Read Karbi JEREMIAH 37 Bible Online

JEREMIAH 37 - Karbi bible

JEREMIAH 37

¹Jehoiakim asopo Jehoiachin alar Josiah asopo Zedekiah aphansi Bebilon arecho Nebukadnezzar ke Judah arecho pinchong-lo.

²Bonta Zedekiah, lapen achakri atum lapen rat atum anta neliphan HEMPHU ne kepi abirta kroimolo.

³Shelemiah asopo Jehukal lapen Maaseiah asopo Jephaniah aphan det apharman HEMPHU Arnam aphan ne kepardomjisi Zedekiah recho toilo.

⁴Nephan phatek nebengbelang lapen rat angbong dam-vang long lang.

⁵Bebilon aron armu atum Jerusalem kompet-lo, bonta Ijip aron armu atum Ijip adet ahoi hat tang-lo, pu latum arjulongsi, latum aphi chiruilo.

⁶Anke HEMPHU, Israel a-Arnam, Zedekiah aphan kepapujisi neliphan pulo,

⁷Ijip aron armu atum nangphan nangkeparapjisi tovar nangbartang-lo, bonta la ahem chiruijuiji.

⁸Anke Bebilon atum vangthupo, rongsopi tengkhengpo, la cheraidetpo, lapen la me keidutpo.

⁹Ne, HEMPHU si nangphan nangpacheretoilo, Bebilon aron armu vangthuthelo pu matha pen nangmethang aphan chepachobeiri, pima latum vangji.

¹⁰Nang jongsi kedo-an Bebilon aron armu aphan paremdet seta, halatum apehem-heihei ketilai areng kesotang amonit atum thursi laso arongsopi me keidutji.

¹¹Bebilon aron armu atum Jerusalem pen chiruilo, pima Ijip aron armu atum nanglebomlo.

¹²La apotsi ne Jerusalem olo lapen nehemtun akhi kecheraidamjisi ne Benjamin alongri damjuilo.

¹³Bonta ne Benjamin anghap kele ahut hadak kedo ron aso atum aketor, amen Irijah, Shelemiah asopo, lapen Hananiah asupo, neliphan khang-lo lapen pulo, “nang Bebilon atum anat kat tang-lo!”

¹⁴Neli thak-lo, “Katke! Ne katke.” Bonta Irijah nelilam arjujedet-lo. Alangli neliphan nepcheksi chakri angno nepondet-lo.

¹⁵Halatum neli-phan aningthipik-lo lapen neliphan kepathengjisi hukum pilo, lapen Jonathan kangsaihem achunbang ahem arlosi nebengthot-lo, alangli hem phatek pinchongdet-lo.

¹⁶Neliphan longle arlo ahilik penang an arni nebilo.

¹⁷Aphi neliphan Zedekiah recho hang-lo, lapen hadak rechohem along neliphan arjujoilo, “HEMPHU pen pine abirta doma?” Do, Neli thak-lo lapen pulo, “Nang-liphan Bebilon arecho arideng hodaidetpo.”

¹⁸Anke neli arjulo, “Nang-phan chakri mate det aphan neli kopi akehingnosi keklemlo?

¹⁹Bebilon arecho nangli det tengkhengkhelo pu kepu, nangli montri atum non konat-lo?

²⁰Non, nangli recho, neli lam karjuji aphansi neli nang choningrilo lapen neli kopima kepu lale klemnon. Kanghon pen Jonathan ahem neliphan phatek nelibengthurinon. Nangli jongsi klem lote, hadak amat ne thilotpo.”

²¹Lasi neliphan rechohem atikup along kebengjisi Zedekiah recho hukum pilo. Neli hadak dolo, rongsopi him dotik ke neliphan arnivang hem pen eplang kepangdang ahim nelipilo.