Read Karbi JEREMIAH 48 Bible Online

JEREMIAH 48 - Karbi bible

JEREMIAH 48

¹Moab aphuthak Jakongkethe HEMPHU lasonsi pulo: “Nebo arat jinsomeme-ong halatum asong-heihei pavirtang-lo! Kiriathaim aphan cheraidet-lo, la apaisong kangtang ingsek-ilo, lapen la arat aphan patherak-lo;

²Moab alir-acham damtang-lo. hotur atum Heshbon cheraitang-lo lapen Moab akhei kepavirji mathalo. Ingcham arong pangsamrilo; Ron armu atum la anat damlo.

³Horonaim arat atum hangjolo, ‘Kephangno! Kevirlo!’ ”

⁴“Moab aphan pavirtang-lo; asomar kechiru ase arjutha.

⁵Halatum chirubom dambom ase arjutha ha Luhith atovar soding, ningduk akechiru ha Horonaim atovar kehir anat.

⁶Seraknon, nangpran aphan katnon!” pusi latum pulo. “Kejejangtang ajo nampi agadha ason katnon!”

⁷“Moab, nang nang jakong lapen nangkhi aphuthak chechikilo, bonta non nangphan nanghaidetpo.

⁸Erong natta kevir pen jokjelo, arlok lapen thoi anta ru-etpo. Ne, HEMPHU si keningjelo.

⁹Moab aphan isi arlong athiri kimpinon; la aphan pavirdap-prangpo. La arong-heihei paruhuppo, Lapen hadak puthot baduta dodamthuthelo.”

¹⁰(HEMPHU akam ning aklong pen keklemkle abang ahirjuno paphonang! Karbube lapen kepathithe abang ahirjuno atheng paplangnang!)

¹¹HEMPHU pulo, “Moab kaita jokvan pen si dolo lapen ban ponpepinlang. Moab ke keparki-kepin ahor abong asonlo, lapen kaprek abong along pajoi-jepinlang. La anghong kaita damde lapen la lamle, mesenver.”

¹²Non lasi, Moab aphan hor kepadung asonsi Ne monit ketoiji apor nangletang-lo. Latum ahor abong-heihei dung-etpo lapen pangje-ipo.

¹³Israel atumle latum kechiki a-arnam Bethel pen kemanghu asonthotsi Moab atum halatum a-arnam Kemosh pen manhu-mangrampo.

¹⁴“Moab amonit atum, kopisi nangtum nokbe pu kechepuma, aningkethe anokbe ke ron alongsi klangji?

¹⁵Moab lapen la arongsopi-heihei pavirlo; la akemenei ariso atum aphan pathiprelo. Ne recholo, Jakongkethe HEMPHU, lapen Ne si keningjelo.

¹⁶Moab akevir nangtebokbomlo; la keruji tebok-het-lo.”

¹⁷“Laso adet aphan nang tebok kedo atum chirutha, la anong alam kechini atum an. Punon, ‘la jakong kethe pen kepangri Beng tang-lo; La adak-atur lapen ajakong avelo.’

¹⁸Nang, Dibon along kedo atum an nang mar kedo adim pen nangsunra longle aduk ajo arum nang chongninon; Moab lapen la apaisong kepavir abang daksi do.

¹⁹Aroer kedo atum, tovar akung arjap-ra inghongnon; kekat atum aphan arjunon, kopi athesi kekat-loma arjunon.”

²⁰“Moab virtang-lo, pu halatum thakpo, ‘la aphan chirunon; la aphan pinremtang-lo. Moab virtang-lo pu Arnon Aroi soding pachethangnon!’ ”

²¹Inglong athak aklam arongsopi-heihei aphuthak kangsai nangletang-lo. Holon, Jahzah, Mephath,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth, lapen Bozrah aphuthak Moab arong-sopi-heihei, kehelo lapen adung-arei an aphuthak kangsai vangtang-lo.

²⁵Moab ajakong berlamlo; la ajakong pavirdet-lo. Ne, HEMPHU si keningjelo.

²⁶HEMPHU pulo, “Moab aphan hor pangrithamnon, pima la nebe thur-tang-lo, Moab la keching-ok athak kong-longpo, lapen monit atum hiringjopo.

²⁷Moab, chemathatha nang kopusonsi Israel arat aphan kenep long amonit asonthot latum aphan nang klemlo.”

²⁸Nang Moab adet kedo atum, nang song che-onon! Damra thepai ajole donon! Vo-ak adung atar kechepatar avothung atum asonle cheplangnon.

²⁹Moab chepindak-ong! La ko-an chepindak loma, ane theloma lapen rat atum chepathepik loma ne arjulong-lo.

³⁰Ne, HEMPHU, halatum ane kethe chini. Latum akechepindak nahokta lele, lapen latum keklem akam ajirdingde.

³¹La apotsi, Ne Moab abangphutin aphan lapen Kir Jeres arat aphan chirupipo.

³²Sibmah arat aphan Ne chirupo, Jarez arat aphan pasik muchotpo. Sibmah arongsopi, nangke kethi atalo lapen ha Jarez an aro keledam adrakha arong asonlo. Bonta non nang barla athesere lapen nang drakha athe an pavirtang-lo.

³³Kerengme lapen ning arong Moab aho-or kedo adet pen pondet-lo. Drakha kesor adim pen drakha alang keli ne khangchek-lo; hadak baduta drakha ahorlang keselam abang avelo lapen ning arong akehang ase avelo.

³⁴Heshbon lapen Elealeh arat atum hang-lo, lapen latum akehang Jahaz anta arjulong-lo; Zoar anta arjulongji, lapen Horonaim lapen Eglath Shelishyah anta arjulong. Nimrim alangjeng ta krenghak-lo.

³⁵Moab arat atum halatum karcho adim-heihei kephrin athok kepajir pen lapen halatum a-arnam atum aphan athok-heihei kepi pen Ne khangji. Ne, HEMPHU si keningjelo.

³⁶Lasi Ne ningduk-lo, Moab lapen Kir Heres arat aphan manele pongsi pen kecharhe alun kebut ason, pima asontin latum kechepahemphu amar an dam-et-lo.

³⁷Halatum kedo-an-ta aphu chesoilong-lo, lapen angmum anta chesoi-et-lo. Latum ari bithe cherot-lo, lapen abangphutin ta pe thoila che-umlo.

³⁸Moab ahem thengsong kedo-an lapen rat chetai kedo-an adim hadak kechiru pen apar thangnat ta avedet-lo, pima baduta aning kedokde abong asonsi Moab aphan Ne paphukdak-lo.

³⁹Moab aphan paphukdak-lo! Chirulo! Moab aphan pinremtang-lo. La rutang-lo, lapen la aphan adung arei kedo adet atum ingnekchoilo. Ne, HEMPHU si keningjelo.

⁴⁰Vomu ason la arveng patelangsi Moab aphuthak isi akhei sokvurpo,

⁴¹lapen rong-heihei lapen paisong kedo akut-heihei cheraidetpo. Halabangso arni Moab aron aso atum arloso oso amahang kepathek ahut asonsi pherepikpo.

⁴²Moab aphan pavirdetpo lapen isi akhei pupedetpo, pima la nebe thurtang-lo.

⁴³Moab arat aphan kepherememe, hilik, lapen pham-heihei inghongphrong-lo. HEMPHU si keningjelo.

⁴⁴Kepherememe pen kepajokji kebor-i atum hilik-heihei arlo klopo, lapen hilik pen nang pabar long abang pham chedanpo, pima HEMPHU si Moab akevir aphan apor thiktang-lo.

⁴⁵Kerap kelongle kechepachong atum ephong Sihon recho kepangri arongsopi Heshbon along chepachongji aphan bor-ipo, bonta lata amede kar-ang-lo. Athengno lapen ron aning kedok a-Moab arat anglong kangtui anta me chodetpo.

⁴⁶Moab arat aphan jinsomeme! Kemosh aphan karcho arat aphan pavirtang-lo, lapen asopomar lapen asopimar atum aphan ban beng pon-et-lo.

⁴⁷Bonta kevangji arni Moab aphan HEMPHU puthot pachingthurthuji. La kadokave Moab aphuthak HEMPHU kepu an plangpo.