Read Karbi JEREMIAH 7 Bible Online

JEREMIAH 7 - Karbi bible

JEREMIAH 7

¹HEMPHU alam Jeremiah along vang-lo.

²HEMPHU ahem anghap along arjapdamra lapen hadak laso alam pachethangnon lapen punon, HEMPHU alam arjunon nang Judah amonit atum, HEMPHU aphan karcho adim laso anghap along kevang atum an.

³Muluk a-HEMPHU, Israel a-Arnam lasonsi pulo, “nangtum kedo-kethak lapen keklem-kedam chelarnon lapen ladak nangtum aphan Ne nangpadolongpo.”

⁴Hala-heihei alam kekroi ingtonnon, “netum jokvanpo! Lake HEMPHU ahemlo, lake HEMPHU ahemlo!” pu alam!

⁵Nangtum kedo-kethakbom pen chelarnon lapen keklembom ason ingtonnon. Lahin-lahin chelang seroi pame nangji.

⁶Bang adet aso aphan cholangrop-ri. Laso adet-heihei kave arat aphan kepathi ingtonnon. Kaprek arnam-heihei aphan karcho ingtonnon, athema la nangtum aphan nangpavirpo.

⁷Nangtum jongsi chelarlo pulote, kepachehemphuji aphan Ne kepi alongle along nangtum aphan Ne nangpado longverji.

⁸Chelangtha, kechobei alam-heihei aphuthak nangtum chikirong-lo.

⁹Nangtum chonghulo, pran armut-lo, beisa klemlo, seme tangsi pachobeilo, Baal aphan athok-heihei pajirlo, lapen nangtum aphrang pen kechinine pinlang a-arnam-heihei aphan archolo.

¹⁰La Ne kehijim asonsi nangtum klemlo, anke nangtum vangsi Ne kardomhemthepi Ne ingno arjappo lapen pupo, “netum jokvanlo!”

¹¹Ne kardomhemthepi kanghu atum kechepatu adim putong nangtum kemathama? Nangtum kopima lapen keklem Ne nangthekdun long-et-lo.

¹²Nephan karchoji adim Ne kangvaicheng adim Shiloh anat damnon, lapen langnon laphan Ne kopi klem tang-loma, pima Nerat Israel apap-heihei apot.

¹³Lahei apap nangtum kadokave ta klem-et-lo, Ne nangtum aphan aphong aphong nang puthuvoiphit-lo, bonta nangtum karjuji molo. Nangtum aphan nanghang seta nangtum nethakthelo.

¹⁴Lasonsi Shiloh aphan Ne keklem asonthotsi laso Ne kardomhemthepi nangtum kechiki aphan la Ne klempo. Laso adim Ne nangphusar atum aphan lapen nangtum aphan nangkepitang asonsi Ne Shiloh along keklem asonsi klempo.

¹⁵Nangtum adon Israel arat aphan Ne keplung-et asonthotsi Ne nangtum aphan nangphlung-etji. Ne HEMPHU si keningjelo.

¹⁶HEMPHU pulo, Jeremiah, lahei arat aphan ardompiri. Latum aphan nang chirupiri mate ardompiri; Ne long nangchoningri-piri, pima Ne nang arjuje.

¹⁷Judah lapen Jerusalem arongsopi-heihei along latum kopipi klemloma nang thekdun longlema?

¹⁸Osomar atum theng pangrumlo, pinso atum me kethor abui buibomlo, lapen arloso atum ta arnampi mate latum kepu sining Arechopi aphan him keselampijisi sang aduk pangvuilo. Nephan ning kepadukjisi latum akaprek arnam-heihei aphan hor athok pilo.

¹⁹Bonta nephansi ahok ning paduk loma? Kali, latum amethangsi ning aduk chepilo, lapen amethang aphuthaksi ketherak chovanlo.

²⁰Lapen Ne, klem-un a-HEMPHU, laso a-Kardomhemthepi aphuthak ning kethi kepherememe dungpo. Rat lapen marat api aphuthak lapen thengpi-thengphrang, lapen sok aphuthak seta nening kethi dungpo. Ne ningkethi ke baduta kepamep un-epin ame asonpo.

²¹Nerat atum, ajehak athok dovan athak nangtum pachopamelo lapen ajehak kechoji aphan bida tholo. Bonta Ne HEMPHU kepuji ke nangtum kadokave cho-et tame.

²²Nangphusar atum aphan kephrin athok-heihei mate akaprek athok-heihei alam halatum aphan Ne Ijip pen kevan ahut Ne thangnat ta thanthe.

²³Bonta latum nephan kekroijisi Ne laso ahukum pilo, “Ne lam kroinon anke Ne nangtum Arnam plangpo, lapen nangtum Nerat aso plangpo. Lapen nangtum aphan Ne kepitang ahukum ateng kedoji aphan putang-lo, anke nangtum aphan mesenpo.”

²⁴Bonta thangnat ta ano chedendedet-lo. La alar latum karjuji aning lapen latum kehingno aning kepaklemtoi alingsi klemlo, lapen latum memuchot alar hingno musilo.

²⁵Nangphusar atum Ijip adet pen nang kebar arni pen pini an, nangtum anat neban, montri atum nangtoibomlo.

²⁶Seta baduta arjudun long-lo, mate ano chedendedet-lo. La alar nangtum arjujemusi lapen nangphusar atum apar thurkhrapmusi.

²⁷Lasi Jeremiah, Nerat aso aphan nang lahei alam ningje nangpo, bonta latum nangphan arjujedetji; halatum aphan nang hangpo, bonta halatum nangphan nangthakthedetji.

²⁸Halatum a-Arnam HEMPHU, nephan halatum adet pen kroikre pu nang halatum aphan thanpo, mate latum aduk kepho pen charli nangji alam thanpo, kekroithirklong thitang-lo. Laso alam baduta chethanthedet-lo.

²⁹Chininon, Jerusalem arat atum, nangchu chesoira chevar non. Inglong angbong charhenon, Pima Ne HEMPHU ningthilo, lapen Nerat aso aphan dengdetang-lo.

³⁰Judah adet Nerat atum isi kehingno akam klemtang-lo. Latum Ne kehijim akumlin Nehem arlo battang-lo lapen la pasa-urlo.

³¹Hinnom arlok along latum Topheth pu adovan buitang-lo, lapen ajok hadak latum asopo lapen asopi atum aphan arklisi me phrinpo. Laso keklemji halatum aphan Ne hukum pipe, la Nening Nepok ta mathathe.

³²Lasi la Topheth mate Hinnom arlok pu kehanghedetji apor nangletang-lo, bonta kethu-kethat arlok pusi hangpo. Monit atum aphan latum hadak pippo, pima lahei aphan kepipji nahok ta adim avedetji.

³³Abang arpum-heihei vo lapen marat api a-an plangpo. Lapen lahei aphan baduta pherere abang avedetpo.

³⁴Longle kejejangtang ajo plangpo. Judah arongsopi-heihei lapen Jerusalem atovarpi-heihei along ning arong lapen kechehok arki lapen piso-pangri arong-bohong arki Ne pavedetpo.