Read Karbi JEREMIAH 38 Bible Online

JEREMIAH 38 - Karbi bible

JEREMIAH 38

¹Mattan asopo Shepatiah, Pashhur asopo Gedaliah, Shlemiah asopo Jehukal, lapen Mal-kiah asopo Pashhur atum rat aphan ne kepu alam arjulong-lo. HEMPHU si pulo,

²“Rongsopi along kedo atum an ron mate kangchir mate keso pen ajok thiji. Bonta dam pen Bebilon arecho arideng kechehodaidet abang aling thithedetji, alangli apran anke jokji.”

³Halatum aphan HEMPHU kepu alam neli thanlo, “Bebilon aron armu arideng Ne rongsopi pidetpo, lapen latum la cheraidetpo.”

⁴Anke chakri atum recho along damsi pulo, “Laso amonit aphan pathilot nangji. Lason alam keningje pen ajok rongsopi aron armu atum ning parunlo, lapen rongsopi along kedo ahin arat an aphan ta la isinatsi klemlo. La rat atum aphan rapdunde; latum aphan la kephangnojisi bor-irong.”

⁵Zedekiah recho thak-lo, “Mesenlo, laphan nanglitum kopima nangning kehang alingle klemnon; ne nangtum aphan khangkhelo.”

⁶Anke latum neliphan pondet-lo lapen Malikiah rechoso alangtuk arlo arri pen nepasunlo, la rechohem atikup along. Langtuk arlo lang ave, inghan chot, lapen ne hadak inglimchok-lo.

⁷Tebonseta, Sudan aso kasi-entang abang Ebedmelek, rechohem kam keklem abang neliphan langtuk arlo nevarthot-lo pu arjulong-lo. Halaso ahut recho ke Benjamin anghap along ingsaibomlang.

⁸Lasi hadak Ebedmelek damsi recho aphan pulo,

⁹“Recho, lahei amonit atum keklem chokche, latum Jeremiah aphan langtuk arlo jokthot-lo, hadak kangchir pen alangli thipo, athema rongsopi nahokta an ave.”

¹⁰Anke Ebedmelek aphan bangkethom amonit pacheponjisi hukum pilo, lapen neliphan neli thithe ako parungtoilo.

¹¹Anke monit atum penpen Ebedmelek rechohem mar puru anat damlo, lapen pe kerak ensi arri pen neli nat pasunlo.

¹²Arri along peban pen nelivengkong pachevekjisi alangli neliphan pulo, anke arri pen ajok neli reng aban damthorthedetpo. Neli la klemlo.

¹³Lapen latum neliphan langtuk arlo pen angsong nerungtang-lo. Lasi aphi neliphan kangsaihem atikup alongsi nebilo.

¹⁴Akaprek aphong Zedekiah recho neliphan kardomhemthepi kethom ajakan along nevandet-lo, lapen alangli pulo, “Neli nangliphan ethe alam arjuji, lapen nangli ahokpet pen nethak-etji aphan nelininghang-lo.”

¹⁵Neli thak-lo, “Neli jongsi ahok alam ningje lote, nangli neliphan pathilotpo, lapen neli jongsi nangliphan parete nangli no chedendedetpo.”

¹⁶Lasi Zedekiah recho neliphan chechak-lo, “Kereng-et Arnam ephan chethe ekepi a-Arnam amen pen neli semetang-lo, nangliphan neli pathithelo, mate nangliphan kepathiji atum amonit arideng nanghodaidelo.”

¹⁷Anke neli Zedekiah aphan Jakong-kethe HEMPHU, Israel a-Arnam si kepulo pu thanlo, “Bebilon arecho achakri arideng jongsi nangli chehodai lote, nangli chethe rengji lapen laso arongsopi me ke-ikelo. Nangli lapen nangli hem asor anta rengji.

¹⁸Bonta nangli jongsi chehodaide pulote, laso arongsopi Bebilon aso arideng hodai-detpo, latum la me keidutpo, lapen halatum arideng pen nangli jokjelo.”

¹⁹Bonta recho thak-lo, “Ne nedet aso Bebilon adet kekat atum aphan pherelo. Latum nephan halatum arideng nehodaidet tahai, lapen nechenek-ot tahai.”

²⁰Neli pulo, “Halatum arideng neliphan hodaide, HEMPHU abirta kekroiji aphansi neli nangchoningrilo; anke kadokaveta mesenpo, lapen nangli pran ta jokpo.

²¹Bonta nangli jongsi chehodai damde pulote kopi plang poma HEMPHU neliphan paklang-et-lo.

²²Judah arechohem along kedo a-arloso atum an aphan Bebilon achakri atum kepon neli la kepaklang along thek-long-lo. Latum kedambom-un ahut kopisi keningjeloma arjutha:” Recho kemenei ajirpo abang alangliphan chongthuidet-lo, latum alangli phuthak arlukrak-lo. Non alangli keng inghan ajo sak-lut-lo, laphan ajirpo atum o-et-lo.

²³Anke neli puthulo, “Bebilon aso anat nangli piso lapen nangli somar atum aphan pondet-lo, lapen halatum pen nangli methang ta jokjelo. Nangliphan kebengpon asonsi Bebilon arecho nangpondetpo, lapen laso arongsopi me pachodetpo.”

²⁴Zedekiah thak-lo, “Laso akechingki alam baduta pachini longledetnon, lapen nang kai sungselo.

²⁵Nang pen ne kechingki alam chakri atum arjulong-lok-lo pulote, latum vangsi etum kechingki alam nangphan arjuji. Halatum aphan kadokave alam nang jongsi than-et pulote nangphan nang pathithelo pu semetangji.

²⁶Puthot kebengthotthera hadak kethithedetji aphansi nelong kechoningriji pu halatum aphan thannon.”

²⁷Anke kedo-an achakri nelong vangpak-lo, lapen neliphan arjulo, lapen recho neliphan kepaningjetoi atengthotsi neli latum aphan thanlo. Latum thangta nevi un-e, pima kechingki alam baduta nang arjudun longle.

²⁸Lapen neliphan rechohem atikup along Jerusalem kekompet arni nangleletik nebilo.