lapen lahei akechechak kaita phri un-elo.

²²Neban David aso-asu lapen Levi akhei pen kurusar atum aphan Ne pabatpo, latum aphai lakha un-elo, lake sining anghun angsong chiklolongso mate talo akung asangtimili kelakha asonpo.”

²³Neliphan HEMPHU pulo,

²⁴“Ne ketengkheng donni ahemtun Israel lapen Judah aphan ne otang-lo pu rat atum keningje nang arjudunlong loma? La apotsi nerat aso aphuthak latum langrop-lo, lapen latum isi adet akheilo pu tinte.

²⁵Bonta, Ne, HEMPHU si anerlo lapen ajo pen chechak-lo, pirthe lapen sining-inghun kekhangji aron-heihei Ne pinchong-lo.

²⁶La Ne keklem asonthot, Jakob asumar lapen Neban David pen kechechak ason ateng klemji. David asumar angbong inutbak aphan ingvaisi Abraham, Isaak lapen Jakob asomar aphuthak pangripo. Nerat aphan Ne ingjinsoji lapen halatum aphan puthot pachingthurthuji.”