Read Karbi JEREMIAH 9 Bible Online

JEREMIAH 9 - Karbi bible

JEREMIAH 9

¹Langtuk isi alang nephu along kedoji aphan neninghang-lo, lapen nemek-heihei amekkri kangbop alang asonte ne ajo nerlo kethitang nerat aphan chiru unji apot-lo.

²Kejejangtang ajo ne kedo adim along kelangji aphan neninghang-lo, hadak nerat atum pen ne chepahelo longpo. Latum kadokave kekroi thirklongkle Isi kechobei asong chot.

³Latum kaita kechobeijisi chesikver. Ahok adim adet adang ahok-he si haidelo. HEMPHU pulo, “Ne rat atum isi aphi isi kehingno akam klemlo, lapen Ne ke halatum a-Arnam lo pu chekrongkre.”

⁴Abangphutin ta ajirpo pen cherenangji, lapen baduta akorte aphan chiki un-e; Jakob asonsi abangphutin akorte ta chechobeisi plengset, Lapen anut-tin ta ajirpo anong jolo.

⁵Latum kadokave ta ajirpo aphan ja pamemelo, lapen baduta ahok alam ningjeje; latum ade kepachoreijisi pachesekelo; lapen halatum apap che-o-elo.

⁶Latum isi kephangno aphi isi klemlo, lapen isi kechobei akam isi klemlo. HEMPHU pulo, Nerat aso atum Alangphan dengdedet-lo.

⁷Pima la Jakongkethe HEMPHU si pulo, “Tasam kepherang asonsi Nerat aso atum aphan Ne ingthiji lapen halatum aphan Ne langjilang. Nerat aso atum kehingno akam klemtang-lo, Ne kopisi klemthek jilangma?

⁸Latum ade abidi kedo athaiso ason; latum kaita pachobeiver. Abangphutin ta adung aphan lamdok pen ningje, Bonta halaphan lake isi aphamlo.

⁹Laso apot latum aphan Ne aduk pipedet nangjima? Laso akhei aphuthak Ne alar huihedet nangjima? Ne, HEMPHU si keningjelo.”

¹⁰Ne pulo, “Inglongpi-heihei aphan ne chiruji lapen bap-bi kedo adim aphan chernapji, pima latum krenghak-lo, lapen la ajo baduta damdelo. Pi ahur ase arjulongledet-lo; Votek-voso lapen marat api-heihei Ingjar-etsi dam-et-lo.”

¹¹HEMPHU pulo, “Jerusalem aphan Ne isi kerutang abui pinchongpo, sirung atumsi hadak dopo; Judah arongsopi-heihei kejejangtang ajo plangpo, Hadak badu aphanta kedo adim kalidetpo.”

¹²Neli arjulo, “HEMPHU, kopi athesi phangno det-loma lapen sangtimili ajo ason kekrengtailoma, la baduta dam abang avelo? La komatsi kechini kereset abang do? Komat aphansi Nang la Nang than pajirmiloma, anke la anat kaprek aphan than thekpo?”

¹³HEMPHU thak-lo, “Ne latum aphan kopi akethan kedengde apotsi Nerat aso atum lason planglong-loma. Latum Nephan kroikre mate latum aphan paklemtoi akam klemkle.

¹⁴La klemklesi latum lam arjuje tang-lo lapen halatum aphusar atum kepaklemtoi Baal ahukum-heiheisi archolo.

¹⁵Lasi Ne, Jakongkethe Israel a-Arnam kopima keklemji alamle arjunon: Nerat aso aphan akehingno ahansi pachopo, lapen bikarsi pajunpo.

¹⁶Latum aphusar arni pen karjulonglepinlang akhei atum angbong Ne hijikjamji, lapen latum aphan Ne pavirlap letik latum abe pathursi aron armu Ne toipo.”

¹⁷Jakongkethe HEMPHU pulo, “Kopi plangbom loma munthitha! Kechiru atum kevangjile phanon, Kecharhe a-arloso atum aphan hangnon.”

¹⁸Rat atum pulo, “Halatum aphan papraptoinon lapen eliphan pacharhenon, etum amek mekri plengsetsetik, lapen kechirulok amek kanghup hetik an.”

¹⁹Zaion along kechiru ase arjutha, “Etum rutang-lo! Etum aphan patherak pamelo! Etum alongle che-ovek nangpo; Ehem ingsek-ilo.”

²⁰Ne pulo, “HEMPHU alam arjunon, nang arloso atum, lapen Alang lam-heihei no chedennon. Kosonsi kechiru nangjima nang sopimar atum aphan thannon.

²¹Inghapso anat pen kethi nanglut tang-lo, lapen rechohem anta nanglut tang-lo; la tovarpi-heihei along a-osomar atum aphan lapen hithi kedo adim-heihei arisomar atum aphan pathilo.

²²Kethi arpum bithe-bitha rikcholo, hidi ajo aho-or abui asonlo, sok kerot tang aberi asonlo, keroi ponpe asok abui ason. Lahelo, HEMPHU nephan kepathantoi alamlo.”

²³HEMPHU pulo, “Kereset abang abidi apot lapen kangtangrak abang ajakong apot chepindak nangne, lapen keplang abang akhi apot chepindak nangne.

²⁴Mane abang jongsi kechepindakji aninghang-lo pulote, alangli nephan chini lapen chini pame lote pachepindak nang, pima Ne kanghon ke dover, lapen kopima ahokpet lapen akechoksi Ne keklem. Lahei helo nephan ning pangsamlo. Ne, HEMPHU si keningjelo.”

²⁵HEMPHU pulo, “Ijip, Judah, Edom, Ammon, Moab lapen achu kechingtip chepathihek kejejangtang arat atum aphan Ne aduk kepiji arni nangle-bomlo.

²⁶Lahei amonit atum reng cherot-lo, bonta la angthek akechejok aloh latum kroikrelo. Lahei arat atum lapen Israel arat atum anta Ne Kechejok aloh kroikrelo.”