Read Karbi JEREMIAH 6 Bible Online

JEREMIAH 6 - Karbi bible

JEREMIAH 6

¹Benjamin arat atum kejokjile katnon! Jerusalem pen chepajok-non! Tekoa along chepajoknon lapen Beth Hakerem along angthek ame buinon. Nirep pen kesung lapen kevir vangji dokdok-lo.

²Zaion anglong langmepik, bonta laphan pavir-vedetpo;

³hadak recho atum ron armu penpen mukam chekimpo, rongsopi komchen halatum ape ahem-heihei cheparjappo, lapen abangphutin ta aningkehang aling adim mukam chekimpo.

⁴Halatum pupo, “Jerusalem ketengkhengjile chesiknon! Anerlo chitimle eli tengkheng lonang!” Bonta aphi latum pupo, “La der-ong-lo, arni chelut rangrang-lo, lapen arnikangsam aharchi nangding bomlo.

⁵Eli ajole tengkheng lonang; eli rongsopi apaisong pavirlonang.”

⁶Jerusalem kekompet-ra longle-inghan kebuijisi lapen recho atum thengpi rong-heihei kepachorjisi Jakongkethe HEMPHU hukum pitang-lo. Alang pulo, “laso arongsopi aphan adukpiji, pima la kecheneksi plengset.

⁷Langtuk-le elong kepachithing asonsi Jerusalem ta la akehingno pamibomlo. Rongsopi arlo kephangno lapen kepavir Ne arjulong-lo, keso lapen amek kechero-heihei saidesi Ne thek-long-lo.

⁸Jerusalem arat atum, laso akesung-heihei nangtum aphan isi kepachere paplang lonang, mate Ne nang-obupji; nangtum arongsopi sangtimili ajo paplangdetji, hadak baduta kedode adim plangpo.”

⁹Nephan Jakongkethe HEMPHU si nekepulo, “Israel aphan drakha aberi pen drakha athe kelik asonsi herek lorpo. Laso apor kedo ahut nang un an abangphutin aphan pajok nangpo.”

¹⁰Neli thak-lo, “Neli latum aphan than seta, lapen pachere seta komatsi ne lam arjujima? Latum bang alam arjuje lapen Nang lam ta arjumolo; Nang kephar kepaningjetoi alam latum ingnekchoilo.

¹¹Latum aphan Nang ningkethi nening arlo ta kruhak-lo, HEMPHU, lapen ne ajirkeding khangver un-elo.” Ansi nephan HEMPHU pulo, Ne ningkethi tovarpi-heihei along osomar atum aphuthak lapen risomar atum kechingrum along dunnon. Apenan lapen apiso atum aphan pondetpo, lapen arleng kesar aphan jokta batbelo.

¹²Halatum ahem-heihei bang aphan pidetpo, lapen halatum ahidi-heihei lapen halatum apiso anta pidetpo.

¹³Abangphutin, kethe lapen kebi, tangka ahok-he atovar pen kepaplang bor-i atum an; montri atum lapen kurusar atum jokta rat aphan pachobeilo.

¹⁴Nerat aso amek kechero ke areng kepoksi chot pusi latum mathalo. “Kadokave ta mephunlang,” pusi latum pulo, lapu ke kadokave ta memepin

¹⁵Latum lahei kehijimmeme akam apot non chetherak loma? Kali, latum chetherakrepin, latum kosonsi amahang ertanloma chechininepin. Lasi akaprek atum kevir asonsi latum ta virpo, Ne aduk kepi ahut lahelo latum akejut plangpo. Ne, HEMPHU si keningjelo.

¹⁶Arat aso aphan HEMPHU pulo, “tovar chetok along arjap damra langnon. Hako atovar lapen akemenei atovar-heihei arjunon. Lale damnon, lapen nangning kangsam pen dolongpo.” Bonta latum pulo, “Kali, netum damde!”

¹⁷Anke pong-ut arki kepa-chere keparjujisi kehon abang HEMPHU bat-lo. Bonta latum pulo, “netum arjuje.”

¹⁸Lasi HEMPHU pulo, “Arjutha, det atum, lapen nerat atum kopi plang poma charlinon.

¹⁹Pirthe ta arjunon! Halatum akemang akam-heihei apar aduk kepijisi laso arat aphuthak Ne kevir vanpo, pima latum Ne kethan alam dengmolo lapen ne lam-heihei kroikrelo.

²⁰Latum Sheba pen Ne long kevan ahijung aphik mate kehelo adet pen mosala-heihei kevan Ne pilo akenang? Latum athok-heihei Ne dengde mate halatum athok-heihei pen Ne ning ingsamse.

²¹Lasi lahei arat pakreppo. Po atum lapen sopo atum thipo, lapen lasonsi jirpo atum lapen adeng atum thipo.”

²²HEMPHU pulo, “Isi arat atum nirep ahin pen vangbomlo; isi jakong kethepik kehelo akhei, ron aphan chesikding-lo.

²³Halatum athai-heihei lapen anok-heihei che-ot-lo; latum aning ingtangpik lapen kangjinso ave latum losei kardon ahut talo arki ason. Latum Jerusalem abethursi ron kechedanji aphan chesikding-lo.”

²⁴Jerusalem arat atum pulo, “Netum birta arjulong-lo, Lapen netum ari angselo; netum kar-em lapen oso chopathe arloso keso asonsi solo.

²⁵Rong anat netum dam haihedet-lo, mate tovar-heihei dam haihedet-lo, pima netum ahotur atum arisim dorep lapen kepherememesi netum aphan nekompet-lo.”

²⁶Rat aso aphan HEMPHU pulo, “Pe-thoila chepindeng-ra thek-lo aduk athak kong-longnon, pima nangtum aphan nangkepavirji abang menmensi tengkhengpo.

²⁷Jeremiah, Nerat aso aphan asat ennon, nang tasam aphan asat ke-en ason, lapen kopi amar ma langnon.

²⁸Latum kadokave ta arjubui, kethurkhrap atum, tam lapen ingchin ason aning ingtang-o. Latum kedo-anta tangka chopet, adon adon dampo.

²⁹Me kethor adim me angtang ingjirje lapen chethakthe. Nerat aso aphan kepherang lemdetji akam ave, pima kehingno abangphan thak pondetdelang.

³⁰Latum aphan ale kave amepun pusi pupo, pima Ne, HEMPHU si latum aphan dengdelo.”