Read Karbi JEREMIAH 42 Bible Online

JEREMIAH 42 - Karbi bible

JEREMIAH 42

¹Anke ron armu ajalin atum, Kareah asopo Johanan lapen Heshaiah asopo Azariah atum rat atum penpen nelilong vangsi pulo,

²“Kanghon pen nelitum kopisi kecho-ningrima klem iktha! Nelitum aphan elitum a-Arnam HEMPHU aphan ne ardom pitha. Nelitum kerenglang atum an aphan ne ardom pitha. Ehut isi nelitum ongdung-lo; bonta nonke nangli nelitum aphan thek-long-lo, nelitum ong-e.

³HEMPHU, nelitum a-Arnam nelitum kedam nangji lapen nelitum keklem nangji atovar kepaklangjile ardomnon.”

⁴Neli thak-lo, “Mesenlo, neli HEMPHU e-Arnam aphan nanglitum kechoning-ri ateng ardompo, lapen Alang kepu alam an nanglitum aphan thanpo. Nanglitum aphan thang alam ta khangkhelo.”

⁵Anke latum neliphan pulo, HEMPHU le elitum angbong ahok pen kekroithirklong ahaki paplang lonang, jongsi nangliphan HEMPHU elitum a-Arnam nangkepi ahukum an kroikre pulote,

⁶Alang etum aphan mesen non mate hingnodaknon, nelitum nelitum a-Arnam HEMPHU aphan kroithippo, Alangphansi nelitum kardom choningrilo. Alangphan eli kroi lote, eliphan mesenpo.

⁷Nikep aphi neliphan HEMPHU pulo,

⁸Lasi Johanan lapen alanglilong kedo ron armu ajalin atum lapen akaprek atum an aphan hangrappet-lo.

⁹Latum aphan neli pulo, “Israel a-Arnam HEMPHU, Alangphansi nanglitum neli-phan kepachoningritoi alam aphuthak Alang pen akethak lahelo.

¹⁰Nangtum jongsi laso alongle along kedobomji nangning hang bomlang pulote, ne nangtum aphan nangkimji lapen nang-ingsekselo; nangtum aphan nang-eji lapen nangphurjokjelo. Nangtum aphuthak ne kevan akevir nephan ning pa-oilo.

¹¹Bebilon arecho aphan kephere ingtonnon. Ne nangtum along dolo, lapen la ajakong pen Ne nangtum aphan nangpajokji.

¹²Pima Ne kangjinso pen plengset. La nangtum aphuthak Ne nang pangjinsoji, lapen nangtum aphan hem pachedamlongji. Ne, HEMPHU si keningjelo.”

¹³Bonta nang Judah along kedo arat atum nang Arnam, HEMPHU aphan kroikre nangne lapen laso alongle along domo nangne.

¹⁴Nangtum lason pu nangne, “kali, Ijip along dodamji, hadak netum ron phonangne mate ron kehangjo ase arjulongle, mate ingchirche.”

¹⁵Lason nangtum pulote, Jakongkethe HEMPHU, Israel a-Arnam pupo, “nangtum jongsi kedamji aphan mathathip-lo lapen Ijip adet dodampo pulote,

¹⁶nangtum kepherebom aron nangtum aphan nangropo, lapen nangtum kepherenei akangchir nangtum aphi phi nanghungdunpo, lapen hadak Ijip along amat nangtum thipo.

¹⁷Kedamji pu kemathathip arat kedo-an lapen Ijip adet kedoji atum an ron pen thi-etji. Inutnat ta reng-relo, lapen latum aphuthak Ne kevanji akevir pen baduta jok un-elo.”

¹⁸HEMPHU, Israel a-Arnam pulo, Ne ningkethi lapen kesedengpik asonsi Jerusalem arat aphuthak dungpo, lasonsi nangtum Ijip damlote nangtum aphuthak Ne ningkeso dungpo. Nangtum aphan kelang pherememepo; monit atum nanglangroppo, lapen nangtum amen pen ington ipo. Puthot nangtum laso adim thek-longledetpo.

¹⁹Anke neli pubomlo, “nangtum Judah along ahin kedo arat atum aphan Ijip damrinon pusi kepu. Lasi non nanglitum aphan neli cheparelo,

²⁰nanglitum kehingnonei eson let tang-lo. Nangtum elitum a-Arnam, HEMPHU aphan kepardomjisi neliphan nangchoningrilo, lapen alangli hukum kepi an nanglitum kroipo pusi chechak-lo.

²¹Lapen non neli nanglitum aphan pulo, bonta nanglitum aphan kepathanjisi HEMPHU, elitum a-Arnam neliphan nangketoi alamthetin kroikrelo.

²²La apotsi, laso alam ning chebinon! Nanglitum ron pen mate kangchir pen mate keso pen nanglitum kedamji lapen kedoji adim thipo.”