Read Karbi JEREMIAH 40 Bible Online

JEREMIAH 40 - Karbi bible

JEREMIAH 40

¹Ramah along hukum ahemphu Nebuzaradan nepajokdet aphi HEMPHU neliphan Bebilon ban kepon Jerusalem lapen Judah arat atum an pen neliphan ta ingchin arri pen ingnangsi neponlo.

²Hukum ahemphu neliphan ahin kaprek anat nepondetsi nepulo, “Laso adet aphan kevir detjisi nangli Arnam HEMPHU labangso adet aphan therlo

³lapen non Alang kepu ateng klemlo. La kedo-an plang-lo pima nangli rat atum HEMPHU aphan langphlotsi pap-heihei klemlo lapen alangliphan kroikrelo.

⁴Non, nangliri arri neli phlok-lo lapen nangliphan neli lang pamepo. Bonta, nangli jongsi kedunji ninghanghe pulote nangli nangdun nangnelo. Det adang an nangli chongvai tame lapen nangli ningkehang aling damtame.”

⁵Neli thakthedet ahut, Nebuza-radan neli pulo, “Ahikim aso lapen Shaphan asu Gedaliah along chedamthunon alangliphansi Bebilon arecho Judah a-Govornor bat-lo. Nangli alanglilong dodun tame lapen rat angbong doduntame, mate nangli ningkehang aling damtame.” Anke neliphan alangli isi adan nepilo, lapen kechoponji aphan ajehak a-an lapen neli tovar nepadam long-lo.

⁶Mizpah along neli Gedaliah pen dorap-rap-lo, lapen det ke-otekang ahin arat angbong neli dodunlo.

⁷Ajehak Judah achakri atum lapen ron aso atum chehodaidelang. Bebilon arechosi Gedaliah aphan det a-Govornor bat-lo pu lapen det keduknei arat Bebilon keponpe atum an aphuthak ahemphu bat tekang-lo pu latum arjulong-lo.

⁸Lasi Nethamiah asopo Ishmael, Kereah asopo Johanan, Tanhumeth asopo Seraiah, Netophah pen Ephai asomar, lapen Maakah pen Jezaniah atum amethang amonit atum penpen Mizpah anat Gedaliah along damlo.

⁹Halatum aphan Gedaliah pulo, “Neli nanglitum aphan chechak-lo, nanglitum Bebilon aso aphan kechehodaiji phere-nangne. Laso adet-le donon, Bebilon arecho aphan ingduknon, lapen la kadokaveta mesenpo.

¹⁰Ne methang ta Mizpah along dopo lapen neli ke Bebilon aso atum hadak vang-lote, nanglitum ketoidun abang plangpo. Bonta nanglitum drakha alang, thesere, lapen Jit ajangthu pangrum longji lapen chebilongji, lapen nanglitum kelang arong dolongji.”

¹¹Halaso ahut Moab, Ammon, Edom lapen akaprek adet kedo Israel atum anta ajehak a-Israel atum aphan Bebilon aso atum Judah adet pachedo long-lo pu lapen Gedaliah aphan govornor bat tekang-lo pu arjulong-lo.

¹²Lasi halatum kechongvir adim che-osi, Judah chevangthulo. Latum Gedaliah along vang-lo, ha Mizpah along, lapen hadak latum ongdung adrakha alang, lapen thesere pangrumlo.

¹³Laso aphi, Johanan lapen ron aso atum ajalin kechehodaide atum Gedaliah along Mizpah anat vang-pak-lo.

¹⁴Lapen alangliphan pulo, “Nangliphan kepathijisi Ishmael aphan Ammon arecho Baalis nangtoilo pu nangli chechininema?” Bonta Gedaliah la kroithekthedet-lo.

¹⁵Anke Johanan alangliphan pujoilo, “Ishmael aphan kepathijile neliphan padamlongnon, lapen la komatsi keklemloma baduta nangchinidundedetpo. Kopisi la nang-liphan pathilongpo? La ajok alangli dung arei kedo-an a-Judah atum aphan papratseilo, lapen Judah kedo arat aphan isi akevir vangpo.”

¹⁶Bonta Gedaliah thak-lo, “La klemri! Ishmael aphuthak nangli keningje alam ahok kali!”