Read Karbi JEREMIAH 51 Bible Online

JEREMIAH 51 - Karbi bible

JEREMIAH 51

¹HEMPHU pulo, “Bebilon lapen arat aphuthak kevir atomon Ne pavangpo.

²Sok anar aphanle tomon kepajap-phit asonsi Bebilon aphan kepavirjisi bang adet aso Ne toipo. Halaso akevir kevang ahut, latum ahintin pen tengkhengsi det pangthaidangpo.

³La aron aso aphan thai aso ke-ap apor piri mate ron arisim kechingthangji apor piri. Risomar atum aphan pajok longri!

⁴Latum areng amek dopo lapen halatum arongsopi atovar-heihei along latum thipo.

⁵Ne, Jakongkethe Arnam, HEMPHU, Israel lapen Judah aphan latum Ne Israel Kangthir Abangphan langphlotsi pap klemlo seta Ne latum aphan o-e.

⁶Bebilon pen katnon! Chepajokjile katnon! Bebilon apap pen ajok chepathi longri. Non Ne alar huilo, lapen la kepho nangji ateng adukpilo.

⁷Bebilon ke neri along kedo ser aharlung asonlo, pirthe adang an aphan pajunphruilo. Det atum amethang ahor chejunlo lapen latum aning pangchamjamlo.

⁸Bebilon menmen amat kreptang-lo lapen virtang-lo! La aphuthak chirutha! La areng amek aphan dovai rinon, la meji mene.

⁹Hadak kedo bang adet aso atum pulo, ‘Netum Bebilon aphan kerapdunji aphan bor-ilo, bonta la der-ong-lo. Non bangpi atum aphan inutvet padolongnon lapen hem chevoinon. Arnam ajakong kedo-an pen Bebilon aphan aduk pilo, lapen laphan pavirdet khangjang-lo.’ ”

¹⁰HEMPHU pulo, “Nerat atum hang-lo, ‘Netum kechok atovarsi kedo pu HEMPHU nepaklangtang-lo. Eli damra e-Arnam HEMPHU kopisi klemtang loma Jerusalem along kedo arat aphan thandam lonang.’ ”

¹¹Media arecho aphan HEMPHU puthulo, pima Alang Bebilon kepa-virji aninghang-lo. Lasonsi Alang kardomhemthepi kepavir apot alar huipo. Ketengkheng achakri abang hukum pilo, “Nangthai aso-heihei arsonon! Nangchong-heihei chesiknon!

¹²Bebilon apaisong-heihei ketengkhengji aphan pong-ut butnon. Keton pangtangraknon! Polton atum patonnon! Kepangbop-phunji aphan monit binon!” Bebilon arat aphan HEMPHU kopisi keklemji pu kepuma Alang klemtang-lo.

¹³Laso adet along langroi ongdung lapen akhi do-o, bonta la apor juttang-lo, lapen la achethe arri ingtippet-lo.

¹⁴Longvur ahur ason Bebilon aphan kepatengkheng jisi ongdung amonit Jakongkethe HEMPHU vanji pu Alang methang amen pen semetangdet-lo, lapen latum kehai akehang hangpo.

¹⁵Amethang ajakong pensi HEMPHU pirthe pinchong-lo; Alang bidi pen Alang pirthe pinchong-lo, lapen sining-inghun-heihei sangjailo.

¹⁶Alang hukum pen sining-inghun angsong along-heihei ingreng-lo pirthe kejut pen Alang inghun-heihei van. Arve kejang along sining pabirlak-lo, lapen Alang puru ongdung pen tomon nangtoilo.

¹⁷La thek-longsi monit atum kematha abidi jutdet lapen matha thekthelo, kumlin keselam atum chepamanghulo; Pima latum keselam a-arnam-heihei chobei lapen achethe ave.

¹⁸Lahei anam ave lapen hijimhur nangji; lahei aphan HEMPHU kangsai ahut lahei pavir-etji.

¹⁹Jakob a-Arnam ke lahei ason kali; Alang asontin ta pinchong-lo, lapen Alang methang arat kepaplangjisi Alangli Israel aphan ingvailo. Jakongkethe HEMPHU helo Alang men.

²⁰HEMPHU pulo, “Bebilon, nangke Ne kibulo, Ne ron asimlo. Det-heihei lapen recho arat kephangnoji aphan Ne nang rimlo,

²¹Losei lapen kardon atum aphan kebeng-etji, ron ahemkonglong lapen kevek atum kepaphratseiji aphan

²²Pinso-arlo aphan kepathiji, akesar lapen riso atum aphan kehevanji, pinsomar lapen arlosomar atum aphan kepathiji aphan,

²³Kevi atum lapen halatum api ahur kethatji. Sai ketiki lapen halatum alosei-heihei kepathiji, Kepangri atum lapen chakri kethe atum aphan Karbulamji aphanlo.”

²⁴HEMPHU pulo, “Bebilon lapen la arat atum aphuthak halatum kehingno kedo-an pen Jerusalem aphuthak keklem apot Ne alar kehui nangtum thek-longpo.

²⁵Bebilon, nangke pirthe adang kepavir alangpi asonlo, bonta, Ne, HEMPHU ke nanghoturlo. Ne nangphan nang-ot thipji, lapen amepun saide nangbikokji.

²⁶Nang kerutang a-arlong-heihei puthot kikimthuji aphan en-edetpo. Nang ke isi kejejangtang ason kaike plangpo. Ne, HEMPHU si keningjelo.”

²⁷Ketengkhengji aphan pong-ut butnon! Pong-ut butnon, anke det atum arjulongpo! Bebilon abe ron kepathurjile det atum pachesiknon! Ararat, Minni, lapen Ashkenaz adet atum kepatengkhengjile thannon. Ketengkheng kejajile inut achakri batnon. Longvur ahur asonle losei vanpaknon.

²⁸Bebilon abe ron kepathurjile det-heihei pachesiknon. Media arecho atum aphan, jalin atum lapen achakri atum aphan lapen det kedo-an latum kelang aron armu aphan hangnon.

²⁹Pirthe klemhurlo lapen hijuk-lo, pima Bebilon aphan kejejangtang ajo kepamanji pu HEMPHU kemang akam keklemlo, hadak monit do abang baduta avelo.

³⁰Bebilon aron aso atum kechedan ingtonkoksi halatum apaisong akut-heihei arlo chedoklip-lo. Latum angthin chepathe haihedet-lo, lapen arloso atum ason plang-lo. Rongsopi anghap-heihei ruhup-lo, lapen hem-heihei me cho-et-lo.

³¹Pherangke anut anut Bebilon arecho along katsi alangli rongsopi ahintin ta rurailo pu thanlo.

³²Hotur atum lang kehat adim anta cherai-et-lo, lapen paisong akut-heihei me keidut-lo. Bebilon aron aso atum hangjolo.

³³Prapjin pen latum aphan hotur atum chorpetpo, lapen latum aphan keisi sok ason dongruipo. Ne, Jakongkethe HEMPHU, Israel a-Arnam si keningjelo.

³⁴Jerusalem aphan Bebilon arecho chorpet-lo lapen la chodet-lo. Langbong asonsi la rongsopi along pangthai; Talo api asonsi la joilut-lo. La aning kehang aling pon-et-lo lapen ahin an var-et-lo.

³⁵Zaion arat atum papu lonang, “Etum kephonang ke Bebilon la adai padonang!”

³⁶Lasi Jerusalem arat aphan HEMPHU pulo, “Nangtum aphan Ne nang klempiji lapen nangtum aphan kopima nang hotur atum nang keklem, latum aphan pachetutoiji. Bebilon alangroi-heihei, alang amek an Ne pakrenghakji lapen la aroi pakrengtaiji.

³⁷Halaso adet marat api anta kedodepin akeru abui plangji. La kelang anta pherememeji; hadak baduta dodelo, lapen la kethek-long aling abang pherepikji.

³⁸Bebilon aso atum kehang hingho atum kangnor asonji lapen hingho atum kangreng asonlo.

³⁹Latum boho-oma? Latum aphan Ne isi kecho-kejun amei piji lapen latum junsi aning cheparongpo. Latum amek jangdampo lapen kaita thurthelo.

⁴⁰Latum aphan biresak, bi lapen biresak aso aphan kethuji kepon ason Ne ponpo. Ne, HEMPHU si keningjelo.”

⁴¹Bebilon alam HEMPHU pulo: “Pirthe adang kerohur arongsopi aphan nepchek-lo! Det atum angno Bebilon isi kelang pherememelo!

⁴²Bebilon athak talo kong-long-lo lapen la kangrong alang adihu pen dipthip-lo.

⁴³Rong-heihei kelang pherememelo lapen baduta kedode mate kedamde alang kave asangtimili ajo asonlo.

⁴⁴Bebilon a-arnam Bel aphan Ne aduk inghoiji, lapen la kechonghutang amar pache-o etji; det atum laphan aphi archochepinpo. ‘Bebilon arpong-heihei krepjap-lo.’

⁴⁵Israel arat atum hadak pen katnon! Ne ningkethi pen nang chethe kechepajokjile katnon!

⁴⁶Nang ingthin chepabihek-ri mate nang karjulong kechethansei alam pen apot phereri. Aningkanvang prekjam prekjam alam-heihei chanlo, det along kephangno alam-heihei lapen recho hijan kechedan seroi alam.

⁴⁷La apotsi Bebilon akumlin-heihei aphuthak Ne ke-otji apor nangletang-lo. Det kangthim amat Ne patherakji, lapen la arat an aphan pathilapji.

⁴⁸Pirthe athak lapen sining-inghun kedo-an Bebilon keru lapen nirep pen vangsi la kepavir arat aphuthak aning arong hangjopo.

⁴⁹Bebilon pirthe adang arat aphan pathitoilo, lapen la ongdung a-Israel aso aphan kepathiji apot non la virpo. Ne, HEMPHU si keningjelo.”

⁵⁰Bebilon kedo arat aphan HEMPHU pulo: “Nangtum kethi pen joktang-lo! Non damnon! Inghongrinon! Nangtum hem pen heloving seta, Ne nang Arnam HEMPHU aphan lapen Jerusalem aphan chemathatha.

⁵¹Nangtum pulo, ‘Netum aphan ingjinsosedet-lo lapen patherak-lo; netum aphan kerap abang avepinlo, pima kardomhemthepi kangthir adim bang adet aso atumsi cheraidet-lo.’

⁵²La apotsi, Ne pulo Bebilon akumlin-heihei aphan ke-otji apor nangletang-lo, lapen areng keso atum det adang bithe hangkongpo.

⁵³Sining-inghun an Bebilon arlu un seta lapen hadak isi paisong komchen akut akangtang chiki seta, la kepavirji aphan. Ne, HEMPHU si keningjelo.”

⁵⁴HEMPHU pulo, “Bebilon along kechiru ase arjutha, det along kevir apot keningri ase.

⁵⁵Bebilon aphan Ne pavirlo lapen laphan padojoilo. Ron armu atum kangreng-u alang adihu asonsi damlo, Lapen hangjosi tengkheng-lo.

⁵⁶Latum Bebilon kepavirjisi vang-lo; la aron aso an neppon-et-lo, lapen latum athai aso-heihei ingdipi-et-lo. Lapen Bebilon aphan la kephangnoji ateng pen Ne otpo.

⁵⁷La kepangri atum aphan Ne hor pangriji lapen kethek kere atum aphan, jalin atum aphan lapen ron aso atum aphan talo. Latum amek jangdampo, lapen kaita burbedetpo. Ne, rechosi keningjelo, Ne, Jakongkethe HEMPHU lo.

⁵⁸Kangtangrak a-Bebilon arpong-heihei paruhuppo, lapen la anghap kangtui me pachodetpo. Det atum akam thangnat kalidetji; halatum kebor-i akam me cholappo. Ne, Jakongkethe HEMPHU si keningjelo.”

⁵⁹Zedekiah adung kehondunkri abangphu lake Neriah asopo, lapen Meheseiah asupo Seraiah. Zedekiah Judah arecho kecho phli aningkan, alanglilong Seraiah Bebilon dunlo, lapen alangliphan neli ajehak alam pinkhat-lo.

⁶⁰Neli epak aloh along Bebilon aphan lapen Bebilon aphuthak ason akaprek akevir kevang alakha an tokdunpet-lo.

⁶¹Seraiah aphan neli pulo, “Nangli Bebilon lelote rat aphan ladak ketok amektin asekethe pen porhevektha.

⁶²Anke ardomnon, ‘HEMPHU, Nang pulo, laso adim pavirpo, anlote ladak kereng-et api avedetpo, monit mate marat api ta avedetpo, la sangtimili ajo ason kaike plangpo.’

⁶³Seraiah, rat aphan nangli laso aloh porhe patang-lote, la arlong pen rak-hetnon lapen Euphratis Aroi arlo varchornon,

⁶⁴lapen punon, ‘Lasonthotsi Bebilon aphan plangpo, la inglimchokpo, lapen inglanglelo, pima la aphuthak HEMPHU kevir vanpo.’ ” Jeremiah alam ladak jutkok-lo.