Read Karbi JEREMIAH 39 Bible Online

JEREMIAH 39 - Karbi bible

JEREMIAH 39

¹Zedekiah, Judah arecho kecho sirkep aningkan, kep achiklo, Bebilon arecho Nebukadnezzar alangli ron armu kedo-an pen vangsi Jerusalem tengkheng-lo.

²Zedekiah recho kecho kre-isi aningkan phli achiklo, sirkep arni rongsopi apaisong-heihei chinghang-et-lo.

³(Jerusalem cheraidet ahut, Bebilon arecho achakri atum vangpetsi Angbong anghap along adim chedorep-lo, latum angbong Nergal Sarezar, Samgar Nebo, Sarsekim, lapen anut kaprek Nergal Sarezar dolo)

⁴Zedekiah recho lapen kedo-an achakri atum kopi plang-loma thek-longsi latum rongsopi pen ajo kekatji bor-ilo. Recho aberi pen latum damsi ha paisong hini kechetok anghap atovar anat soding damlo, lapen Jordan Arlok anat damlo.

⁵Bonta Bebilon aron armu atum hangdunlo lapen Jeriko adung athoi along Zedekiah aphan nepchek-lo. Anke alangliphan ha Nebukadnezzar recho along pondet-lo, alangli halaso ahut Riblah arongsopi Hamtha alongri alongsi do, lapen hadaksi alangli phuthak Nebukadnezzar lam parailo.

⁶Riblah along alangli Zedekiah asopomar atum aphan Zedekiah amek angden pathilo lapen alangli Judah achakri atum aphan ta apran enlo.

⁷Laso aphi, alangli Zedekiah amek hini horjok-lo, lapen Bebilon kepondetjisi alangliphan ingchin arri pen ingnanghet-lo.

⁸Halaso ahut amat Bebilon aso atum rechohem lapen rat atum ahem-heihei me keilo, lapen Jerusalem apaisong-heihei ingsekphlinlo.

⁹Kejut, Nebukadnezzar, hukum ahemphu, rongsopi along kedo-an arat lapen alanglilong kekat atum penpen kebengponjisi Bebilon adet ponlo.

¹⁰Keduknei arat, ahem-arit kavedet atum aphansi alangli Judah adet bitekangchot-lo, lapen latum aphan alangli drakha aberi lapen hidi-heihei pilo.

¹¹Bonta Nebukadnezzar hukum ahemphu Nebuzaradan aphan lahei ahukum kepapijisi hukum pilo:

¹²“Damra Jeremiah aphan ridamnon lapen alangliphan pasung-ri, bonta alangli ningkehang alingle alangliphan klempinon.”

¹³Lasi Nebuzaradan, lapen achakri kethe Nebushazban, Nergal Sarezer atum penpen lapen Bebilon arecho achakri kedo-an,

¹⁴rechohem atikup pen neliphan vanlo. Ahikim asopo, lapen Shaphan asu Gedaliah aridengsi latum neliphan nehodailo, alangli ke nelihem kelongji aphan lang-lo. Lasi hadak rat atum angbong neli dolo.

¹⁵Rechohem atikup along neliphan nebenghet ahut Sudan aso Ebedmelek aphan Jakongkethe HEMPHU, Israel a-Arnam kepu alam kepathanjisi HEMPHU neliphan pulo,

¹⁶“Neli kepu ateng Ne klem un, Ne laso arongsopi aphuthak kevir vanpo, kechingthur kali, lapen la plang lote nang la hadak thek-longji.

¹⁷Bonta Ne HEMPHU si nangphan nangraipo, lapen nang kephere amonit atum arideng nang hodaidelo.

¹⁸Ne nangphan pajokvanji, lapen nangphan pathilot-le. Nangchethe jokji pima nang nephansi chikilo. Ne, HEMPHU si keningjelo.”