Read Karbi JEREMIAH 44 Bible Online

JEREMIAH 44 - Karbi bible

JEREMIAH 44

¹Ijip along Migdol, Tahpanhes lapen Memphis arongsopi-heihei along kedo Israel aso lapen det arlo anitur ahin an alam neliphan HEMPHU nethanlo,

²Jakongkethe HEMPHU, Israel a-Arnam pulo, “Nang mek angden Ne Jerusalem lapen Judah arlo kedo arongsopi-heihei aphuthak kevan akevir thek-long-lo. Non anta lahei keruhupsi dolang, lapen lahei along baduta dode.

³Pima halatum arat kehingno akam klemlo, lapen nephan nening papung-lo. Latum akaprek a-arnam atum aphan athok pilo lapen latum amethang lapen latum aphusar atum anta aphrang karchoche pinlang a-arnam-heihei aphansi ingduk-lo.

⁴Nangtum anat neban montri atum aphan nangtoibomlo, lason kepherememe Ne kehijim ason klem nangne pu nangtum aphan latum nangthanlo.

⁵Bonta nangtum arjuje mate nangno chedende. Akaprek a-arnam-heihei aphan athok kepi kehingno akeseke ason nangtum che-o un-e.

⁶Lasi Ne ningkethe an lapen Ne ningkepung an Judah arong-heihei lapen Jerusalem atovarpi-heihei athak dung-lo, lapen lahei Ne me keidut-lo. Lahei ruhup-lo, lapen pini anta lahei kelang pherememelo.”

⁷Lasi Ne, Jakongkethe HEMPHU, Israel a-Arnam nangtum aphan arjulo, kopi athesi nangmethang aphan lapuson kehingno akam nangtum klemloma. Nangtum pinso-arlo, osomar lapen oso thi-i aphuthak akevir van ingtung-loma, anke nangrat atum virdetsi avepinpo.

⁸Kopi athesi nangtum kumlin-heihei karcho pen ajok lapen nangtum kedojisi kevang ahut Ijip along akaprek arnam-heihei aphan athok kepi pen ajok nephan ning papung-loma? Nangtum methang aphuthak kechepavirji pu nangtum la keklemloma, anlote pirthe athak adettin ta nangtum aphan langroppo lapen nangtum amen ensi amahang pahangtoi poma?

⁹Nangphusar atum, Judah arecho atum lapen apiso atum nang lapen nangpiso atum Judah arong-heihei along lapen Jerusalem atovarpi-heihei along kehingno akam keklemtang alam nangtum chetengne-et-loma?

¹⁰Bonta pini arni anta nangtum chepabihek-helang. Nephan man pipe mate nangtum lapen nangphusar atum aphan Ne nangkepi aron kedo-an ateng penta dode.

¹¹La apotsi Ne, Jakongkethe HEMPHU, Israel a-Arnam, nangtum abe thursi lapen Judah kedo-an pavirpo.

¹²Judah ahin arat lapen Ijip adet kedodamji atum halatum kevir-etji aphan Ne cholangdingpo. Latum kedo-an, kethe-kebi, Ijip along ron pen mate kangchir pen tame thipo. Latum aphan kelang pherememepo; latum aphan monit atum pinremhurpo, lapen latum amen ensi chington-ipo.

¹³Ijip along kedo atum aphan ron pen, kangchir pen lapen keso pen aduk kepi asonthot,

¹⁴Judah along ahin arat nang kedo atum abangphutinta jokje mate reng-re. Latum kechedothuji Judah along inutnat ta chevoi longlelo. Ke-ong-e kekat chepachong atum apar baduta chevoithuthelo.

¹⁵Anke akaprek arnam-heihei aphan apiso atum athok pibomlo pu kechechini apinso atum, lapen hadak karjapphrong a-arloso atum kedo-an Ijip arlo nitur ahin kedo a-Israel aso atum an isi ongdung armu kedo-an neliphan pulo,

¹⁶“HEMPHU amen pen nang netum aphan keningje alam an netum arjuje.

¹⁷Netum keklemji pu kepu ason an netum klem-etji. Netum a-arnampi, sining arechopi aphan athok piji, lapen bangpi aphan netum hor chorji, netum lapen nephusar atum, netum arecho atum lapen song jalin atum Judah arong-heihei along keklem asonthot netum klemji. Anke netum an dorphlup-lo, netum chingthurlo, lapen sungsepin.

¹⁸Bonta Sining Arechopi aphan netum athok kepi kangton lapen bangpi aphan hor kechor kangton arni pen netum thangnat ta ave, lapen nerat atum ron pen lapen kangchir pen thilo.”

¹⁹Lapen arloso atumta pulo, “Sining arechopi arje asonthot netum him kepaplang ahut, bangpi aphan athok kepi ahut, lapen bangpi aphan hor kechor ahut netum keklem akam ne penan atum anta nang chedondunlo.”

²⁰Lasi neliphan lason nekethak apinso lapen a-arloso atum an aphan neli thaksi pulo,

²¹“Nanglitum lapen nangliphusar atum, nangli recho atum, nangli jalin atum, lapen Judah kedo-an arat atum, rong-heihei lapen Jerusalem atovarpi along kepi athok-heihei aphuthak HEMPHU lahei chinine mate lahei tengne-et-lo putong nanglitum kemathama?

²²Pini arni amat nanglitum adet rutang-lo, lapen baduta la do abang avelo. La kelang pherememelo, lapen monit atum kechington ahut laso amensi enlo, pima nangtum kehingno lapen kehingno keseke akam-heihei apot HEMPHU chepaningding un-elo.

²³Laso akevir non nangtum akaprek a-arnam-heihei aphan athok pitang-lo, lapen Alang hukum kedo-an kroikre pen ajok Alangliphan langplotsi pap klemtang-lo.”

²⁴Kadokave arat aphan neli thanlo, jasemet ke arloso atum lapen Ijip adet kedo a-Judah arat aphan Jakongkethe HEMPHU, Israel a-Arnam nangpathantoi an alam thanlo. HEMPHU lasonsi pulo:

²⁵“Nanglitum lapen nangli piso atum sining arechopi aphan chechak pamelo. Bangpi aphansi athok pilo lapen hor kechor athok dungpo pu nanglitum chechak-lo, lapen nanglitum akechechak alam nanglitum chebilo. Tangte mesenlo! Nanglitum kechechak chebi pamenon! Nanglitum aseme-heihei ateng cheklemnon!

²⁶Bonta non, Ne HEMPHU, Jakongkethe Ne men pen semeketang alam arjutha, Ijip kedo-an Israel aso an aphan: Nangtum badu aphan ta Ne men pen Ne seme nangpatanglongle, nangtum, ‘Ne klempet-un a-HEMPHU amen pen semetang-lo’ pu ningjelongle!

²⁷Nangtum kechingthur un-edetji aphan Ne cholangding-lo, bonta nang-pavirdetji, ron pen mate keso pen thilap-letik an.

²⁸Bonta nangtum ajehaksi kethi pen jokchotji lapen Ijip pen Judah chevoi longchotji. Anke kerenglang atum chinipo komat alamsi chekok loma, Ne lam ma mate halatum alam ma.

²⁹Ne, HEMPHU si nangtum aphan aporman nangpipo, laso adimthot si Ne nangtum aphan aduk nangpipo, nangtum aphuthak Ne kepavirji pu aseme chekokpo.

³⁰Ijip arecho Hophra la aphan kepathiji keri abang hotur arideng Ne nang hodaiji, Judah arecho Zedekiah aphanle Ne Bebilon arecho Nebukadnezzar arideng kehodaidet ason, lata halaphan kepathiji keri ahoturlo.”