Read Karbi NINGDUK ALUN 1 Bible Online

NINGDUK ALUN 1 - Karbi bible

NINGDUK ALUN 1

¹Jerusalem ingsamrisi do, aphrangke arat si plengset! Aphrangke pirthe asor manpilo, Nonke hemepi asonlo; Rongsopi akethenei banpi plangnang-lo.

²Jopangthang la chirulo, ang-om mekri lidung-lo. Aphrang ajirpi atum an inutbakta aning kepangsamji aphan avedet-lo. La pen kecherap-pet adet an laphan chobeilo lapen non ha latum bangpi abe thurlo.

³Judah arat ke akerap kelongle aban atum hem pen atoi un-esi kedun nang. Halatum bang adetsi donang-lo, amethang pu kechepu ason halatum thangta ave, Hotur kompet, kejokji atovar ave.

⁴Kesang pangthir arni kardomji aphan baduta Kardomhemthepi along vangve, Hadak lun kelun animso kesung chechaknang, lapen kurusar atum hang-charbunang. Rongsopi anghap keton abang ave, lapen Zaion ar-emkrungsi do.

⁵La ahotursi recho cholo; halatum ajakong pen la aphan khangthip. La apap-heihei apot HEMPHU la aphan pasung-lo; la asomar an nepsi pondet-lo.

⁶Jerusalem ahir-asang ke lamban asonchot. La kejalin atum thijok api ason kangchir pen ainiti. Halatum kenep atum pen kekat ongsi ajakong jut-rang-lo.

⁷Non isivetsi runang-lo, Jerusalem hako ahir-asang chemathadam. La hotur arideng kele ahut, la aphan kerapdunji abang baduta ave; la aphan kehai abang lapen la kerem aputhak ingnekchoilo.

⁸La aman damjuilo; la areng angselo lapen bang palangrop-lo. La hang-charbu lapen theraksi amahang chepatu. Jerusalem pherememe apap pensi la amethang chepasa-ur.

⁹Bangpi akangthirthe ke thek-longdak, bonta bangpi akopai aphan thangnat aningkehang ave. Bangpi keremnang pherememepik; baduta la aphan aningpangsam thekthe. La ahotursi haidet-lo, lapen la HEMPHU aphan kangjinso chohang-lo.

¹⁰Bangpi akhipuru do-an, bangpi ahotur atum thi pon-et-lo. Kardom ahem along halatum kelut la thek-long-lo, Hadak akhei kaprek atum aphan HEMPHU palutdam longle.

¹¹Halatum pine kecholongji aphan bangpi arat aso hang-charbu; Kerengji aphan halatum akhipuru an pen cholarlo. “Nephan langtha, HEMPHU,” pu si rongsopi hang-lo; “Ne kesung nelangtha.”

¹²“Nephan Langtha!” pusi bangpi dampri-dampro atum along chirudun. “HEMPHU aningkethi ahut nephuthak kevan akeso neson baduta keso longlelang.”

¹³“Nebang arlo kechobom ame Alangli angsong pensi me nangtoilo. Alangli nephan phamtot-lo lapen nephan longle arum nangvandet-lo, anke alangli nephan obupsi hamhepin akeso nepadolo.”

¹⁴“Nepap-heihei alangli tok-kri lapen halahei rak rappet; Alangli lahei nechethok angden homlo, lapen anghor aber ne ainibomlo. HEMPHU nephan hotur arideng nehodailo, lapen ne halatum abe kethurji ningjoinolo.”

¹⁵“Ne nokbe kedo-an aphan HEMPHU ingnekchoilo, Ne risomar atum aphan kepavirjisi alangli ron-aso nangtoilo. Alangli nerat aphan drakha alang kesor asonsi sorlam lamlo.”

¹⁶“La apotsi ne mek pen nemek-kri palidung-lo- Baduta nephan ningpangsam un-edet-lo; Baduta nephan ningparungre. Hotur atum nehaidet-lo; nerat atum thangnat ta avedet-lo.”

¹⁷“Ne neri chejarlo, bonta baduta nephan nekerap abang ave. Ahintin penta HEMPHU, hotur hangsi nebe pathurlo. Halatum nephan pine kangthirthe amar asonsi rimlo.”

¹⁸“Bonta HEMPHU ahokpet, pima ne Alangli lam ingdilo. Nephan arjutha, rat kedo-an; ne kesung nephan nelangtha. Ne risomar lapen sarpimar atum aphan ban pon-et-lo.”

¹⁹“Nepen kecherap adet atum aphan hang-lo, bonta latum nekerapji aphan molo. Kurusar atum lapen kejalin atum rongsopi atovarpi alongsi thi-et-lo, halatum kerengji aphan an cholangding-lo.”

²⁰“O HEMPHU, Ne kar-em, nekarjong aning kesiksak nelangtha! Nepap-heihei apot ningduk pen nening phukdak-lo. Tovarpi-heihei along pran karmut dolo; lapen arlota kethi dolo.”

²¹“Ne kehang-charbu arjutha ; nephan ning kepangsam abang baduta avedet-lo. Nang nephuthak kevir kevan ke ne hotur atum aning arong-lo. Nang kechechak a-Arni vannon ; ne hotur aphan nekesung ason pasungnon.”

²²“Halatum ajat kelangno an apot halatum aphan khindenon; Nepap apot nephan aduk kepi asonthot latum aphan aduk pinon. Ne ningduk pen hang-charbulo, lapen nening keso cholong-lo.”