Read Karbi JEREMIAH 50 Bible Online

JEREMIAH 50 - Karbi bible

JEREMIAH 50

¹Bebilon lapen la arat aso aputhak HEMPHU abirta lahelo:

²“Det atum aphan birta thannon! La pachethangnon! Angthek pira birta pachininon! Bebilon rutang-lo! Bangpi a-arnam Marduk achet-abet saidelo! Bebilon akumlin-heihei therak nang-lo, bangpi kehijimmeme arjan-heihei sorlamlo!”

³Bebilon aphan ketengkhengjisi nirep ahin pen isi akhei vangpo, lapen la parongmandetpo. Monit lapen pi atum kat-etpo, lapen hadak baduta dodedetpo.

⁴HEMPHU pulo, “Halaso apor nang-kele ahut, Israel lapen Judah arat atum kechiru pensi vangpo, halatum a-Arnam nephan neripo.

⁵Latum Zaion atovar arjupo, lapen halapu anat dampo. Latum Ne pen kejut un-epin akechejok aloh chetokpo, lapen la phriphrelo.”

⁶Nerat atum kevi abang inglongpi-heihei ajo kepangbotoi abiresak atum asonlo. Latum isi anglong pen akaprek anglong kemanghu pen kedamtap abiresak-lo, lapen latum ahem konat loma latum chetengnetang-lo.

⁷Latum kechetong aling latum aphan tengkheng-lo. Latum ahotur atum pulo, “Latum HEMPHU abethurlo, la apotsi eli kopima keklemji la kehingno asonsi plang-lo. Latum aphusar atum HEMPHU aphan chikilo, lapen Alangphan latum amethang ta kroithipver nangji apot-lo.”

⁸Israel arat atum, Bebilon pen katnon! Det obupnon! Ke-ocheng abang plangnon!

⁹Nirep anat isi kangtangrak adet atum asong Ne ingthurji lapen latum Bebilon patengkhengpo. Det abethursi latum kechedanji aphan arjap renpo, lapen la chepahaidetpo. Latum sikar kedam thai ke-ap kejong adim keparothek akaida kethek atumlo.

¹⁰Bebilon aman ponpi-etpo, lapen kepon atum la aning kehang aling asontin amar ponpo. Ne, HEMPHU si keningjelo.

¹¹HEMPHU pulo, “Bebilon arat atum aning arong-lo lapen chehok-lo, sokpun kedom achainong mate losei kangrong ason thakthak-lo,

¹²bonta nangmethang kethedung arongsopi aphan ke patherak memepo, lapen langroppo. Kedo-an adet angbong Bebilon adet aphan pabihekpo; la krengtaipo, lapen langkave asangtimili ajo plangpo.

¹³Ne ningkethi pen ajok baduta Bebilon along kedo abang avedetpo. La ruhuppo, lapen kehatput abangphutin thirikjoksi mong-loipo.”

¹⁴Thai ke-ap atum, Bebilon pen kechedanjile la akung-kung arjap rennon. Bebilon aphan kedo-an aning thai aso jonon, pima la ne HEMPHU aphan langphlotsi pap klemlo.

¹⁵Ron kehang ase pangtuinon, rongsopi adung-arei an! Non Bebilon atum chehodaitang-lo. La apaisong-heihei phri-et-lo. Bebilon aso aphuthak Ne alar huilo. La apotsi latum aphu-thak alar huinon, lapen latum bang aphan keklem asonthot-le latum aphanta klemnon.

¹⁶Det along chili parik longri mate ketiki asai papang-rumlongri. Hadak kedo bang adet aso atum abangphutin ron armu aphan ketengkhengji pherepo, lapen ahem chevoijuipo.

¹⁷HEMPHU pulo, “Israel arat atum ke biresak ason, hingho atum phlungsi papratseilo. Kechengsi, latum aphan Assiria arecho kethe tengkheng-lo, aphi Bebilon arecho Nebukadnezzar latum areppi an hejelo.

¹⁸Laso apotsi, Ne, Jakongkethe HEMPHU, Israel a-Arnam, Nebukadnezzar lapen la adet aphan aduk kepi asonthot aduk pipo.

¹⁹Israel arat aphan Ne halatum adet pachedolongthuji. Karmel anglongpi along asok lapen Bashan alongri arong kevang asok latum un an cholongpo.

²⁰Halaso apor nangkele ahut Israel along pap thek-longledetpo, lapen Judah along kehingno amonit longlelo, pima Ne kepajok amonit atum aphan Ne diyapo. Ne, HEMPHU si keningjelo.”

²¹HEMPHU pulo, “Merathaim lapen Pekod arat aphan tengkhengnon. Pathira latum aphan pavirdetnon. Nangphan hukum Ne nangkepi ason an klemnon. Ne, HEMPHU si keningjelo.

²²Det along ron arki arjulongtang-lo, lapen hadak akevir thedung-lo.

²³Bebilon aso atum kebu pen pirthe adang pangje-ilo. lapen non halaso akibu achet saidelo! Halaso adet kopi plangtang-loma det kedo-an atum manghulo.

²⁴Bebilon aso atum, nangtum Ne pensi chedanlo, lapen nangtum la chinine seta.

²⁵Ne ron kechedan arisim kebi adim an ingputang-lo, lapen Ne ningkethi pen Ne lahei enponlo, pima Ne Jakongkethe klem un a-HEMPHU-si Bebilon along keklemji chesiktang-lo.

²⁶Ahin-ahin pen tengkhengnon lapen la asok kebi adim ingsek-ra pangkodangnon! Sok kepangsom ason kethipon amar an pangsomnon! Det pavirdetnon! Thangnat ta ori!

²⁷Latum aron aso an aphan pathilapnon! Thulapnon latum aphan! Bebilon arat kevirlo. Latum aphan aduk kepiji apor nangletang-lo!”

²⁸(Bebilon pen kechepajok keche-pachong atum Jerusalem vang-lo, lapen latum HEMPHU etum a-Arnam a-Kardomhemthepi aphuthak Bebilon aso atum keklem apot alar huiloma latum thanlo.)

²⁹Thai ke-ap amonit atum aphan Bebilon ketengkhengjile thannon. Komatma thai aso ke-ap thek abang-phutin aphan toinon. Rongsopi komchennon, lapen inutbak aphanta pakat longri. La keklemtang an apot alar huinon, lapen latum bang aphan keklem asonthot latum aphan klemnon, pima la cheparoka pen Israel Kangthir Abang, Ne bethurlo.

³⁰La apotsi la arisomar atum rongsopi atovarpi along thinangpo, lapen la aron aso atum halaso arni pavirlappo. Ne, HEMPHU si keningjelo.

³¹Bebilon aso, nang kechepindak pensi plengset, la apotsi, Ne, Jakong-kethe klem un a-HEMPHU, nangbe thurlo! Nangphan Ne aduk nangkepiji apor nangletang-lo.

³²Nang patekungsi kreppo, lapen nangphan baduta nangkangthurji aphan rap abang avelo. Nang rongsopi-heihei Ne me keidutpo, lapen la adung-arei kedo-an pavir-etpo.

³³Jakongkethe HEMPHU pulo, “Israel lapen Judah arat atum aphan chenek-ot-lo. Latum aphan kenep atum latum aphan ton padik-khrim-lo, lapen latum aphan nahokta padamlongle.

³⁴Bonta latum aphan kepajok abang ke Jakongkethe HEMPHU lo. Alangsi latum langpo lapen pirthe athak ningkangsam vanpo, bonta Bebilon aso atum ke kesung-lo.”

³⁵HEMPHU pulo, “Bebilon aphan kethilo! La arat aphan, la pangribang atum, la thek kere atum aphan kethilo.

³⁶La kechobei amontri atum kethilo, latum ko-an akelu! La aron aso aphan kethilo latum ko-an phere loma!

³⁷La alosei lapen ron ahemkonglong-heihei pavir-etnon! Kerong aron-aso atum aphan kethi latum ko-an aini loma! La khipuru pavirnon, phangnonon lapen thiponon.

³⁸La alongle aphuthak akhim pathurnon, lapen la alangroi-heihei pakrengtainon. Bebilon alongle ke kepherememe akumlin-heiheilo, la amonit aphan papulo.”

³⁹Lasi Bebilon aphan hi-i lapen kangthirthe akarjong, kangthirthe avo atumsi hungkripo. Hadak monit atum puthot dodelo, kaike aphan kali.

⁴⁰Ne Sodom pen Gomorrah lapen adung-arei arong aphan kepavir asonthotsi Bebilon aphanta klempo. Hadak puthot baduta avedetpo. Ne, HEMPHU si keningjelo.

⁴¹“Nirep ahin pen isi akhei vangbomlo, isi kangtangpik kehelo adet pen; ongdung arecho atum ron aphan chesik-lo.

⁴²Latum athai anokjir-heihei cheponlo; latum hingnopik, kangjinso ave. Latum alosei kardon ahut Talo kang-rengklung ason, latum arki. Latum Bebilon abethursi ron aphan Chesik-lo.

⁴³Bebilon arecho atum birta arjulong-lo, lapen la ari thangta klemthekthelo. Aning kejangjesi laphan borthip-lo, arloso oso mahang kepathek akeso asonlo.”

⁴⁴Jordan akung soding a-ingnam ajo pen a-kelirtir abap ajo alongle an hingho nangkebar asonsi, Ne HEMPHU vangsi Bebilon aso aphan halatum arong pen menmen pabephlungpo. Anke Ne kangvai kepangribang det charipo. Ne pen komatsi pangbar unpo? Ne pen komatsi chedan haipo? Komatsi kepangri abangsi nephan khang unpo?

⁴⁵La apotsi Bebilon aphuthak Ne kemang lapen la arat aphuthak Ne keklemji kematha alam aphuthak no chedentha. Latum asomar atum aphan chethurponthorpo, lapen abangphutin ta pheredukpo.

⁴⁶Bebilon akevir ahut, hadak lapusonsi arki doji, pirthe adang klemhurji lapen kehangjo ase adet kaprek anta arjulongji.