Read Karbi JEREMIAH 41 Bible Online

JEREMIAH 41 - Karbi bible

JEREMIAH 41

¹Halaso aningkan amat throksi achiklo, Nethaniah asopo lapen Elishama asupo, Ishmael, inut recho ahemtun abangphu lapen recho akethenei achakri, Gedaliah aphan kelangdamjisi bangkep amonit penpen Mizpah damlo. Halatum kadokave an kechorappet ahut,

²Ishmael lapen bangkep amonit atum nok chesansi Gedaliah aphan pathilot-lo.

³Mizpah along kedo-an Israel aso lapen hadak kedo Bebilon aron aso an aphan Ishmael pathilo.

⁴Puthot arni Gedaliah aphan kepa-thi alam bang kaprek chini aphrang-lo.

⁵Bang Shekem, Shiloh lapen Samaria pen bang throknerkep amonit atum vang-lo. Latum angmum chesoi-et, halatum achoi chingsek-et, lapen areng cherot-ak-ak-lo. Latum sok lapen mephik kardomhemthepi along athok kepijisi ponlo.

⁶Halatum aphan kechetongdunjisi Mizpah pen Ishmael damlo, alangli chiruponbomsi damlo. Halatum angno nanglesi alangli pulo, “vang-ra Gedaliah aphan nanglangtha.

⁷Latum rongsopi arlo nanglut-et aphi, Ishmael la along kedo bangkep amonit atum latum aphan pathilo lapen halatum abang arpum isi alangtuk arlo var-et-lo.”

⁸Bonta bangkep asong amonit atum Ishmael aphan pulo, “kanghon pen nelitum aphan pathirinon! Nelitum soktipli, soktipliso, jit ajangthu lapen pijo alang hidi-heihei ajo kepatu do.” Lasi latum aphan alangli pathithedet-lo.

⁹Ishmael kepathitang amonit atum aphan kejok alangtuk thepik, la Asa recho aphan Israel arecho Baasha ketengkheng ahutsi ketuk. Kethitang arpum penpen si Ishmael langtuk paplengset-lo.

¹⁰Anke alangli recho asopimar atum aphan nepchek-lo, lapen Mizpah along kedo-an arat aphan bengponlo, lahei Nebuzaradan, hukum ahemphusi Gedaliah arideng kepalangji aphan hodailo. Ishmael latum aphan neppon-etsi Ammon alongri anat kebar pangcheng-lo.

¹¹Johanan lapen alangli long kedo aron armu ajalin atum an Ishmael pran karmut kechoklem akam arjulong-lo,

¹²lasi latum amonit penpen la aphi chephodunlo.

¹³Ishmael keneppon amonit atum Johanan lapen la along kedun ron asong jalin atum aphan thek-longsi, latum aning arong-olo.

¹⁴Lapen chetevarsi latum anat kat-lo.

¹⁵Bonta Ishmael lapen bang nerkep amonit atum Johanan pen chepajoksi Ammon adet katjuilo.

¹⁶Anke Johanan lapen ron asong jalin atum Gedaliah aphan Ishmael pran karmut akam plangdet aphi Mizpah pen kepon ron aso atum, arloso atum, osomar atum lapen kasi-entang atum aphan cheparideng-lo.

¹⁷Latum Bebilon aso aphan pherelo pima Gedaliah aphan Ishmael pran karmut apot, athema laphan Bebilon asorsi a-Govornor bat-lo.

¹⁸La apotsi, Bebilon aso pen kejokji aphan latum Ijip adet damjuilo. Tovar ebeng Bethlehem adung Chimham pu adim latum sang-lo.