Read Karbi JEREMIAH 8 Bible Online

JEREMIAH 8 - Karbi bible

JEREMIAH 8

¹Halaso Judah arecho atum lapen achakri atum areppi lapen kurusar atum, montri atum lapen Jerusalem along kedo arat an areppi thiri pen phursi endetpo.

²Halahei areppi pangrumre lapen pippesi longle athak ho-or ason tiruipo. Arni lapen chiklopi, lapen chiklolongso-heihei, lahei arat atum kechinghon lapen kangduk lapen karju, karcho atum angno hijikchopo.

³Lapen la kehingno arat angbong kerenglang atum, Ne kehijikjam adim-heihei kedo atum kerengji mate kethiji aning hangrongpo. Ne Jakongkethe HEMPHU si keningjelo.

⁴Arat aso phan kepathantoijisi HEMPHU nephan pulo, “Mane jongsi chingkoilote, la thurthedetjima? Mane jongsi tovar manghulote, la chetevarvedetjima?

⁵Tangte kopi apotsi Nerat aso atum Ne pen suisi nangchetevar thuthepinloma? Nang-tum nang kumlin-heihei aphan ot-het-lo lapen Ne nat nang kechiruji molo.

⁶Ne nang arjudun pamelo, bonta nangtum ahok alam ningjeje. Nangtum nangtum angbong inutbakta nangtum kehingno apot nangning chedonone; ‘Ne kopisi kehingno keklemlo’ pu nangtum inutbak ta ne arjuje. Loseile ron kechedan kangplong ason nangtum abangphutin ta nangtum amethang atovarsi chedamrep-lo.

⁷Volongkom atum anta komantusi chevoi nangjima chechini; vothung, vothaiso lapen arnam akongkang avo atum ta asek ahut kedam nangji apor chechini. Bonta, nerat aso atum Ne nang kepangri aron-heihei nangtum chenine.

⁸Kosonsi nangtum giani pu chepu unlo, lapen Ne aron-heihei chini pu kechepuma? Langtha, tok-bang atum pen ajok Ne ron-heihei lartang-lo.

⁹Giani atum therak nang-lo; latum manghulo, lapen pham chedanlo, lapen Ne lam-heihei dengdelo; non kopi abidisi latum kelang-loma?

¹⁰La apotsi latum ahidi-heihei Ne ahemphu kemi aphan lapen latum apiso anut kaprek amonit aphan pidetpo. Abangphutin kethe-kebi ahok-he pen tangka chepadoji bor-ilo. Montri atum lapen kurusar atum anta rat aphan chobeilo.

¹¹Nerat aso areng amek ke latum arengpoksi asonsi thek-lo. ‘Kadokaveta mesen,’ pusi latum pulo, kadokave mepet pepin seta.

¹²Nerat atum, nangtum lahei kehejimmeme akam-heihei keklemtang apot tong therak-loma? Kali, nangtum therak-repin; nangtum kosonsi nang mahang ertanloma la ta chechininelang! Lasi Ne nangtum aphan aduk nang kepi ahut bang kaprek kekrep asonthotsi nangtum ta kreppo, lapen lahelo, nangtum akejut-lo. Ne HEMPHU si keningjelo.”

¹³Inut amonit asok kepangrum asonsi Neta Nerat aso aphan pangrumji Nening hang-lo; bonta latum athe kave adrakha, athe kave athebo arong ason, arvo anta chekedu-et-lo. La apotsi bang amonit aphan Ne longle pekdet-lo.

¹⁴Kopisi eli ingnilun-verlangma? Arnam arat atum arjulo, “Vangnon, paisong komchen arongsopi-heihei anat-le eli kat lonang, lapen hadak thi lonang. Etum a-Arnam HEMPHU ephan epathitoilo; etum aphan Alang bikarsi epajuntoilo, pima Alang phan langphlotsi eli pap klemlo.

¹⁵Ningkangsam lapen kemeji ahut aphan eli ningthelo, bonta la thangnat ta kalisi alar kepherememe vangrong-lo.

¹⁶Etum ahotur atum ke Dan arongsopi an nangle-et-lo; halatum alosei kangplong arki eli arjulong. Halatum alosei nangtebok lote, longle adang bithe an klemhur. Ehotur elongle lapen la along kedo-an ason, erongsopi lapen la along kedo arat an aphan kepavirjisi vangtang-lo.”

¹⁷Lang pangchingtha! HEMPHU pulo, “Nangtum angbong Ne pherui-heihei nangtoilo, kelangno abi kedo apherui, lapen nangtum aphan latum nang archupo.”

¹⁸Ne ning keduk me un-elo, Ne ning sotang-lo.

¹⁹Arjutha! Det adang bithe nerat atum kechiru ase arjulong-lo, “Zaion along HEMPHU dodedet loma?” Halatum arecho, HEMPHU thak-lo, “kumlin-heihei aphan recho pen lapen ale kave bang adet a-arnam-heihei aphan kardom ajok kopisi nangtum Nening pathilo?”

²⁰Rat atum hangjolo, “Barla damtang-lo, kerot-kerim apor tang-et-lo, bonta netum ke jokje pinlang.”

²¹Nening thuvok-lo, pima nerat atum aphan berlamlo; Ne chirulo, nening runhup khangjang-lo.

²²Gilead along dovai avedet-loma? Hadak se kelang atum avedet-loma? Kopisi tangte nerat atum kememedet-lo?