Read Karbi NINGDUK ALUN 4 Bible Online

NINGDUK ALUN 4 - Karbi bible

NINGDUK ALUN 4

¹Netum aser kephlan avetang-lo Kardom ahem a-arlong tovarpisi rikcholo.

²Ser asonsi Zaion arisomar atum ephan adorsopik-lo, bonta non lahei jung-jung alongle tibuk-heihei asonlo.

³Mahar api jok seta aso aphan chelana bonta Nerat aso ke Ostrik avo ason aso aphan aning chedokde.

⁴Halatum aso kangchir-kelangit pensi latum pathetoi; Osomar atum an chorek-lo seta latum aphan baduta kepidun abang ave.

⁵Rat atum akemenei a-an kecholong atumta tovarpi-heihei along kangchir pen thinang-lo; Kerengme pen kethe-kedinglong atum ta anbo aphansi chori nang-rok-lo.

⁶Nerat atum aphan Sodom asor an sosesi aduk pilo, lake Arnam arideng pen mek-sirip pen pavirdet-lo.

⁷Ne kejalin atum ingthir-et lapen ar-e kelok ason aju ave, thepik lapen ingtang lapen a-ok mesen.

⁸Non latum chechinine-pinsi tovarpi akrong along tiche, latum kethijisi amahang ikkui-kai; latum areng theng ason krenghak, latum arrepi-heihei anta kreng-et.

⁹Aphi kethi atum aphan mute aphrang ron along kethi memu, aphi atum ke kecholonglesi kethinang, latum aphan kepareng-etji aphan an ave.

¹⁰Nerat aphuthak kevir kevang lake pherememepik; Kanghonthek apei atumta an aphan latum amethang asomar a-ok che-up-lo.

¹¹HEMPHU Alangli-ning kethinangji an lophlot-lo; Alangli Zaion anglong me keichoksi angton pen pacholap-lo.

¹²Baduta bang adet kechari atum Jerusalem anghap lutsi tengkheng unji pu mathathe.

¹³Bonta la plang-lo pima amontri atum pap klemlo lapen la akurusar atum adaikave arat atum aphan pathitoi apot ado dolo.

¹⁴La keja atum amek-kave amonit asonsi tovarpi-heihei along chongvirjamlo, avi-aphik cherothip apot halatum aphan baduta paphophe.

¹⁵“Damnon!” pusi rat atum hangjo. “Nang ingthirthe abang-lo! Ne paphori!” Lasi latum adet pen adet kaprek chongvirlo, baduta hang ponpe det-lo.

¹⁶HEMPHU halatum aphan thang aningkehang ave; Alangli methangsi latum aphan papratjamlo. Kurusar lapen keja atum aphanta alangli thangnat akanghon kepapklang ave.

¹⁷Netum vangvelo pu kerap aphan kecholang un-elo pu ansi kecholang ingtonpo. Netum aphan nangkerapji kavepin adet pensi kerap chonghongverlo.

¹⁸Hotur atum ke netum aphan langcharibomlo; netum tovarpi-heihei along jokta dam un-edet-lo. Netum a-arni-heihei damtang-lo; kejutsi nangletang-lo.

¹⁹Vomu an sose keprap angsong pen nangkesok, latum etum aphan arum ephlung-lo. Halatum inglong along etum aphan hungdunlo, halatum kejejangtang ajo tongsermong pen ekompet-lo.

²⁰Halatum ekai atiri enep-lo, HEMPHU kangvaitang arecho aphan, ili kechikitang bang atum etengkhengji pen ekeraiji abangphan.

²¹Ingneknon, Edom lapen Uz arat atum, ke-un ahut un-an ning cheparongnon. Nangtum akevirta vangbomlo; nangtum jokta reng angse therak nangsi kedam krep-ringrangpo.

²²Zaion ke la apap anam chepi-et-lo: HEMPHU puthot ban netoithuthepinpo. Bonta Edom, HEMPHU nangphan aduk piji; Alangli nangkam ado an paklang dakpo.