Read Karbi JEREMIAH 36 Bible Online

JEREMIAH 36 - Karbi bible

JEREMIAH 36

¹Josiah asopo Jehoiakim Judah arecho kecho phli aningkan ahut neliphan HEMPHU pulo,

²“Lothui enra Israel lapen Judah lapen kedo-an adet aphuthak Ne kepu alam an tok-etnon. Ne nangphan nangkepucheng ahut pen, Josiah recho kecho arni pen non pini arni an asontin tok-etnon,

³Judah arat aphuthak Ne kepavirji pu alam latum aphuthak kevanji nening kehang an alam arjulong pen latum kehingno atovar pen aning chiruiji mene. Anke latum akehingno lapen apap-heihei Ne diyapo.”

⁴Lasi Neriah asopo Baruk aphan neli hang-lo lapen neliphan HEMPHU nekepu ason an Baruk aphan patoktoilo. Lothui along Baruk tok-et-lo.

⁵Anke neli Baruk aphan lahei alam pinkhat-lo: “Nephan kardomhemthepi arlo nepadamlongle.

⁶Bonta puthot rat atum an kehum arni nang hadak dam nangji. Nang ase kethe pen lothui porhenangji, anke nephan HEMPHU nekepu alam an lapen ne nangphan kepatoktoi alam an arjulongpo. La klemnon nangphan abangphutinta karjulongpet adim, Judah arat atum arongtin pen kevang atum anta arjulongpo.

⁷Latum HEMPHU aphan ardompo, halatum kehingno atovar-heihei pen sui tahai mene, pima kepherememe aning kethi lapen aning kepung pen HEMPHU laso arat aphan therlo.”

⁸Lasi ne kepu asonthotsi kardomhemthepi arlo HEMPHU alam Baruk porhepilo.

⁹Judah arecho Jehoiakim, recho kecho pho aningkan, sirkep achiklo, HEMPHU pen kangjinso kelongjisi rat atum an-humlo. Jerusalem along kedo atum an lapen Judah arong-heihei pen hadak kedam atum an an-humlo.

¹⁰Anke rat atum karjuphrong un ahut, nekepu alamthetin lothui pen Baruk porhe-et-lo. La kardomhemthepi arlo, kangsai achunbang, Shaphan asopo Gemariah angdeng pensi la klemlo, bang angdeng ke ha angsong akangsai angdeng kardomhemthepi anghap kemi ajakan adung.

¹¹HEMPHU kopima kepu alam Baruk lothui pen keporhe alam Gemariah asopo lapen Shaphan asupo, Mikaiah arjulong-lo.

¹²Anke alangli rechohem anat damlo, kangsaihem achunbang angdeng, hadak chakri atum an mei dobomlo. Kangsai achunbang Elishama, Shemaiah, Shaphan asopo Gemariah, Hananiah asopo Zedekiah lapen akaprek aban atum hadak dolo.

¹³Rat aphan Baruk keporhepi alam an latum aphan Mekiah than-et-lo.

¹⁴Anke chakri atum Baruk aphan alangli rat aphan keporhepi alohthui kevanpijisi Jehudi aphan toilo. Baruk lahei alohthui vanpilo.

¹⁵“Ingninon,” latum pulo, “lapen netum aphan lothui neporhepitha.” Lasi Baruk klemlo.

¹⁶Alangli la porhedet aphi, latum lahin lahin pherehiksi chelangseroilo, lapen Baruk aphan pulo, “netum la recho aphan thanveknangji.”

¹⁷Anke latum alangliphan arjulo, “Nang kopusonsi la tok-loma, netum aphan non nethantha?” “Jeremiah si nangphan nangpatoktoima?”

¹⁸Baruk thak-lo, “La athetin ta Jeremiah si nepatoktoilo, lapen laso alohthui along ne si sahi pen tok-lo.”

¹⁹Anke laphan latum pulo, “Nangli lapen Jeremiah damra chepatu damjoinon. Nangtum kodaksi kedoma baduta nang pachinidun longrinon.”

²⁰Chakri atum Elishama, kangsai ahem achunbang angdeng arlo lothui patujoilo, lapen recho kangsaihem damsi latum kadokave alam recho aphan thanlo.

²¹Anke Jehudi aphan lothui kepavanjisi recho toilo. Elishama angdeng pen la ensi recho aphan kekompet karjapphrong achakri kedo-an aphan porhepilo.

²²La ningkreng ahut lapen recho ta ningkreng arechohem me adungsi kangni.

²³Jehudi ingdeng kethom mate ingdeng phli anbak porhedet aphi, nokso pen recho lahei chorprup-lo lapen lahei me phrindut-lo. Lothui me cho-et etik alangli la klemlo.

²⁴Bonta recho lapen achakri la karjulong atum an thangta pherere mate thangnat aning ke-oi angthek thek-longle.

²⁵Elnathan, Delaiah lapen Gemariah atum recho aphan lothui me phrinri pu choning-ri seta latum aphan alangli ano chedendedet-lo.

²⁶Anke rechoso Jerahmeel, lapen Aziel asopo Seraiah lapen Abdiel asopo Shelemiah atum aphan alangli hukum pisi neliphan lapen neli chunbang, Baruk aphan panep-lo. Bonta nelitum aphan HEMPHU si patujoilo.

²⁷Baruk aphan ne kepatoktoi alohthui Jehoiakim recho me phrindut aphi, neliphan HEMPHU pulo,

²⁸akaprek alohthui en pen kecheng alohthui along ketok ason an nepatoktoilo.

²⁹Recho aphan kepathijisi HEMPHU neliphan pulo, “Nang lothui me phrindut-lo, lapen Bebilon arecho vangsi laso adet pavirdetpo, lapen laso arat lapen api anta pathilappo pu kopisi Jeremiah ketok-loma nang arjulong-lo.

³⁰Lasi non, Ne HEMPHU, nang Jehoiakim recho aphansi pulo, nangso-nangsu atum David adet pang-ri longlelo. Nangbang arpum hadak nangvarchorpo lapen anerlo arni atur along klangsakpo, lapen ajo ar-e inghuthippo.

³¹Ne nangphan lapen nangso-nangsu aphan, lapen nangban atum aphan adukpiji pima nangtum kedo-an pap-heihei keklem apot. Nang ha Jerusalem lapen Judah arat atum ta Ne kepacheretoi alam-heihei arjuje. La apotsi nangtum kedo-an aphuthak kepapherememe akevir Ne vanpo.”

³²Anke ne akaprek alohthui ponlo lapen ne chunbang Baruk aphan la pilo, lapen ne kepu alam an la tok-et-lo. Kecheng alohthui along kedo ason an la tok-et-lo, lapen aphrang asonthot abirta si ne laphan patoktoilo.