Read Karbi JEREMIAH 49 Bible Online

JEREMIAH 49 - Karbi bible

JEREMIAH 49

¹Ammon aphuthak HEMPHU la-sonsi pulo: “Israel amonit atum konat-lo? Latum alongle kerai abang baduta avedet-loma? Kopi athesi Molek aphan karcho arat atum aphan latum Gad akhei alongri pacherai long-lo, lapen hadak padolong-loma?

²Bonta Rabbah arongsopi arat atum ron kechedan keparjulongji apor nanglebomlo, lapen la ru-etji, lapen la arong-heihei anta me chodetpo. Anke Israel atum latum pen kepon alongle che-en thudetpo.

³Heshbon arat atum, hangjonon! Ai pavirtang-lo! Rabbah a-arloso atum, chirujonon! Pe-thoila che-umnon lapen chiruhurnon. Manghu-mangramra katnon. Akurusar lapen arechoso atum penpen nang arnam Molek aphan ban pondetpo.

⁴Kopisi nang kekroithirthe atum chepindaktap-loma? Nang jakong avebomlo. Nangtum kopisi nang jakong aphuthak chikiloma lapen baduta nangtum aphan nang tengkheng un-e pu kechepuloma?

⁵Ahin tin pen ta Ne kepherememe ason nangvanji. Nangtum kedo-anta kat-etpo. Abang-phutin ta apran kechepajokjisi katpo, lapen baduta nangron asong aphan kepangrumpetji abang avelo.”

⁶Bonta aphi Ammon aphan Ne pachingthurji. Ne, HEMPHU si kening-jelo.

⁷Edom aphuthak Jakongkethe HEMPHU lasonsi pulo: “Edom arat atum halatum kemesen akangsai chepangbo det-loma? Thanpare atum latum aphan kopisi keklem nangjima than thektheloma? Latum abidi katjuiloma?

⁸Dedan arat atum, suira katnon! Chepatumon! Iso asomar aphan Ne pavirpo, pima latum aphan Ne aduk kepiji apor nangletang-lo.

⁹Monit atum drakha athe kelik ahut, latum ajehaksi arong along tekangchotji, lapen kanghu atum ajo vang-lote, latum aning kehang alingsi ponji.

¹⁰Bonta Iso asomar aphan Ne oithorji, lapen latum kechepatu adim-heihei paklang-etpo, anke latum chepatu un-edetpo. Edom arat kedo-an pavirdetpo. Inutbak aphanta pajokjelo.

¹¹nangtum ajangreng atum nelong nang-onon, lapen Ne latum aphan orapo. Nangtum ahemepi atum nephan nechiki unpo.”

¹²Aduk kephonangji a-ot avedet atum seta aduk kepho aharlung pen jun nangji, nangtum aduk phophepinji pu mathama? Kali, nangharlung pen junvek nangji!

¹³Nangmethangsi semetang-lo, Bozrah arongsopi isi kelang pherememe lapen rongman plangji; rat atum la aphan pinrempo lapen la amen ensi ington-ipo. Adung arei kedo-an arong-heihei kaike aphan virdetpo. Ne, HEMPHU si keningjelo.

¹⁴Neli pulo, “Edom HEMPHU pen neli isi abirta long-lo. Det atum aphan kepathanjisi alangli inut apherangke toilo, halatum aron armu nangliphan-kepatengkhengjisi pachesikding-lo.

¹⁵HEMPHU, nangliphan jakong pave-detpo, lapen nangliphan baduta man pipelo.

¹⁶Nangli kecheparoka nang-liphan pachobeilo. Nangli kematha ateng kali si baduta nangliphan phererelo. Nangli arlong ajo dolo, inglongpi akangtuinei ajo; bonta vomu ason kangtuiving ajo nangli do seta, nangliphan HEMPHU si pasuntukpo. HEMPHU si keningjelo.”

¹⁷HEMPHU pulo, “Edom aphuthak kevangji akevir lapu-an kepherememeji, abangphutin kedamput abang thiriksi pherepikpo.

¹⁸Sodom lapen Gomorrah lapen la adung arei arong aphan kepavir asonthotsi Edom aphan ta plangpo. Hadak baduta puthot dode-detpo. Ne, HEMPHU si keningjelo.

¹⁹Kesing-it a-ingnam ajo pen Jordan soding ha bap-bi kelirtir ajo anat hingho nang kebar asonsi Ne ta vangpo. Anke ne kangvaiji ajalinsi det pangripo. Komatsi Ne pen pangbar unpo? Komatsi Ne pen chedan haipo? Komat kepangri abangsi Nephan hilidun unpo?

²⁰Lasi Edom aphuthak Ne kemang alam arjutha, lapen Teman arongsopi arat aphuthak ne keklemji alam arjutha. Osomar atum aphan kadokaveta chethur pon thorthorpo, lapen abangphutin ta pherepo.

²¹Edom kekrep ahut, lapuson arki doji, pirthe adang bithe klemhurji, lapen kehang ase Akaba atalo chetok anta arjulongji.

²²Vomule kesokvuk asonsi hotur atum Bozrah tengkhengpo. Halabangso arni arloso oso mahang kepathek asonsi Edom aron aso atum pherephratpo.”

²³Damaskas aphuthak HEMPHU lasonsi pulo, “Hamath lapen Arpad arongsopi arat atum mathapik-lo, pima latum birtajuno arjulong-lo. Talo asonsi latum aphuthak ningduk hupthip-lo, latum sang longle.

²⁴Damaskas arat atum ainipik lapen pheresi kat-lo. Latum sopik-lo, lapen arloso oso mahang kepathek asonsi sungpik-lo.

²⁵Anongkedo arongsopi lapen aning arong pen kedo abangphan obup khangjangpo.

²⁶Halabangso arni rongsopi atovarpi-heihei along bangpi arisomar atum aphan pathi-etpo lapen bangpi aron aso an aphan pavirdetpo.

²⁷Damaskas apaisong Ne me keidutji lapen Benhadad arechohem-heihei me pachodetji. Ne, Jakongkethe HEMPHU si keningjelo.”

²⁸Kedar akhei lapen Hazer aber alongri-heihei lahei Bebilon Nebu-kadnezzar kecherai aphuthak HEMPHU lasonsi pulo: “Kedar arat aphan tengkhengnon lapen nihang arat akhei aphan pavirnon!”

²⁹Halatum apehem-heihei lapen api ahur-heihei halatum apehem asontin cheraipi-etnon. Halatum aka-ut ponpi-etnon lapen rat aphan punon, “Kepherememe nangtum aphan nangkompet-lo!”

³⁰Hazer arat, Ne, HEMPHU, nang-tum aphan pacherelo, kehelo kat-ra chepatu damnon. Bebilon arecho, Nebukadnezzar nangbe thursi mang-tang-lo, lapen lasonsi nangli pulo,

³¹“Vangnon! Kejok-lo, lapen kejokvan pu kechematha arat atum aphan netum tengkhengji! Halatum arongsopi anghap-heihei ave mate ingkirke lapen ingkodang khangjang.”

³²Halatum aka-ut-heihei lapen pi ahur kedo-an ponpi-et-lo! La achu kechingtip kechepathihek arat aphan bithe-bitha Ne papratseiji lapen latum aphuthak ahintin penta ne akevir vanji.

³³Hazer kaike aphan obuppo, hadak sirung atumsi dochotpo. Hadak puthot baduta dodelo, Ne, HEMPHU si keningjelo.

³⁴Zedekiah, Judah arecho plang-det aphi, Elam adet aphuthak neliphan Jakongkethe HEMPHU ningjelo.

³⁵Alangli pulo, “Elam aphan kepangtang athai kejo atum kedo-an aphan Ne pathi-etji.

³⁶Anotin pen Elam aphuthak Ne tomon pajapji, lapen bangpi kechepachong arat atum adettin le-et-etik bangpi arat aso aphan Ne papratseiji.

³⁷Elam arat atum aphan kepathiji aningkehang ahotur aphuthak Ne paphereji. Elam arat aphan Nening kethipik pen Ne pavirji lapen latum aphan Ne pavirlapletik ron armu toibompo.

³⁸Halatum arecho lapen ajalin atum aphan Ne pavir-etji.

³⁹Bonta aphi Elam arat aphan Ne puthot pachingthurthuji. Ne, HEMPHU si keningjelo.”