Read Karbi JEREMIAH 34 Bible Online

JEREMIAH 34 - Karbi bible

JEREMIAH 34

¹Bebilon arecho Nebukadnezzar lapen la aron armu Jerusalem lapen la adung-arei arong ketengkheng ahut HEMPHU neliphan pulo, halaso ahut det kedo-an lapen khei kedo-an alangliber kedo-an asong cherapdunlo.

²Israel a-Arnam, HEMPHU, neliphan Judah arecho Zedekiah aphan kepapudamjisi nepulo, “Ne, HEMPHU si Bebilon arecho arideng laso arongsopi hodaidetpo, lapen alang la me keidutpo.

³Nang jokjelo; nangphan nepcheksi alangli rideng hodaidetpo. Alangliphan nang mek hini pen thek-longpo lapen chingkilong-lorpo; anke nang Bebilon dunpo.

⁴Zedekiah, Ne kopima nang lam kepu arjutha. Ron kechedan along nangphan pathithe.

⁵Nang ning ingsamjin pen thilongji, lapen nangphusar nangphrang pare-chotang atum aphan kepip ahut hijung kethordun asonthotsi latum nangphanta hijung thorji. Latum nangphuthak chiruji lapen puji, ‘Netum arecho thitang-lo!’ Ne, HEMPHU si keningjelo.”

⁶Anke laso abirta Jerusalem along Zedekiah along recho aphan neli birta pilo,

⁷laso ahut Bebilon arecho rongsopi tengkheng-lo. Judah adet arlo pairaikom kedo arongsopi, Lakish lapen Azekah aphuthakta ron armu atum tengkheng-lo.

⁸Ibri aban atum, pinso-arlo, Ibri hijan aban keplangpledetji aphan

⁹Zedekiah recho lapen Jerusalem arat atum angbong isi alam cheparailo.

¹⁰Rat atum kedo-an lapen halatum ajalin atum halatum aban atum aphan ban kephlokji aphan cheparailo, lapen halatum aphan puthot ban pinchongchelo. Latum halatum aphan ban phlok-lo.

¹¹Bonta latum aphi aning chelarsi, halatum aphan enthulo, lapen halatum aphan ban paklemthu bor-ilo.

¹²Anke HEMPHU pulo,

¹³Israel a-Arnam rat aphan kepathanjisi neli pulo: Nangphusar atum Ijip adet pen Ne kepajok ahut lapen halatum aphan ban pen kepajok ahut halatum pen Ne kechejok aloh chetok-lo. Ne halatum aphan pulo,

¹⁴throksi kechok aningkanvang latum Ibri aban ningkan throk latum aphan kangduktang abangphan pajok nangji. Bonta nangphusar atum nephan ano chedende mate nelam arjuje.

¹⁵Arni ong-e aphrang nangtumle nangning kechelar asonthot lapen nening kedok akam klemlo. Nangtum kedo-anta nang korte Israel atum aphan kepajokji chedonsarlo, lapen Nephan karcho kardomhemthepi arlo Ne ingno nangtum chechak-lo.

¹⁶Bonta nangtum aning chelarsi Nephan langrop-lo. Halatum kejokji aningkehang aban atum an aphan nangtum che-enthu-et-lo, lapen latum aphan nangtum ban pinchong bor-ilo.

¹⁷Non lasi, Ne, HEMPHU pulo, nangtum Nephan kroikretang- lo. Nang korte Israel aso aphan halatum kelongji ajakong nangtum pidet-lo. Mesenlo, Nesi nangtum aphan kelongji ajakong nangpidet-lo: Ron, keso lapen kangchir pen kethi ajakong Ne nangtum aphan keklem ason pirthe adang adet atum thek-long pen latum a-ok chum-pranlo.

¹⁸Judah lapen Jerusalem achakri atum, rechohem achakri atum, kurusar atum lapen kedo-an ajalin atum latum kethutang achainong alo bengni adak helatsi Ne pen kechejok aloh chepathik-lo.

¹⁹Bonta latum kechepathik alam phrisi lapen la aningkan pajokjedet-lo. La apotsi latum chainong alo aphan keklem asonthot Ne ta latum aphan klempo.

²⁰Latum aphan kepathiji latum ahotur atum arideng latum aphan Ne hodaidetji, lapen latum abang arpum vo lapen marat api atumsi chodetpo.

²¹Lapen Ne Judah arecho Zedekiah lapen aban atum aphan latum aphan kepathiji aningkehang atum arideng hodaidetpo. Nangtum aphan ketengkheng kangtung Bebilon aron armu arideng Ne hodaidetpo.

²²Ne hukum pipo lapen latum laso arongsopi vangthupo. Latum la tengkhengpo, la cheraidetpo, lapen la me keidutpo. Judah arong-heihei Ne sangtimili ajo paplangji, hadak baduta dodelo. Ne, HEMPHU si keningjelo.